Jong van hatte mit et Stellingwarfs de toekomst in
Redaktie 
Op ‘e Hoeve hebben ze nog niet zo lange leden een ni’j dörpshuus kregen. Et is nog zo ni’j dat et nog niet van een naeme veurzien is. Jaap Elzenaar van De Hoeve gong op onderzuuk uut en heurde dat de oolde naeme doukies weer op et gebouw plaetst wodden zal. Die Stellingwarver naeme is ’t Hokkien, en is wel te zien op de prieslieste van et dörpshuus.
Johan Veenstra mag graeg deur et mooie Stellingwarf fietsen en let de laeste tied extra op Stellingwarver naemen in et ‘wild’. De foto van de straote mit de Stellingwarver naeme ‘De Brogge’ maekte Johan in Wolvege.
De oplossing van et julipuzeltien van de Stellingwarver Spreukekelender 2015 is:
r
rk
rak
raek
anker
kraene
kraeken
Ok de oflopen daegen kregen we weer een peer ni’je foto’s binnen veur de rebriek Stellingwarfs in et ‘wild’. De foto wodde maekt an de Peperstraote in Else en instuurd deur Jannie Zwaga-Wemer van Oosterwoolde. Et gebied rond de Schaopedobbe is in bezit van It Fryske Gea, dat niet alliend op dit plak de oorspronkelike Stellingwarver naeme bruken blift, mar ok bi’j heur ere netuurgebieden in Stellingwarf. Zo nam et Gea kotleden ok de naeme ‘Lendebos’ over doe de netuurverieninge die bos in zien bezit kreeg.
Zoe’n vuuftig meensken maekten vri’jdagaovend een slim genoeglike aovend mit in de biebeltheek van Oosterwoolde. De Frysle Krite en de Stellingwarver Schrieversronte hadden gezaemelik veur een biezunder pergramme zorgd vanwegens de Stellingwarver sutelaktie en de Friese boekeweke. De Stellingwarver schriefster Sjoukje Oosterloo – van vroeger uut Oosterwoolde – las veur et schoft veur uut eigen wark. Et gong om prachtige verhaelen, waorbi’j de lachspieren aorig op de proef steld wodden. Behalven uut heur boeken Malle meraokels en Warkieslappe las Oosterloo ok een peer ni’je verhaelen veur. Ok de Friese schriever en verhaeleverteller Mindert Wijnstra vul mit zien prachtige Friese volksverhaelen ommeraek goed in de smaek. Soms leut de schriever uut Warns de verhaelen veur een pat in de omgeving van Oosterwoolde ofspeulen. Ok van Wynstra verschenen al meerdere boeken, zoas It kweade wiif fan Hylpen en oare folksverhalen.
An et aende van de aovend leuten Krite-veurzitter Anne Veenstra en Schrieversronte-direkteur Sietske Bloemhoff weten dat d’r in 2016 opni’j een gezaemelike boeke-aovend orgeniseerd wodden zal. (Foto’s: Lenus v.d. Broek)