Op de laeste feberwaoridag is de meertse zunne al te zien bi’j De Lende bi’j De Hoeve. Et veurjaor komt d’r an! (Foto: Jaap Elzenaar)
Redaktie
Haandbiebeltheek Schrieversronte op Stellingia.nl
Al sund jaor en dag beschikt de Stellingwarver Schrieversronte over een interessaante haandbiebeltheek. Die biebeltheek is in et eerste plak bedoeld veur intern gebruuk, mar is ok te bezuken deur eren. Van de boeken die in de biebeltheek opneumen binnen is now een beschrievende index maekt, daorveur zorgde Schrieversronte-vri’jwilliger Jaap Elzenaar van De Hoeve. Die index is sund kot op www.stellingia.nl in te zien. In de haandbiebeltheek kuj’ nao ofspraoke terechte tiedens kantooruren van de Stellingwarver Schrieversronte. Et maeken van een ofspraoke kan tillefonisch (0516-451108) of via de mail info@stellingwarfs.nl.
Feberwaori-aovend
‘De zunne zakt, de bos staot in de braand’ (Sietske Bloemhoff)
Erverings uutwisselen
Disse weke kwammen de vri’jwilligers van de grote winterveurleesaktie in alle Stellingwarver zorginstellings bi’j mekeer. Niet alliend de aktie zels is ondertussen een jaorlikse tredisie wodden, etzelde gelt veur de evaluaosie naoderhaand. Deur verschillende omstanigheden zoas o.e. ziekte kon niet iederiene dit jaor kommen, mar et grootste pat vertelde mekeer weer over zien erverings van dit keer. Overdudelik was dat de aktie weer arg positief erveren is, deur de meensken die naor de verhaelen luusteren, de zorginstellings én deur de veurlezers zels. Et naor mekeers erverings van et veurlezen luusteren en d’r mit mekeer over te praoten wodt ok as arg nuttig beschouwd. Schrieversronte-mitwarkster Immy Sloot die de aktie altied tiptop veurbereidt hadde ok disse middag weer goed veur mekeer. An et aende van de bi’jienkomst las schriefster Sjoukje Oosterloo heur verhael ‘Duvelskeunsten’ veur (zie foto’s), mit dat verhael wun ze een peer jaor leden de Stellingwarver Schrieversri’jepries. Alle veurlezers kregen van de Schrieversronte as daank et boek ‘Malle meraokels’ van Sjoukje Oosteloo mit. In jannewaori 2016 wodt de veurleesaktie opni’j holen. (Foto’s: Sietske Bloemhoff)
De Ovend van feberwaori: Oosterse kontakten, kuiertocht en melkbussen
‘Om de streektael te bevodderen moej’ veural niet drammerig wezen,’ zegt Gerrit Dannenberg uut et Twentse Riessen in de ni’jste Ovend. In de serie ‘Oosterse kontakten’ praot redakteur Jannes Westerhof mit disse lerer Nederlaans, die him geweldig inzet veur et Twentse streektael. Naost schriever in et Twents is Dannenberg o.e. akftief veur de stichting Twentaal en is hi’j einredakteur van et Twentse tiedschrift Niejen Bodbreef van de Kreenk veur de Twentse Sproake.
Kuieren tussen Paosloo en Blesdieke
Schrieversronte-veurzitter Ype Dijkstra kuierde tegere mit Geert Lantinga veurige zommer al es mooie route die in de ni’jste Ovend beschreven wodt. (Foto: Geert Lantinga)
In et eerste nommer van et ni’je jaor is een biezundere kuiertocht opneumen. Die tocht die diels anslöt bi’j et in 2013 eupende WaterReijkpad, gaot veur een groot pat deur de prachtige omgeving tussen Paosloo en Blesdieke. De kuier is uutzet en beschreven deur Geert Lantinga van Wolvege. Lantinga zorgde veur veul historische aachtergrondinfermaosie en mooie foto’s uut de omgeving van de kuier. In de kommende Ovends zal d’r vaeker ommedaenken wezen veur biezundere kuiers in de Stellingwarver regio.
Boris en Joris
De Ovend van feberwaori gaot uut aende mit een serie van prachtige verhaelen over de beide katten Boris en Joris. Boris en Joris bin de ‘leasekatten’ van Johan Veenstra. Mit riegelmaot vertelt Johan over de streken van Boris en Joris in zien digitaole dagboek, mar de kommende tied ok in De Ovend!
Melkbussehoogte
In De Ovend van feberwaori is opni’j een humoristisch verhael van Freddie de Vries opneumen. Dit keer vertelt de schriever én voetballer uut Hooltpae over et voetballejargon, en legt hi’j uut wat een balle op melkbussehoogte inhoolt…
Over zien erverings in Osaka in Japan vertelt Anne Henk Bloemhoff; hi’j zorgde ok veur disse foto.
In de ni’jste Ovend is vanzels veul meer te lezen. Zo is d’r ok ommedaenken veur de tael, d’r bin gedichten te lezen van o.e. Attie Nijboer, en d’r is weer een mooi verhael in te vienen van Lily Köhler. Over et leven én de (streek)tael in de Japanse stad Osaka vertelt Anne Henk Bloemhoff, hi’j studeert in die miljoenestad Japans.