Redaktie – Pagina 201 – StellingPlus.nl

Streektaeldag op 15 november in Hoogeveen

3 oktober 2014 door Redaktie

Op zaoterdag 15 november hoolt de SND (Stichting Nederlandse Dialecten) de negende streektaelkonfereensie. Et thema is dit keer streektaelliteretuur. Het de streektaelliteretuur nog toekomst? De verkoop van boeken nemt deur et hiele laand henne of, en tal van boekwinkels bin over de kop. De SND stelt daorommme de vraoge as d’r nog wel een mark is veur boeken in de streektael. En hoe komt een streektaelschriever an lezers en optredens, ok die vraoge wodt steld. An et woord komt o.e. Johan Veenstra, die, zoas de SND angeft, in iene van de kleinste taelgebieden van Nederlaand woont en van wie de boeken toch hoge oplaogen hebben. Hoe kan dat, vragt de SND him of… Ok an et woord komt de Friese schriever Ferdinand de Jong, die vertelt over zien initiatief om de Friese sutelaktie weer ni’j leven in te blaozen. Tiedens et morgenpergramme is d’r ok een zonuumde ‘Pitch’ van streektaelboeken die de laeste vuuf jaor uutkommen binnen. Mit et holen van de Pitch wodt deur de bezukers bepaold welk streektaelgebied veur et mooiste boek zorgde.

Tiedens et middagpergramme bin d’r warkwinkels proza en poëzie, daornao wodt de bundel ‘Gloepends’ prissenteerd. In die bundel is uut alle Nedersaksische regio’s proza opneumen.

De konfereensie die veural bedoeld is veur schrievers, uutgevers, redacteurs en interesseerde lezers, is in de biebeltheek van Hoogeveen, Willemskade 27. De dag begint om half tiene morgens en duurt tot middags vier ure. De kosten bin € 15,00 per persoon, inklusief koffie, lunch en een draankien tiedens de prissentaosie van ‘Gloepends’. Anmellen kan op info@huusvandetaol.nl, ie kun ok bellen naor 0593-371010.

Veertigjaorige sutelaktie mit mooi risseltaot

15 september 2014 door Redaktie

Maendagaovend weren de sutelders van de Stellingwarver Schrieversronte veur et laest in aktie, dit keer in Ooldelaemer, Ni’jlaemer en Wolvege. Mit een mooie opbrengst van € 10.500,- kikt de orgenisaosie weeromme op een goed verlopen sutelaktie. D’r wodde best verkocht mit eenzelde gemiddelde as de veurgaonde jaoren. Om verschillende redens weren d’r dit jaor liekewel minder sutelders in et spier as gewoonlik. Veurzitter Ype Dijkstra zee dan ok bi’j de ofsluting: ‘Dit jaor weren d’r nogal wat ziektegevallen, zodat we mit minder ploegen an et sutelen konnen. Oons plan is vanzels dat we volgend jaor weer meer route’s doen kunnen en daor gaon we oons mit mekeer veur inzetten!’ Dijkstra zee ommeraek veul wardering te hebben veur de inzet van alle vri’jwilligers die de sutelaktie dit jaor meugelik maekten.

Toppers in de verkoop weren de Stellingwarver Spreukekelender en de serie van vuuf routegidsen. Ok ooldere uutgiften as ‘De Friese waterlinie’ van Meindert Schroor, ‘De dörpen van Stellingwarf in oolde beelden’ van Jan Koops en Jan de Vries en ‘Mit et waeter veur de dokter’van Johan Veenstra deden et goed.

(Foto’s: Lenus van der Broek)

Vanwegens de veertigste sutelaktie wodden d’r deur de sutelders maendagaovend veertig belonnen oplaoten. An elke belon zit een kaortien dat bi’j inlevering goed is veur een Stellingwarfs boek.

Ni’j verhael van Sjoukje Oosterloo: Beppe heur schölkien

25 februari 20206 september 2014 door Redaktie

Beppe heur schölkien

Vandaege-de-dag ziej’ bi’jkaans gieniene meer mit een schölkien veur. Mien aachterkleinkiender weten amper meer wat een schölkien is. Laot staon dat ze weten wat et belangriekste doel is van et schölkien.

Beppe dreug et schölkien om heur jurk te bescharmen, omreden ze d’r mar een stokmennig jurken hadde, iene veur daegs en iene veur de zundag. Mar et was netuurlik ok makkeliker om een schölkien te wassen in stee van een jurk.

Ze bruukte et schölkien ok as pannelappen, om de pannen van de kachel of uut de ovend te haelen. Butendat diende et ok om de traonen en snotneuzen van de kiender of te vegen.

As Beppe de eier uut et kiepehokke haelen gong, was et schölkien ok verhipte handig om de eier in te dregen. Kwam d’r es vesite, dan konnen de kiender schruten votschoelen onder heur schölkien. En as et slim koold was kon ze heur aarms d’r lekker indri’jen om ze op te waarmen. Et schölkien was ok hiel geschikt om et zwiet mit of te vegen, bi’jglieks as ze de kachel opstoken mos, en mit de etenkokeri’je. Hoolt veur de kachel legde ze ok in heur schölkien en brocht et dan in huus. En as de atepoelen dopt weren gongen de schellen ok in et schölkien.

Bi’j de haast wodde et schölkien bruukt om de appels in te doen, die onder de bomen laggen.

As Beppe onverwaachs vesite ankommen zag, ston ie d’r veraldereerd van te kieken hoevule meubelties et oolde schölkien in een peer tellen stoffen kon.

Hadde Beppe et eten klaor dan gong ze naor buten en wuifde mit heur schölkien, dan wus iederiene dat et eterstied was.

Et zal nog een hiele poze duren eer iene wat uutvunnen het, dat veur zovule doelen bruukt wodden kan, zoas et schölkien van Beppe!

In disse tied zollen ze d’r gek van wodden, aj’ weten hoevule bacteries d’r in dat schölkien zatten. Toch heb ik d’r nooit wat an overholen…. of lichtkaans wel???? LIEFDE!

Sjoukje Oosterloo

Sutelaktie zowat op ‘e helte

1 september 2014 door Redaktie

Woensdag 3 september rollen de krojen van de Stellingwarver Schrieversronte mit de sutelaktie West-Stellingwarf binnen. Et is dan al weer de vierde suteldag, de eerdere drie daegen was de jaorlikse verkoopaktie van Stellingwarver boeken, cd’s en kelenders in tal van dörpen in Stellingwarf-Oostaende. D’r wodde alle daegen goed verkocht, zo is d’r o.e. arg veul belangstelling veur de Stellingwarver Spreukekelender en de vuuf verschillende fiets- en kuiergidsen. Ok ‘Et Stellingwarver voegelboek’ van Freddie de Vries en Ruurd Jelle van der Leij en ‘De Friese waterlinie’ van Meindert Schroor wo’n goed verkocht.

De sutelaktie, die dit jaor veur de veertigste keer holen wodt, wodt ofsleuten op maendagaovend 15 september.

Meertaelighied in Bautzen

30 augustus 2014 door Redaktie

Kotleden weren Henk en Philo Bloemhoff van Oosterwoolde op vekaansie in Duutslaand. Ze kwammen o.e. in Bautzen in de dielstaot Saksen. Op de plaknaembodden van de stad Bautzen, die an de revier de Spree ligt, is de naeme ok in et Sorbisch angeven en hiet dan ‘Budysin’. Op de eerste twie foto’s bin de veur- en aachterkaante van een eer plaknaembod in de omgeving te zien, mit ok de Sorbische naeme d’r bi’j. Ok op de verwiesbotties in et centrum van Bautzen wodt et Sorbisch bruukt, zie dadde foto. Et mooie gebouw op de vierde foto is et streektaelinstituut van de Sorben. De Sorbische minderhied in die regio zol zoe’n vuuf percent wezen.