Redaktie

Snuffelkursus Stellingwarfs 2014 begint 9 oktober

door

Snuffelkursus Stellingwarfs: Veural bedoeld veur meensken die nog niet zolange in Stellingwarf wonen  

Vaeke weten meensken die hier kommen te wonen niet wat d’r op kultureel gebied allemaole te doen is. Dat gelt mit naeme veur de eigen streekkultuur en streekgeschiedenis. Nao et sukses van veurig jaor orgeniseert de Stellingwarver Schrieversronte daoromme veur de twiede keer de ‘Snuffelkursus Stellingwarfs’. Meensken die an die kursus mitdoen kun tiedens vier dagdielen even an verschillende onderdielen van et Stellingwarver arfgoed snuffelen. De kursus wodt holen in et gebouw van de Stellingwarver Schrieversronte in Berkoop en is op:

Donderdagaovend 9 oktober (van 19.30 tot 21.30 ure):

1. Algemiene geschiedenis, deur Geert Lantinga

2. Stellingwarver proza en poëzie, deur Jannes Westerhof

Donderdagaovend 16 oktober (van 19.30 tot 21.30 ure):

1.  De geschiedenis van et laandschop, deur Dennis Worst

2. De dörpen van Stellingwarf in oolde beelden, deur Jan Koops en Jan de Vries

Donderdagaovend 25 oktober (van 19.30 tot 21.30 ure):

1. De geschiedenis van et Stellingwarfs, deur Henk Bloemhoff

2. De netuur van Stellingwarf, beeldreportage deur Ruurd Jelle van der Leij

Zaoterdagmorgen 1 november (van 9.00 tot 11.30 ure): Exkursie in een Stellingwarfs netuurgebied, o.l.v. Freddie de Vries  

De kosten bin € 40,00 per persoon, koffie/thee inbegrepen. Veur disse biezundere kursus kuj’ je opgeven bi’j de Stellingwarver Schrieversronte, info@stellingwarfs.nl, 0516-451108; je opgeven kan tot woensdag 1 oktober.

VEUL KURSUSANBOD BI’J DE STELLINGWARVER SCHRIEVERSRONTE

door

Krek as in 2013 is d’r ok in et winterseizoen 2014 / 2015 opni’j een groot anbod van kursussen bi’j de Stellingwarver Schrieversronte.  Om te beginnen is d’r de Snuffelkursus Stellingwarfs, die veural bedoeld is veur ni’je inwoners van oonze regio. In die kursus wo’n alderhaande onderwarpen op et gebied van et kulturele arfgoed even antipt. In de kursus Stellingwarfs veur beginners wodt je mit naeme et schrieven an et Stellingwarfs leerd, mar is d’r o.e. ok ommedaenken veur et praoten d’r van.

De ‘Praotgroep Stellingwarfs’ is een konversaosiekursus, die bedoeld is om et praoten van et Stellingwarfs (beter) te leren. In de Flitskursus Stellingwarfs wodt je in iene dag tied de beginsels van et schrieven van en praoten in et Stellingwarfs anleerd. In de kursus Laandschopsgeschiedenis staot ieder keer van een dörp zien ontstaonsgeschiedenis centraol. De kursus ‘Vertel een verhael’ geft je adviezen veur aj’ een verhael (nog mooier) vertellen kunnen.

Over al die kursussen kuj’ op StellingPlus lezen onder et koppien Kursuswark

Boekekraante 2014

door

In weke 33 wodt de boekekraante ‘Twie pond ’n stuver’ 2014 deur PostNL in hiel Stellingwarf huus-an-huus verspreided. Een inkelde keer komt et liekewel veur dat iene de kraante niet krigt. Ie kun die dan vanzels nog even opvraogen bi’j de Schrieversronte in Berkoop, mar de kraante is now ok digitaal in te zien, deur te klikken op:

Boekekraante

Veur alle dudelikhied: meensken die een ja-nee stikker op de brievebusse hebben, kriegen de kraante niet!

Foto’s tentoonstelling haandboekbienen

door

Op disse bladziede is de tentoonstelling haandboekbienen nog even te bekieken. Die tentoonstelling was tiedens de keunstroute Eupen Stal in de grote zael van et gebouw van de Stellingwarver Schrieversronte in Berkoop. De hiele manifestaosie was een idee van haandboekbienster Corrie Los uut Oosterwoolde; de manifestaosie wodde in gezaemelikhied mit Stichting Handboekbinden orgeniseerd. De foto’s bin maekt deur Schrieversronte-veurzitter Ype Dijkstra uut Oosterwoolde.

P1220177 (1) taofel en uutleg en bakken vitrines overzicht bak keunst Peter keunst Christiaan

de stembusse

warkwinkel

Pebliekspriezen manifestaosie haandboekbienen bekendmaekt

door

eerste pries

Oflopen zundagaovend, kot nao et ofsluten van Eupen Stal, wodden tiedens een speciaole bi’jienkomst bi’j de Stellingwarver Schrieversronte in Berkoop de pebliekspriezen bekendmaekt van de manifestaosie haandboekbienen. Veertig professionele en ammeteur haandboekbieners stuurden daorveur heur wark in. In de vier weken durende keunstroute weren al die veertig haandbunnen boeken tentoonsteld in de grote zael van et gebouw van de Schrieversronte. Et pebliek van Eupen Stal mocht mit mekeer uutmaeken naor wie de pebliekspriezen gaon zollen. Veur et in te bienen boek weren losse katerns beschikber steld van et keunstboek ‘Van schossel tot slingerpad’, dat oflopen veurjaor deur de Stellingwarver Schrieversronte uutgeven wodde. De meerste stemmen gongen naor Eva Kipp (Kloosterburen), de twiede pries was veur Baukje Scheppink (Haddegeriep) en de dadde pries gong naor Lenie Stamhuis uut Garnwerd. Veur de drie winners hadde de SSR drie keunstwarken en gedichten beschikber steld van Peter Hiemstra en Christine Mulder, Marjolein Spitteler en Willem Jan Teijema, en Christiaan Kuitwaard en Roely Bakker. Deur een vakjury wodde eerder, bi’j de prissentaosie van ‘Van schossel tot slingerpad’, op de eupeningsdag van Eupen Stal op 12 juli, et wark van An Taveirne (Brugge), Harrie Knoors (Roermond) en Sacha de Ven (Aduard) as beste anwezen. Uut et pebliek dat de formelieren invulde t.b.v. de pebliekspriezen bin acht naemen lot. Die acht meensken wodt een kursus haandboekbienen anbeuden. De kursus wodt op 8 november in Berkoop geven deur Jan Bosch en Corrie Los van de Stichting Haandboekbienen.

Op ‘e foto hierboven het Sacha de Ven krek de pries veur winneres Eva Kipp in ontvangst neumen, omreden laestnuumde mit vekaansie is. Links van heur de maeker van et keunstwark Peter Hiemstra en rechts dichteres Christine Mulder. Hiemstra leut him deur een gedicht van Mulder inspireren en verwarkte ok de tekst daorvan in zien keunstwark.

pebliek 10 aug

Roem veertig haandboekbieners en ere belangstellenden maekten de priesuutrikkinge mit. Rechts veuran Jan Bosch, veurzitter van Stichting Handboekbinden.

Marjolein en Willem Jan

Veur de drie pebliekspriezen die beschikber steld binnen deur de Schrieversronte zorgden Marjolein Spitteler/Willem Jan Teijema (zie foto), Peter Hiemstra/Christine Mulder en Christiaan Kuitwaard/Roely Bakker. 

Van de veertig dielnemers an de manifestaosie haandboekbienen weren neffens et pebliek van Eupen Stal dit de inzenders van et beste wark:

1. Eva Kipp

2. Baukje Scheppink

3. Leny Stamhuis

4. Annina Lingsma

5. Jan Bosch

6. Ans Buiting

7. Sacha de Ven

8. Jaap v.d. Visch

9. Hanneke Rutges

10. Duelles (Eva Kipp en Sacha de Ven)