Meertaelighied

Veurig jaor begonnen we al mit disse biezundere fotorebriek angaonde meertaelighied. Wat koj’ tegen an twie- of meertaelighied in je vekaansiestreek? Dus in et eupenbaor en in et ‘gewone leven’ in ere streken?

Harmen, Baskenlaand, 1

Harmen, Baskenlaand, 2

Vandaege kregen we van Harmen Houtman uut Et Vene opni’j mooie foto’s en gegevens angaonde et gebruuk van meertaelighied in et eupenbaor; dit keer uut Baskenlaand. Op de bovenste foto is een straotenaeme in Bilbao te zien. De boverste naeme is in et Spaans, de onderste in et Catalaans. De onderste foto is van een klein dörpien dat vlakbi’j de Fraans greens ligt. Baskenlaand ligt trouwens ok veur een klein pat in Frankriek. ‘In et gebied was et rustig, vertelt Harmen, van protesten of wat dan ok hebben we niks verneumen. ‘De ni’je keuning perbeert Baskenlaand ter wille te wezen. Hi’j kan ok Catalaans praoten,’ neffens Harmen. ‘Wanneer leert Willem Alexander Fries en Stellingwarfs?!’ As jim ‘argens op ‘e wereld’ ok zoe’n mooi gebruuk van twie of meer taelen zien: laot et oons weten, mit een foto d’r bi’j plaetsen we et op disse webstee!

‘Fietsen in en om Appelsche’ en ‘Langs oolde en ni’je hooltpaeden’: twie ni’je routegidsen

Emiel, 2

Emiel Beijk van Staotsbosbeheer kreeg de ni’je routegidsen uut hanen van Geert Lantinga (links) en Jan Koops (rechts). Foto: Lieuwkje Cnossen

Naodat eerder de routegidsen De buurtschappen van Oosterwoolde, Wandelen rond Wolvega en Taalfietstocht rond Berkoop deur de Stellingwarver Schrieversronte uutgeven wodden, verschenen oflopen donderdag in pannekoekhuus ‘De Oude Hof’ in Appelsche de routegids Fietsen in en om Appelscha (deur Jan Koops uut Oosterwoolde) en de al even mooie kuier Langs oolde en ni’je Hooltpaeden (deur Geert Lantinga van Wolvege). Vanwegens de jaorenlange goeie baand tussen de Stellingwarver Schrieversronte en Staotsbosbeheer wodden de eerste twie exemplaoren uutrikt an Emiel Beijk van SBB. Schrieversronte-direkteur Sietske Bloemhoff prees in heur toespraoke de altied grote bereidwillighied van Staotsbosbeheer om an veul aktiviteiten van de Schrieversronte mit te warken. ‘Dat gelt niet alliend angaonde de hulpe en goeie raod an oonze routegidsen, mar ok bi’j et orgeniseren van biezundere exkursies en d’r was bi’jglieks financiële steun veur ’Et Stellingwarver Voegelboek’. Ok de toestemming in 2009 veur et orgeniseren van Stellingwarfpop bi’j de Spoekeplasse in Noordwoolde was vanzels meraokels mooi en daor weren we slim wies mit,’ zo zee Bloemhoff. Kotleden verzorgde de heer Beijk butendat een belangriek diel van de kursus Laandschopsgeschiedenis: ‘We hopen vanzels dat we ok bi’j de eerstvolgende kursus weer een beroep op jow doen kunnen.’ Vlak veur et uutrikken van de gidsen verzorgden Koops en Lantinga een film- en fotorippertage van de beide routes.

Fietsen in en om Appelsche komt deur historisch interessaante dörpsgebieden van Appelsche, mar gaot ok deur et Fochtelervene, deur Veenhuzen en de Kaele Dunen. De routegids geft behalven de route (60 km, mit inkotmeugelikheden) ok veul infermaosie over de gebieden daor aj’ al fietsende langes kommen en is veurzien van prachtige foto’s en een routekaorte.

Langs oolde en ni’je hooltpaeden gaot langs (bos)paeden van Hooltpae en Ni’jhooltpae en komt langs plakken daor aj’ gewoonlik niet zo gauw kommen zullen. In de gids vertelt Lantinga over de slim interessaante historie van et gebied, mar het ok ommedaenken veur de netuur.

Et doel is dat in 2015 opni’j twie gidsen uutgeven wodden, en in 2016 alderdeegst drieje. In die serie van drieje wo’n routes beschreven langs en in de naoste omgeving van de revier De Lende. Alle routegidsen bin Nederlaanstaelig.

Kommende donderdag: opni’j twie routegidsen

P1010887, Drents-Friese Woold

Fietsen in en om Appelsche (Jan Koops)

Afbeelding18, pad Hooltpae

Langs oolde en ni’je hooltpaeden (Geert Lantinga)

Kommende donderdag verschienen d’r bi’j de Stellingwarver Schrieversronte opni’j twie routegidsen. Jan Koops van Oosterwoolde schreef een prachtig fietsroute om Appelsche henne, mit as titel In en om Appelscha. De route komt deur historisch interessaante dörpsgebieden van Appelsche, mar gaot ok deur et Fochtelervene, deur Veenhuzen en de Kaele Dunen. Omreden de tetaole lengte van de fietsroute goed 60 km is, het Koops meugelikheden in de gids angeven om de route te verkotten. De routegids geft behalven de route zels ok veul infermaosie over de gebieden daor aj’ al fietsende langes kommen en is veurzien van prachtige foto’s. De gids is Nederlaanstaelig, telt 32 bladzieden en gaot € 7,50 kosten.

Toegeliekertied verschient ok de ni’je routegids Langs oolde en ni’je Hooltpaeden. Geert Lantinga zorgt mit disse gids opni’j veur een unieke kuier; dit keer deur mit naeme de bossen en paeden van Hooltpae en Ni’jhooltpae. De kuier gaot langs plakken daor aj’ gewoonlik niet zo gauw terechte kommen zullen, en lat opni’j zien hoe prachtig Stellingwarf is. In de gids vertelt Lantinga over de slim interessaante historie van et gebied, mar het ok ommedaenken veur de netuur. Ok disse routegids is Nederlaanstaelig, wodt 64 bladzieden dikke en gaot € 8,50 kosten.

In 2015 geft de Stellingwarver Schrieversronte opni’j twie routegidsen uut. Iene beschrift een arg mooie route in de omgeving van Haulerwiek en Waskemeer, de ere de interessaante omgeving van Noordwoolde. In 2016 zullen mar liefst drie gidsen uutgeven wodden. Et gaot dan om drie gidsen mit routes langs en in de naoste omgeving van de revier De Lende. Veur disse drie routegidsen zal ‘Lendekenner’ Geert Lantinga zorgen gaon.

In de serie verschenen eerder De buurtschappen van Oosterwoolde, Wandelen rond Wolvega en Taalfietstocht rond Berkoop.

Bridgen bi’j de Schrieversronte

brigde

Vandaege, zaoterdag 14 juni, orgeniseert Hotel Lunia in Berkoop een ‘brigderoute’ deur et dörp. Op verschillende lekaosies wodt et spul speuld, zo ok in de grote zael van et gebouw van de Stellingwarver Schrieversronte. Roem honderd meensken doen mit en speulen de hieltied vuuf potties in elke lekaosie, waornao ze nao de volgende gaon. An et aende van de dag wodt dudelik welk koppel wunnen het. Bi’j de Schrieversronte zorgt ponghoolder Henk Koelma van Hooltpae veur op ‘e tied een bakkien koffie of thee. (Foto: Lenus v.d. Broek)

Fleurig uutstappien passeniel Schrieversronte

DSC workshop

Oflopen deensdag was et kantoor van de Stellingwarver Schrieversronte dichte i.v.m. et jaorlikse reisien van et passeniel. Dit keer gong de reize naor et Drentse Runen waor mit mekeer o.e. een gezellige en kreatieve warkwinkel ‘Mozaieken maeken’ volgd wodde. Mit veural veul plezier én inzet wodden biezundere risseltaoten behaeld, zoas op de foto te zien is! Jim zien van rechts naor links Trijnie Telkamp (DTP o.e. De Ovend), Immy Sloot (financiële en ledenadministraosie), Saskia Douma (archief en Kenniscentrum), Rosa Bosma (huushooldelike dienst) en Sietske Bloemhoff (direkteur). Mit mekeer wodde an et aende van de dag weerommekeken op een slim fleurig en kammeraodschoppelik uutstappien.