Mit een geweldige opbrengst van meer as € 3.000,- op de vierde sutelaovend komt de opbrengst van de grote huus-an-huus verkoopaktie van de Stellingwarver Schrieversronte now al roem boven de € 10.000,-. Topper in de verkoop blift de Stellingwarver Spreukekelender mar ok ‘Et Stellingwarver voegelboek’ van Freddie de Vries en Ruurd Jelle van der Leij en de beide ni’je routegidsen doen et arg goed. De sutelaktie levert de Stellingwarver Schrieversronte butendat een mooie groep ni’je leden op. Opvalend is ok de zowat altied positieve holing die de sutelders erveren angaonde de Schrieversronte en et Stellingwarfs.
Redaktie
Sutelaktie is op ‘e helte
De sutelaktie van de Stellingwarver Schrieversronte is al weer veur de helte omme. Maendag 2 september wodde d’r suteld in Noordwoolde, De Hoeve en op ‘e Oosterstreek.
Op ‘e foto zien jim Schrieversronte-bestuurslid Jan Baas, die vlakbi’j huus an de Dwasvaortweg sutelde. Zo te zien het Jan ommeraek goed verkocht! (foto: Anneke Koopstra)
Woensdag 4 september rattelen de sutelkrooien deur Berkoop, Makkinge en Ni’jberkoop.
28 september: streektaelfestival Op ‘e streek
De Stellingwarvers Carolien Hunneman, Johan Veenstra, Serge Epskamp en Jaap Louwes; zi’j alle viere doen mit an et eerste streektaelfestival dat de Skâns in De Gediek orgeniseert op zaoterdagaovend 28 september. Een prachtig initiatief van dit kulturele centrum in Stellingwarfs buurgemiente Opsterlaand! De Skâns zet vot-en-daolik goed in, want d’r is warkelik veur een prachtig pergramme zorgd.
Carolien Hunneman tiedens de vri’jwilligersaovend van de Stellingwarver Schrieversronte begin dit jaor. (Foto: Lenus v.d. Broek)
Et pergramme begint aovens om half achte, en op drie plakken in De Skâns kun deurlopend optredens bezocht wodden. Zo bin in de ‘Ronde Zael’ drie blokkies van schrievers en muzikaanten regeld: Carolien Hunneman en Johan Veenstra verzorgen tegere heur pergramme van 19.30 tot 20.20 ure. Daornao is et de beurt an schriever Douwe Kootstra en troebadoer Doede Veeman en daornao an Jan de Vries en Leendert Ferwerda. In de Grote Zael bin mit naeme optredens van grotere bands, waoronder de Grunninger ‘Straotklinkers’. In et Theaterkefé treden op: Gurbe Douwstra (20.00-20,50 ure), Serge Epskamp (21.00-21.50 ure) en Jaap Louwes (22.00-22.50 ure). De aovend wodt ofsleuten mit een ongetwiefeld schitterend optreden van de fermaosie ‘Troubadoers’, mit o.e. Doede Veeman.
Bi’j de Stellingwarver Schrieversronte was Serge Epskamp veurig jaor o.e. te heuren op een literaire aovend in Noordwoolde. (Foto: Lenus v.d. Broek)
De aovend begint om half achte en duurt tot half iene naachs. De toegangskaorten kosten € 15,00. Veur meer info kuj’ terechte op www.skans.nl.
Vanof 26 september kuj’ bi’j de Schrieversronte: Snuffelen in Stellingwarf
Wie dot mit an de Snuffelkursus Stellingwarfs?
Vaeke weten meensken die in oonze regio kommen te wonen niet wat d’r hier allemaole te doen is. Dat gelt mit naeme veur de aktiviteiten op et gebied van de Stellingwarver streekkultuur en geschiedenis. De Stellingwarver Schrieversronte orgeniseert daoromme kommende haast veur et eerst de ‘Snuffelkursus Stellingwarfs’. Meensken die an die kursus mitdoen gaon kun tiedens vier dagdielen even an verschillende facetten van et Stellingwarver arfgoed snuffelen. De kursus wodt holen in et gebouw van de Stellingwarver Schrieversronte in Berkoop en is op:
Donderdagaovend 26 september (van 19.30 tot 21.30 ure):
1. Algemiene geschiedenis, deur Geert Lantinga
2. Stellingwarver proza en poëzie, deur Jannes Westerhof, Johan Veenstra en Christine Mulder
Donderdagaovend 3 oktober (van 19.30 tot 21.30 ure):
1. De geschiedenis van et Stellingwarfs, deur dr. Henk Bloemhoff
2. De dörpen van Stellingwarf in oolde beelden, deur Jan Koops en Jan de Vries
Donderdagaovend 10 oktober (van 19.30 tot 21.30 ure):
1. De geschiedenis van et laandschop, deur drs. Dennis Worst
2. De netuur van Stellingwarf, beeldreportage deur Ruurd Jelle van der Leij
Zaoterdagmorgen 19 oktober (van 9.00 tot 11.30 ure):
Exkursie in een Stellingwarfs netuurgebied, o.l.v. Freddie de Vries
De kosten bin € 30,00 per persoon, koffie/thee inbegrepen
Anmelden kan bi’j de Stellingwarver Schrieversronte in Berkoop. Dat kan per mail: info@stellingwarfs.nl, of deur even te bellen mit et kantoor: 0516-451108
Stellingwarver Schrieversronte
Willinge Prinsstraote 10
8421 PE Berkoop/Oldeberkoop
info@stellingwarfs.nl, 0516-451108
Foto’s: Sietske Bloemhoff
Mooi gebruuk Stellingwarver gemientevlaggies
De Stellingwarver Schrieversronte verkocht al sund jaor en dag Stellingwarver fiets- en bootvlaggies. Mit riegelmaot kuj’ die overal tegenkommen. En niet alliend op fietsen en boten! Vaaste Schrieversronte-fotograaf Lenus v.d. Broek het de westelike variaant bi’j zien zommerhusien an et Nannewied in Ooldehaske uutsteuken, kiek mar:
In de veerte ziej’ nog een vlaggien hangen, dat is een Grunnings vlaggien. Van oorsprong komt Lenus uut Grunningen, en die perveensie heurt krek as Stellingwarf bi’j et grote Nedersaksische taelgebied!
Wie ok zoe’n mooi Stellingwarfs vlaggien in zien bezit hebben wil, dat kan vanzels! Ze bin te koop bi’j de Stellingwarver Schrieversronte in Berkoop (0516-451108, info@stellingwarfs.nl) en kosten mar € 4,50 et stok!