Redaktie

Op 13 september kwam et boek Schrijvers op streek uut. In et boek staon verhaelen van twintig schrievers in twintig verschillende streektaelen van oons laand. Butendat staon d’r foto’s van alle schrievers in et boek en een vertaeling van de verschillende verhaelen in et Nederlaans. Drievende kracht aachter et projekt was de Amsterdamse Grunninger Jan Sleumer. De indringende schrieverspetretten bin maekt deur Iris Réthy. D’r staot een inleiding in et boek van perf. dr. Marc van Oostendorp. Aachterin et boek staot een artikel over streektaeleigenaorigheden. Et Stellingwarfs wodt in et boek vertegenwoordigd deur Johan Veenstra. Van him is et verhael Zwelvers opneumen. Hi’j vertelt aachterin et boek ok wat over de Stellingwarver sutelaktie. Misschien brengt dat aandere streektaelorgenisaosies op een goed idee! Een peer aandere naemen: Fries: Jetske Bilker en Ate Grijpstra, Drents: Marga Kool en Lukas Koops, Westerkertiers: Melle Hijlkema, Twents: Gerrit Kraa, Noord-Twents: Herman Finkers, Aachterhoeks: Henk Krosenbrink en Derk Jan ten Hoopen… En nog een hieleboel meer. Et boek dat uutgeven is deur uutgeveri’je Kleine Uil zicht d’r prachtig uut en is een boeiend mozaïek in woord en beeld van de literetuur in oonze streektaelen. Et telt 206 bladzieden en kost 16,50 euro. ISBN:978 94 91065 65 1.

De kursus Laandschopsgeschiedenis, die op et mement veur et eerst holen wodt in Else, is ondertussen op ‘e helte. Veur disse ni’je kursus bliekt veul interesse en wodt deur de twintig dielnemers ommeraek wardeerd. De kursus is ontwikkeld deur drs. Dennis Worst uut Oosterwoolde i.s.m. de Stellingwarver Schrieversronte. Et doel is dat de kursus laeter nog in (veul) meer Stellingwarver dörpen geven wodden zal.

De kursus bestaot uut een viertal aovenden, waorbi’j et veural om de geschiedenis van et laandschop in en om et dörp henne gaot. De dielnemers leren tiedens de kursus et laandschop as et waore te ‘lezen’ en kommen zo meer an de weet over et ontstaon van heur dörp. Tiedens de kursusaovens kommen dan ok onderwarpen an bod as de ontstaonsgeschiedenis van et laandschop, de dörpsgeschiedenis, de veldnaemen in en om et dörp, mar d’r is ok ommedaenken veur de netuurgebieden.

Oflopen zaoterdagmorgen gongen de kursisten o.l.v. Dennis Worst op ‘e fiets d’r op uut, en wodde et lekaole laandschop op die wieze veerder verkend. Op de onderstaonde foto’s onderzuken kursisten en kursusleider  n.a.v. een kaorte de bojem an de Duustereweg bi’j Else.

Veur de foto’s zorgde Jan Koops uut Oosterwoolde.

Goeie sutelaktie Stellingwarver Schrieversronte

Mit een prachtige opbrengst van krapan € 14.500,00 wodde woensdagaovend 11 september de jaorlikse sutelaktie van de Stellingwarver Schrieversronte ofsleuten. Dat ofsluten gebeurde neffens tredisie mit et blaozen op de speciaole suteltoeter. Dit keer was die eer veur iene van de ni’je sutelders, en dat is Willie Donker uut Ooldehoorn.

Op de laeste aovend wodde d’r suteld in Appelsche, de sutelders hadden spietig genoeg wat last van regenbujjen mar zetten ondaanks dat toch deur en verkochten goed.

Toppers in de verkoop van de sutelaktie van dit jaor weren de Stellingwarver Spreukekelender, ‘Et Stellingwarver voegelboek’ van Freddie de Vries en Ruurd Jelle van der Leij en de routegidsen ‘Wandelen rond Wolvega’ en de ‘Taafietstocht rond Berkoop’. Ok ‘Mit et waeter veur de dokter’ van Johan Veenstra  en ‘Bij de bek af’ van Karst Berkenbosch wodden arg goed verkocht. Dit jaor bleek d’r opni’j flink wat belangstelling veur de Stellingwarver kienderboeken. De sutelaktie leverde de Stellingwarver Schrieversronte butendat een mooie groep ni’je leden op.

An et aende van de laeste sutelaovend bedaankte direkteur Sietske Bloemhoff uut naeme van et bestuur alle vri’jwilligers (roem 80 personen) die de jaorlikse sutelaktie meugelik maeken.

De krooien van de sutelaktie passen ok goed in liften as et wezen moet. Anneke Koopstra en heur zussien Coby (links op de foto) lokte et in elk geval in Oosterwoolde mit gemak! (foto: Anneke Koopstra)  

Maendag 9 september wodde de vuufde sutelaovend van de Stellingwarver Schrieversronte holen. Ok disse aovend verleup hiel goed, zodat de opbrengst van de sutelaktie now op € 12.500,00 komt. Toppers blieven de Stellingwarver Spreukekelinder, de ni’je routegidsen van Berkoop en Wolvege, ‘Et Stellingwarver voegelboek’ en ‘Mit et waeter veur de dokter’ van Johan Veenstra.

Woensdag 11 september is de zesde en laeste sutelaovend, temeensen as et weer et toelat… Die aovend wodt d’r suteld in Appelsche en Oosterwoolde. Vaalt de aovend liekewel uut deur min weer, dan wodt de sutelaktie uutsteld naor de reservedaotum en die is op maendag 16 september.

Mit een geweldige opbrengst van meer as € 3.000,- op de vierde sutelaovend komt de opbrengst van de grote huus-an-huus verkoopaktie van de Stellingwarver Schrieversronte now al roem boven de € 10.000,-. Topper in de verkoop blift de Stellingwarver Spreukekelender mar ok ‘Et Stellingwarver voegelboek’ van Freddie de Vries en Ruurd Jelle van der Leij en de beide ni’je routegidsen doen et arg goed. De sutelaktie levert de Stellingwarver Schrieversronte butendat een mooie groep ni’je leden op. Opvalend is ok de zowat altied positieve holing die de sutelders erveren angaonde de Schrieversronte en et Stellingwarfs.