Foto: Lenus v.d. Broek
Eerste exemplaoren ni’je toeristische routegidsen veur burgemeester Gerard van Klaveren en wethoolder Sierd de Boer
In de prachtige dele van de oolde boerderi’je op et laandgoed ‘De Lindevallei’ in Wolvege verschenen oflopen zaoterdagmiddag 24 augustus twie ni’je toeristische routegidsen. De eerste exemplaoren weren veur burgemeeester Gerard van Klaveren van Stellingwarf-Westaende en kultuurwethoolder Sierd de Boer van Stellingwarf-Oostaende. Beide manluden moesten d’r liekewel wel wat veur doen om in et bezit te kommen van de beide gidsen. Deur elk an een touwgien te trekken kwammen de boekies over een oolde drinkerskoele veur vee elk op een van een Stellingwarver vlagge veurzien vlot op heur toe. Dat had allemaole te maeken mit een diel van de routegids ‘Wandelen rond Wolvega’, die o.e. over et laandgoed ‘De Lindevallei’ komt.
Schrieversronte-veurzitter Ype Dijkstra luustert andachtig naor de reakties van burgemeester Van Klaveren en wethoolder De Boer (foto: Lenus v.d. Broek).
Wethoolder De Boer en burgemeeester Van Klaveren opperden mitien al idenen veur volgende routegidsen (foto: Lenus v.d. Broek)
Uut naeme van beide gemienten gaf burgemeester Van Klaveren an veul wardering veur dit ni’je Schrieversronte-initiatief te hebben en slim bliede te wezen mit et verschienen van dit soorte van routegidsen. In zien eupeningswoord had Schrieversronte-veurzitter Ype Dijkstra al angeven dat et uutgeven van de routegidsen een onderdiel is ‘Stellingwarf veuruut’, de verni’jende toekomstvisie en koers van zien stichting. Burgemeester Van Klaveren en wethoolder De Boer bleken ok al idenen te hebben veur ni’je routegidsen. Zo vertelde De Boer dat hi’j in de serie ok graeg een routegids van Appelsche hebben willen zol. Veurzitter Dijkstra kon angeven dat daor al an warkt wodt, et doel is dat kommend veurjaor een routegids van in en om Appelsche henne verschienen zal. Veur die routegids zorgt Jan Koops van Oosterwoolde, Koops wet veul van dat gebied of en is al drok in de weer mit et uutzetten van de route.
Tiedens de middag in en bi’j de oolde boerderi’je an De Meenthe in Wolvege leut Geert Lantinga in een prachtige powerpointprissentaosie de inhoold van beide gidsen zien. Daor was veul wardering én enthousiasme veur, want verscheiden geneudigden gavven an ien of beide routes eerdaegs volgen te willen.
De ‘Taalfietstocht rond Berkoop’ beschrift een fietstocht deur de prachtige gebieden om dit biezundere dörp henne. Onderwegens kommen de fietsers riegelmaotig in anraeking mit et Stellingwarfs, zoas de spreukies van vrouw Lamkje Hof-de Boer op de toegangsbodden bi’j Berkoop en et taelmonement bi’j De Kuunder-Tsjonger in Ni’jberkoop. Onderwegens kan bi’j kefé-resteraant Boszicht in Ni’jberkoop van een speciaole Stellingwarver boekekiste gebruuk maekt wodden. Disse route is omdebi’j 52 kilometer, mar kan ok makkelik in twie patten verdield worden
In ‘Wandelen rond Wolvega’ beschrift streekkenner Geert Lantinga een butengewoon mooie kuiertocht om Wolvege henne. De tocht komt langs plakken waor veul meensken uut de Stellingwarven zels amper weet van hebben dat ze bestaon. Behalven de route beschrift Lantinga in de gids ok in et kot de geschiedenis en de netuur van de plakken daor de kuierders langes kommen. De kuier is ongeveer 20 kilometer, mar kan makkelik in verschillende etappes opdield wodden.
Veul interesse was d’r ok veur de inleiding van Gerard Kranendonk over et belang van routegidsen (foto: Lenus v.d. Broek).
Nao de officiële prissentaosie hul Gerard Kranendonk, hi’j is veurzitter van de Stichting Toptransferium Noordwoolde, een inleiding over et belang van routegidsen veur toeristisch Stellingwarf. Kranendonk zee et muulik te vienen om in disse tied te kiezen tussen de meniere van anbieden van toeristische meugelikheden in en veur een streek. Kies ie veur boekies, of moej’ juust je anbod digitaal anleveren.
Veurzitter Dijkstra daankt beide auteurs van de ni’je gidsen (Geert Lantinga en Sietske Bloemhoff) veur heur inzet (foto: Lenus v.d. Broek)
An et aende van de middag bedaankte Schrieversronte-veurzitter Ype Dijkstra alle meensken die de uutgifte en de prissentaosie van de beide gidsen mit meugelik maekt hadden. Uteraord gul die wardering veur Geert Lantinga en Sietske Bloemhoff die veur de ni’je gidsen zorgden, mar ok veur de meensken die beide routes konterleerden: Fettje Alten en Jelke en Janke Nijboer.
De heer Koopmans stelde de dele van zien boerderi’je ommenocht beschikber (foto: Lenus v.d. Broek).
Wardering was d’r ok veur de meensken van et laaandgoed, die de boerderi’je beschikber stelden veur de prissentaosie. Deur zien enthousiaste bereidwillighied zorgde de heer Koopmans zo veur een sfeervolle en toepasselike omgeving van de prissentaosie.
Daank was d’r ok veur de mitwarking van Staotsbosbeheeer en It Fryske Gea, en veur Rabobaank Heerenveen – Zuidoost-Friesland.
De beide gidsen ’Wandelen rond Wolvega’ en ’Taalfietstocht rond Berkoop’ bin beide Nederlaanstaelig, mar veur et Stellingwarfs is veul ommedaenken in de vorm van gedichten en verhaelties. In de uut te klappen veur- en aachterkaante bin kaorten van de routes opneumen. De gidsen bin makkelik hanteerber en mit te nemen in een jassebuse. Beide routegidsen bin financieel mit meugelik maekt deur Rabobaank Heerenveen – Zuidoost-Friesland. De gidsen bin o.e. te koop (€ 8,50 en € 7,50) bi’j de boekhaandels in Wolvege en Oosterwoolde en bi’j de Schrieversronte in Berkoop.
