Redaktie

Van twie van de negen lieties die uutkeuzen binnen veur de finale van et Drents lietiesfestival schreef Serge Epskamp uut Zaandhuzen de meziek. Et gaot daorbi’j om de meziek van et lietien ‘Kledder’, dat zongen wodt deur Annemiek Drenth, en waorvan Ria Westerhuis de tekst schreef, én om de meziek van ‘Zun in de snoet’. Dat lietien wodt zongen deur Thyan Drupsteen, zi’j is de dochter van Delia Bremer die veur de tekst van et lietien zorgde.

De finale is op donderdag 9 meie, en zal aovens uutzunnen wodden op RTV Drenthe. Serge Epskamp begeleidt tiedens die finale niet alliend Annemiek Drenth, mar ok, tegere mit Rob Zandgrond en Ruud Fieten, Thyan Drupsteen. Aorig is dat niet alliend Serge, mar ok Rob Zandgrond en Ruud Fieten in oonze omkrieten niet onbekend binnen. Krek as Serge deden ok zi’j mit an Stellingwarfpop; tegere vormen Rob en Ruud et niet onbekende The Jetfarm. Butendat begeleidde Rob Zandgrond doe ok zangeres Sietske Sietsma en zi’j wunnen doe de twiede pries.

Alle negen uutkeuzen lieties veur et Drents lietiesfestival bin now al te heuren op de webstee van RTV, en d’r kan butendat ok now al op die lieties stemd wodden.

Et festival wodt orgeniseerd deur et taelinstituut Huus van de Taol, de Drentse kollega’s van de Stellingwarver Schrieversronte.

Al in 2008 verscheen in een uniek saemenwarkingsverbaand mit de Historische Verieninge van Oosterwoolde bi’j de Stellingwarver Schrieversronte de routegids ‘De buurtschappen van Oosterwolde’. Die gids wodde doe uutgeven naor anleiding van et plaetsen van de dattien prachtige infermaosiebodden over de buurtschoppen van Oosterwoolde, die ok vandaege-de-dag nog altied in of bi’j die buurtschoppen te vienen binnen. In de gids wodt een route langs al die buurtschoppen beschreven, mar d’r wodt tussendeur ok alderhaande infermaosie geven over de gebieden daor de route langes gaot. De gids is Nederlaanstaelig, mar veur et Stellingwarfs is in et boekien veul ommedaenken.  De routegids wodde in een haandzem fermaot uutgeven, en past percies in de (jasse)buse! Veur de routegids was en is ok now nog altied flink belangstelling. De route langs de buurtschoppen van Oosterwoolde is 26 kilemeter.

Wolvege en Berkoop

Et doel is dat in de julimaond de Stellingwarver Schrieversronte twie ni’je routegidsen prissenteren zal. Veur een routegids rond en diels deur Wolvege zorgt kenner van dat gebied bi’j uutstek Geert Lantinga. Et gaot in dit geval om een unieke kuiertocht, die veural om Wolvege hennegaot. Lantinga het liekewel de tocht zo opbouwd dat, veur die dat wil, ok een route deur et dörp volgd woddden kan. Ok in disse routegids wodt arg veul interesaante infermaosie over et gebied en et laandschop daor de route langs lopt opneumen.

Datzelde gelt ok veur de taelfietstocht om Berkoop henne, veur die routegids zorgt Sietske Bloemhoff. Ok in die gids wodt zorgd veur flink wat aachtergrondinfermaosie, mar d’r zullen ok mit naeme biezunderheden angaonde de Stellingwarver tael in opneumen wodden.

Beide routegidsen zullen, krek as de eerste, Nederlaanstaelig wezen, mar veur et Stellingwarfs is d’r veul ommedaenken in de vorm van toepasselike verhaelen en gedichten. Et uutgeven van beide gidsen is financieel mit meugelik maekt deur de Rabobaank.

Et doel is dat in 2014 opni’j twie routegidsen uutgeven wodden: iene rond Appelsche, de ere langs de klokkestoelen van Stellingwarf.

Op 22 meert was in et gebouw van de Stellingwarver Schrieversronte de prissentaosie van et boek Bergveld lest veur uut eigen wark. Et eerste exemplaor van dit biezundere boek wodde uutrikt an Hans Gerritsen, hi’j is de ni’je veurzitter van de Nedersaksische streektaelorgenisaosie SONT. Et twiede en dadde exemplaor was veur Piet en Jan Harmens Bergveld, zeunen van de in 1966 overleden belangriekste schriever in et Stellingwarfs van veur de oprichting van de Stellingwarver Schrieversronte.

Bergveldkenner Henk Bloemhoff verzaemelde alle in et 320 bladzieden dikke boek opneumen wark van Hendrik Johannes Bergveld, en schreef de inleiding.

Schrieversronte-veurzitter Ype Dijkstra overhaandigde de eerste exemplaoren van et ni’je boek. Links Hans Gerritsen, rechts Jan Harmens en Piet Bergveld.

SONT-veurzitter Hans Gerritsen is vandaege-de-dag borgemeister van Haoksbargen. Eerder was hi’j dippeteerde van de perveensie Grunningen en zette him ok doe al in veur de veerdere erkenning van et Nedersaksisch. Ok op dit mement spant hi’j him, tegere mit o.e. dippeteerde Rein Munniksma van de perveensie Drenthe, opni’j in veur die zo belangrieke erkenning.  

Jan Harmens en Piet Bergveld toonden heur ommeraek inneumen mit et verschienen van ‘Bergveld lest veur uut eigen wark’. Op et schoelebod aachter heur is et reklamebiljet te zien t.b.v. ‘De oolde pook’, et eerste boek in et Stellingwarfs mit riempies en verhaelen van H.J. Bergveld. Et boek verscheen in 1971 en wodde uutgeven deur de Kulturele Raod van Oost-Stellingwarf. Een jaor laeter wodde de Stellingwarver Schrieversronte opricht.

Tiedens de inleiding van dr. Henk Bloemhoff op 22 meert angaonde et wark van Hendrik Johannes Bergveld las Femmie van Veen van Hooltpae gedichten en fragmenten van verhaelen uut et ni’je boek veur.

Bovenstaonde foto’s wodden maekt deur Lenus van der Broek.

Een uutvoeriger verslag over disse biezundere middag is te lezen op de webstee www.stellingwarfs.nl. Et ni’je boek telt 320 bladzieden, is veurzien van een had kaft en kost €19,50.