Redaktie

De Ovend van augustus is d’r!

door

Vanwegens de vekaansieperiode en vlak daornao de jaorlikse sutelaktie verscheen al in de dadde weke van juli et augustusnommer van et Stellingwarfs tiedschrift De Ovend. Ok dit keer bin daor weer prachtige artikels, verhaelen en ni’jgies in te lezen! Redakteur Jannes Westerhof zorgde opni’j veur een arg interessaante oflevering van ‘Oosterse kontakten’, dit keer had hi’j een gesprek mit schriever/dichter Derk Jan ten Hoopen uut Zuudwoolde, mar ofkomstig uut de Aachterhoek. Ten Hoopen is o.e. ok veurzitter van de raod van toezicht van SONT (Stichting Streektaal-organisatie in het Nederlsaksisch Taalgebied). Een ommeraek aorig stok schreef Westerhof butendat over et gesprek dat hi’j kotleden had mit de Haulerwiekster Jan Aalders in ‘Dit plak dot me wat’. In de ni’je Ovend is d’r ok ommedaenken veur keunst, daorveur zorgde Pieter Jonker uut Oosterwoolde. Hi’j schreef een slim lezensweerdig artikel over de van oorsprong uut Makkinge ofkomstige keunstener Aizo Betten, veurzien van ofbeeldings van prachtig wark van Betten. Krek as de eerste is ok de twiede oflevering van “Oolde middelieuwse karkhoffies in Stellingwarf’ slim interessaant. In disse oflevering schrift Rienk Klooster over een oold karkhoffien bi’j Peperge, Klooster dee daor kotleden veerder onderzuuk naor. Ommedaenken is d’r ok veur de foto’s van de winners van de fotowedstried veur schoelekiender. Alle winnende foto’s bin in De Ovend opneumen, mit daorbi’j de reden waoromme juust disse foto’s deur de jury (Marije Kuiper en Ruurd Jelle van der Leij) uutkeuzen binnen. Taelkundige Henk Bloemhoff het et in zien taelrebriek dit keer over ‘Westfaalse peren in oons westen…’, Frank Spijkers tekende een ni’je strip, en Lily Köhler en Klaas Boersma zorgden veur twie vermaekelike verhaelen.

Een abonnement op De Ovend kost € 19,00 in et jaor, et blad wodt je dan jaorliks zes keer toestuurd. De Ovend is ok te koop veur € 3,50 in de losse verkoop: bi’j de Schrieversronte in Berkoop en bi’j de boekhaandels Bruna in Oosterwoolde en The Readshop in Wolvege.

Twietaelighied in Bosnië

door

Van Sina van der Land uut Oosterwoolde kregen we verschillende foto’s van verkeersbodden daor twietaelighied in Bosnië op te zien is:

OLYMPUS DIGITAL CAMERA

 

OLYMPUS DIGITAL CAMERA

 

OLYMPUS DIGITAL CAMERA

OLYMPUS DIGITAL CAMERA

‘De bovenste tekst op de twie eerste bodden is in et Cyrillisch, de onderste in et ABC-alfabet,’ zo geft Sina an. Et gebruuk van et Cyrillisch in et eupenbaor komt in Bosnië nog beheurlik veul veur, dat maeken de foto’s van Sina wel dudelik. Veerder vertelt de van oorsprong uut Grunningen ofkomstige Oosterwooldse: ‘ Wat de tekst van de dadde foto betekent is me trouwens niet bekend. We gaon soms mit een jaor d’r tussen elk jaor naor Bosnië. Wi’j wonen naost meensken die uut Bosnië kommen. Oonze Bosnische buurman vreug as we een keer zin hadden om mit te gaon naor Bosnië. Dat was niet an dovemaansoren zegd! Et doel was dat we d’r ien keer naor toe gongen, mar we gaon d’r now al tien jaor naor henne. De laeste jaoren gaon we zels op pad om de regio te bekieken. Et is een prachtig laand mit geweldig aorige meensken. Jaoren leden, doe et laand nog kommunistisch was, was et verplicht dat de kiender op schoele de Cyrillische letters leerden. ‘

‘Persoonlik vien ik et lastig om veul zaeken, zoas de poletiek, in et laand te begriepen. Aj’ een kaorte naor je femilie versturen moej’ d’r goed omme daenken daj’ de juuste postzegel gebruken, want d’r bin drie soorten. In et noorden van Bosnië wonen veul Serven en Moslims; in de midden Serven en Kroaten. Gaoj’ de greens over bi’j Bihac dan hoej’ alliend mar je paspoort en zo zien te laoten, mar bi’j de greens van Dubica moej’ een pepier inleveren mit je gegevens dat deur de plaetselike pelisie invuld is. Daor staot o.e. op hoe lange aj’ d’r west binnen en waore.’

 

 

Honties van ‘Van disse kaante Kuunder’

door

Van Menno en Baukje Visser, now nog uut Buil, mar eerdaegs verhuzende naor Zweden, kregen we een aorig bericht over een biezundere naeme. Een biezundere Stellingwarver naeme veur heur eurasier kennelnaeme. De eurasier is een prachtige soort hond die wel wat weg het van een husky, mar dan o.e. een slaggien kleiner. Over de kennelnaeme Van disse kaante Kuunder zeggen Baukje en Menno: ‘Wi’j wonen in et NIET Friestaelige diel van Frieslaand, dat bin de Stellingwarven. Deur Friestaeligen wodt et gebied ok wel “oer-Tsjongers” nuumd en de hier wonende meeensken “van oer de Tsjonger”. De Tjonger (op zien Fries Tsjonger) is de greensrevier tussen Stellingwarf en de rest van Frieslaand. In et Stellingwarfs wodt de revier “De Kuunder” nuumd en daoromme numen wi’j oonze kennel Van disse kaante Kuunder.’

IMG_5747

Wie meer over de kennel van Menno en Baukje mit heur prachtige eurasiers weten én zien wil, dot d’r goed an om even te kieken op heur webstee www.vdkk.nl. Ok op You tube bin alderaorigste filmpies te zien mit heufdrollen veur de honties Van disse kaante Kuunder!

Tiedens Eupen Stal: Redmer Hoekstra en Sikko Mulder expeseren bi’j Schrieversronte

door

Vier weken lang expeseren Redmer Hoekstra en Sikko Mulder heur prachtige wark in de grote zael van et gebouw van de Stellingwarver Schrieversronte in Berkoop. Dat gebeurt allemaole in et kader van de jaorlikse tentoonstelling Eupen Stal. Ondertussen bin de eerste twie weken van Eupen Stal omme, en kan vaastesteld wodden dat vermoedelik deur et waarme weer et tal bezukers nogal tegenvaalt. Dat is slim jammer, want arg veul wark is echt de muuite weerd om te bekieken. Dat gelt zeker veur dat van Hoekstra en Mulder.

DSC_8056

Veul meensken bin slim onder de indrok van et biezundere wark van Redmer Hoekstra. Dat gelt niet alliend veur zien enorme fantesie, mar zeker ok veur zien beheersing van de tekentechniek. (Foto: Lenus van der Broek)

Redmer Hoekstra (1982) woont en warkt in Nieuw Balinge en zorgt mit zien tekenings veur een meer as prachtige bi’jdrege an Eupen Stal. In de katalogus vertelt hi’j o.e.: ‘Ik heb altijd van vervreemding en fantaseren gehouden, van dagdromen. Als kind had ik allemaal theorieën over hoe de wereld in elkaar zat en dit ontdekte ik op de kunstacademie opnieuw en kon het in mijn tekenen verwerken. … Wat is mijn werkelijkheid en in hoeverre bepaal ik zelf hoe deze er uit ziet? Zie ik het landschap in mijn hoofd? www.redmerhoekstra.nl

DSC_8055 (1)

Ok veur et wark van Sikko Mulder is veul wardering, zien verbeelding van et laandschop utert hi’j in knappe kompesisies mit een arg mooi gebruuk van kleuren. (Foto: Lenus van der Broek)

Sikko Mulder (1955) woont en warkt in Assen. In de as altied goed verzorgde Eupen Stal-katalegus zegt Mulder: ‘In mijn werk ga ik op zoek naar een letterlijke diepte, ontstaan door oude en nieuwe opgebrachte lagen met elkaar te laten versmelten.  Hierbij blijft de dialoog tussen abstracte en figuratieve vormen overeind.’ Deur verschillende technieken te gebruken komt mulder weer uut ‘bij het ritme van vormen uit het landschap. www.sikkomulder.nl

Deur et gebruuk van mit naeme beheurlik verschillende technieken én et gebruuk van kleur is de kombinaosie van et wark van Hoekstra en Mulder, toevallig of niet, een biezunder antrekkelike ‘bi’jkomstighied’ in et diel Eupen Stal bi’j de Stellingwarver Schrieversronte.

 

Line-up Stellingwarfpop 2013 bekend

door

Ok al is de zesde edisie van Stellingwarfpop 2013 pas op 9 november, et pergramme veur et popfestival zit now al vol. Kotleden gaf de zesde band him op veur de wedstried. Behalven de optredens van de dielnemers an die wedstried is d’r ok een optreden van Serge Epskamp, hi’j wun Stellingwarfpop in 2012. Wie an Stellingwarfpop mitdoen wil, moet op zien minst ien origineel lietien in et Stellingwarfs naor veuren brengen. Dat hoolt niet alliend in dat de tekst ni’j wezen moet, mar etzelde gelt ok veur de meziek. De laeste jaoren vaalt op dat de hieltied meer dielnemers meerdere lieties in de streektael bruken gaon, en daor is de orgenisaosie ommeraek wies mit.

De dielnemers van Stellingwarfpop 2013 bin:

The After Midlife Group

Shady Lane

Spirit of the dark

Rock-Revelation

Rosey Kills

‘k Wait nait

De deskundige jury, die uutmaeken zal welke Stellingwarver lieties et beste binnen, bestaot uut Robert van Dam, Klaas Ozinga en Peter Riksma. Veur de drie beste lieties bin geldpriezen beschikber steld. Stellingwarfpop wodt prissenteerd deur Fons Herder, hi’j is o.m. bekend as zanger van A Liquid Landscape.

Stellingwarfpop 2013 is op 9 november in et dörpshuus van Makkinge, et festival begint aovens om half achte. De toegang is ommenocht.