Op vri’jdagmiddag 2 november bin in et streektaelmeziekpergramme ‘Singeliers’ van de lekaole omroep Odrie zangeres Sietske Sietsma en gitarist Rob Zandgrond te gaaste. Tegere vormen zi’j Rosie Kills, dat op Stellingwarfpop de twiede pries wun mit et lietien Et maekt da’k gao. Et duo dat akoestische meziek heuren lat het dudelik aorighied an et gebruken van et Stellingwarfs, zo zullen ze in de live-uutzending heur ni’jste Stellingwarver lietien Volwassen heuren laoten. Bi’jkotten zullen de Stellingwarver lieties van Rosie Kills ok via StellingPlus te beluusteren wezen.
Redaktie
Fotowedstried veur Stellingwarver schoelekiender
Fotowedstried veur schoelekiender van et basisonderwies in Stellingwarf
Vanwegens et 40-jaorig bestaon van de Stellingwarver Schrieversronte gaf de stichting dit jaor o.e. et boek De dörpen van Stellingwarf in oolde beelden uut. De Schrieversronte wil liekewel ok graeg foto’s van alle dörpen verzaemelen die now maekt wodden kund. En dan niet deur volwassenen, mar deur kiender van et basisonderwies. Daoromme wodde in et kader van et vak Hiemkunde in et basisonderwies een fotowedtried veur schoelekiender uutschreven. De wedstried wodde tiedens de jaorlikse hiemkundemiddag veur et basisonderwies op oflopen 19 september ankondigd.
Vlak nao de haastvekaansie is via alle basisschoelen an de kiender vraogd om an de wedstried mit te doen deur een foto te maeken van et eigen dörp. Mit de foto moet dudelik maekt wodden wat d’r zo biezunder is an dat dörp. De kiender meugen in een kotte bi’jheurende tekst heur keuze toelochten.
Een deskundige jury (mit o.e. de bekende jonge fotografen Marije Kuiper en Ruurd Jelle van der Leij) zal bepaolen wie per dörp in drie leeftiedskattegorienen de beste beeldbepaolende foto maekt het. Per dörp wodt daornaost iene winnende foto anwezen. De winnende foto’s van alle leeftiedskattegorienen zullen in 2013 in een speciaole expesisie te zien wezen. Alle negenendattig winnende foto’s per dörp zullen publiceerd wodden. De uutslag van de fotowedstried wodt rond 1 meert 2013 bekendmaekt.
Mooie boekemark bi’j The Readshop in Wolvege
Mooie boekemark bi’j The Readshop in Wolvege
Schrieversronte-vri’jwilligers Koosje Hornstra en Koop Oosterloo brochten hiel wat boeken an de man (foto: Lenus van der Broek). Eerder op de dag verkochten Albertha Zwaagstra en Geert van der Meulen al een sleep boeken.
Behalven dat de mark een mooi verkooprisseltaot opleverde, was et ok nog es een gezellige gebeuren daor bi’j The Readshop in Wolvege! (Foto: Lenus van der Broek)
Zaoterdag 27 oktober was de twiede mark mit twiedehaans boeken die de Stellingwarver Schrieversronte dit jaor orgeniseerde. Krek as een maond eerder bi’j Bruna in Oosterwoolde et geval was, wodde ok disse mark weer een veural genoeglike aktiviteit mit een mooie opbrengst. Ok now kregen weer een hiele vracht boeken een ni’je eigener, en da’s gien wonder, want veul inbrengers hadden veur een prachtige verscheidenhied an boeken zorgd. Veul Stellingwarvers zullen daoromme beslist gien muuite hebben om dit extra lange weekaende mit de overgang van de zommertied naor die van de winter deur te kommen!
In december zullen de laeste boeken die veur de aktie inbrocht binnen te koop wezen in et ‘winkeltien’ van de Schrieversronte in Berkoop. Wanneer dat percies wezen zal wodt nog bekend maekt, o.e. op disse webstee!
De opbrengst van de marken is mit naeme bedoeld om alle jubileumaktiviteiten van de jaorige stichting uut Berkoop mit meugelik te maeken.
De Kiek van Jan op:
De Kiek van Jan op:
Van Jan Koops van Oosterwoolde kreeg StellingPlus zeuven prachtige foto’s binnen van poddestoelen. Kiek en geniet!
Birkenzwam
Grote oranje bekerzwam
Grote spoonzezwam
Keuningsmaantel
Rooiekoolzwam
Gewone zwevelkop
Donker haeze-oor
KIEK OP KIEKIES: ni’je rebriek
Kiek op Kiekies: ni’je rebriek
Op StellingPlus is d’r een ni’je rebriek bi’jkommen, dat is de rebriek Kiek op Kiekies. Veur de rebriek bin en wo’n verschillende fotografen vraogd om heur kiek op een bepaold onderdiel uut of van de Stellingwarven in foto’s uut te beelden. Daorbi’j kan et vanzels gaon om et laandschop, de dörpen, de netuur, mar et kan ok gaon om speciaole gebeurtenissen. De rebriek is begonnen mit et publiceren van foto’s van Lenus van der Broek uut Wolvege. Bi’jkotten zal ok wark van Jan Koops van Oosterwoolde plaetst wodden.
Zoj’ ok es foto’s op StellingPlus publiceren willen? Dan kan: neeem daorveur even kontakt op mit de Stellingwarver Schrieversronte in Berkoop. Ie kun daorveur mailen naor info@stellingwarfs.nl; bellen kan ok, dat kan naor 0516-451108 (even vraogen naor Sietske Bloemhoff).