Redaktie

296. ’t Oolde Kloniehuus

door

Henk Jager van De Blesse zag disse weke tussen Willemsoord en de Witte Peerden disse Stellingwarver naeme. ‘En hielemaole goed speld’, zo gaf Henk an. Wonderlik genoeg wodt et woord ‘oold’ wodt nog wel es as ‘old’ schreven. Mar hiere in Stienwiekerlaand dus niet! (Foto: Henk Jager, tekst: Sietske Bloemhoff)

295. Olde Meinenbos

door
De straote mit de naeme ‘Olde Meinenbos’ is te vienen in Willemsoord. Henk Jager, die tussen et wark deur vaeke even een rontien fietst, zag et straotnaemebod en maekte d’r disse foto van. Et is hiel mooi dat angeven is dat et hier om een veldnaeme gaot. En hiel mooi is vanzels ok dat ze in de buurgemiente Stienwiekerlaand oge veur zoks hebben! Foto: Henk Jager, tekst: Sietske Bloemhoff.

294. Spinnerskaampe

door
Disse foto maekte Henk Jager gister doe hi’j in de buurt van zien woonplak De Blesse een fietstochien maekte. Et laandgoed Spinnerskaampe ligt an de Spinnerslaene in et plakkien Paosloo in de gemiente Stienwiekerlaand.

293. Klaozinge

door
De buurtschop Klaozinge an de Rijweg tussen Oosterwoolde en De Fochtel ligt acht meter boven N.A.P. en is daormit de hoogste van alle buurtschoppen die om Oosterwoolde henne liggen. De naemen van twie boerderi’jen bin Groot- en Klein Klaozinge. De laeste wodde eertieds ok wel Sickenga nuumd. Eerder laggen ze meer in et veld an et vroegere Karkepad (van De Fochtel naor Oosterwoolde), laeter bin ze verplaetst naor de Lykweg, die now al weer sund jaor en dag de Rijweg hiet.
(Tekst en foto’s: Sietske Bloemhoff)

292. De Kaamp

door
An de noordkaante van de buurtschop Klaozinge bi’j Oosterwoolde liggen de Noorder Kaampen. De heide die daor lag wodde vaeks anduded mit Hiddekaamp. In 1856 kocht Hidde Wietzes de Jong uut Suameer de plaets Klein Klaozinge. Et verhael wil dat hi’j daor niet zo goed boerkte en dat de plaets daoromme weer te koop kwam. De zaeke wodde verkocht, mar hi’j hul zels een stok heide en daor zette hi’j een husien op. Hidde had een grote huusholing, en zien naozaten bouwden daor zels ok weer husies. Zo is daor deur de tied henne een buurtschoppien ontstaon, dat de Hiddekaamp of kotweg De Kaamp nuumd wodde.
(Diel van de tekst op et bod, foto: Sietske Bloemhoff)