Algemien

Donderdagaovend 26 meert wodde in et tillevisiepergramme Bynt van Omroep Frieslaand bekend dat Harmen Houtman de twiede pries wunnen het van een wedstried verhaelen schrieven. Die wedstried wodde uutschreven deur et Fries Dagblad, et Fryske Skriuwersboun en Omroep Frieslaand. Harmen wun de pries mit zien verhael ‘De verleuren zeune’, dat baseerd is op et gelieknaemige schilderi´je van Rembrandt. An de wedstried deden 54 meensken mit, de eerste pries was veur de jonge schriefster Janneke de Boer uut Weidum. De drie winnende verhaelen wo´n plaetst in et Fries Dagblad, et verhael van Harmen is daor ni´je weke zaoterdag in te lezen.

Ok Roely Bakker en Ate Mulder hadden een Stellingwarfs verhael instuurd, mar vullen niet in de priezen. Veur de wedstried was butendat een bi´jdrege in et Bildts instuurd. De orgenisaosie was slim tevreden over et tal dielnemers mar zee ok dat et toch meraokels mooi was dat d´r behalven Friese ok Stellingwarver en Bildtse verhaelen instuurd weren.

Vandaege wodde bekend dat schriever Harmen Houtman een pries wunnen het mit zien bi’jdrege an een gezaemelike schriefwedstried van et Fries Dagblad, Omroep Frieslaand en et Fryske Skriuwersboun. An de verhaelewedstried deden mar liefst 54 meensken mit, en et verhael ‘De verleuren zeune’ van Harmen heurt bi’j de beste drieje. Op donderdag 26 meert wodt in een livepergramme van Omroep Frieslaand bekend maekt wie de uuteindelike winner wodden is. (Laeter meer)

De Stellingwarver schrievers Sjoukje Oosterloo, Johan Veenstra, Christine Mulder en Roely Bakker (v.l.n.r.) weren present in Roden, krek as Schrieversrontedirekteur Sietske Bloemhoff. (Foto: Lenus v.d. Broek)

De Grunninger Chris Kiel het de Streektaelpries 2014 wunnen in de kattegerie poëzie en proza. Et Stellingwarver ‘Van schossel tot slingerpad’, een keunstboek mit poëzie en beeldende keunst van drie Stellingwarver dichters en drie keunsteners dat deur de Stellingwarver Schrieversronte uutgeven wodde, was ok nommeneerd. Dat gul ok veur o.e. et Drentse ‘Strunen in de taoltuun’ van Abel Darwinkel, en de Grunninger app ‘Lassa dut bosschoppen’, van Esther en Kirsten Plomp in de vertaeling van Riemke Bakker. Bert Hadders en de Nozems wunnen in de kattegerie CD/DVD.

Juryveurzitter Eric van Oosterhout lest et juryrappot veur. Naost him Roely Bakker en Christine Mulder; van heur en van Willem Jan Teijema bin gedichten te lezen in ‘Van schossel tot slingerpad’. (Foto: Lenus v.d. Broek) 

De jury nuumde ‘Van schossel tot slingerpad’ een arg mooi vormgeven boek, mit een biezunder goed op mekeer ofstemde inhoold van beeldende keunst en poëzie. Ok de veertig inbunnen boeken deur haandboekbienders wodde as positieve saemenwarking benuumd. ‘Een boek om vaeke in te kieken en van te genieten’, zo zee juryveurzitter Eric van Oosterhout. In et daegeliks leven is Van Oosterhout burgemeester van de gemiente Aa en Hunze; hi’j zet him mit riegelmaot arg in veur et behoold van de Nedersaksische streektaelen.

Uutdielbundel mit Stellingwarver bi’jdregen van Sjoukje Oosterloo en Johan Veenstra

Omreden et de tiende keer was dat de pries uutrikt wodde, wodde de bundel ‘De eerste pries’ uutdield aan alle bezukers van de middag. An die bundel konnen alle eerdere nommeneerden veur de pries mitdoen. In et boekien bin Stellingwarver bi’jdregen opneumen van Sjoukje Oosterloo en Johan Veenstra.

Een overvolle theaterzael in de Winsinghhof in Roden. (Foto: Lenus v.d. Broek)

De bekendmaeking van de pries was tiedens een goed verzorgd kultureel pergramme in theaterzael de Winsinghhof in Roden.

Al sund jaor en dag beschikt de Stellingwarver Schrieversronte over een interessaante haandbiebeltheek. Die biebeltheek is in et eerste plak bedoeld veur intern gebruuk, mar is ok te bezuken deur eren. Van de boeken die in de biebeltheek opneumen binnen is now een beschrievende index maekt, daorveur zorgde Schrieversronte-vri’jwilliger Jaap Elzenaar van De Hoeve. Die index is sund kot op www.stellingia.nl in te zien. In de haandbiebeltheek kuj’ nao ofspraoke terechte tiedens kantooruren van de Stellingwarver Schrieversronte. Et maeken van een ofspraoke kan tillefonisch (0516-451108) of via de mail info@stellingwarfs.nl.