Algemien

De suksesvolle voetbalploeg van de Stellingwarver Schrieversronte, mit veuran v.l.n.r: Albertha Zwaagstra, Johan de Vries, Leon de Jong, Peter de Vries, Renzo Bruggink en Akkie Zeilstra. Aachter v.l.n.r: Ate Bijstra, Abel Darwinkel, Jelke Nijboer, Freddie de Vries, Anne Henk Bloemhoff, Jan Boer, Henk Kroese en trener/coach Ype Dijkstra. (Foto: Lenus v.d. Broek)

Zaoterdag 17 meie hul de Stellingwarver Schrieversronte een Stellingwarver Dag in Buil. Mit prachtig weer wodde morgens nao de koffie in dörpshuus De Tille begonnen mit een huus-an-huus ledewinaktie. Die aktie leverde de Schrieversronte mar liefst 26 ni’je leden op, een risseltaot daor de orgeniserende warkgroep Publiciteit geweldig wies mit is. Middags was d’r een uterst sportieve voetbalwedstried van een speciaol Schrieversronteteam tegen een team van Trinitas. De slim spannende wedstried wodde mit 3-2 wunnen deur et SSR-team, dat coached wodde deur Schrieversronte-veurzitter Ype Dijkstra. Scheidsrechter was kultuurwethoolder Sierd de Boer van Oost-Stellingwarf, die liekewel ofhaoken moest omreden hi’j veul last had van een anval van ischias. Gelokkig kon de ploeg van Buil veur een vervangende scheidsrechter zorgen. D’r bleek in et SSR-team geweldig veul telent te zitten, dat de eerste peer doelpunten wodden al rap zet. Aachterin wodde et doelgebied goed verdedigd deur o.e. Abel Darwinkel, die vaeks mit flinke uuthaelen de balle de ere kaante weer opschopte. In de spits van et SSR-team leupen de haddraevers De Vries van Hooltpae heur et vuur uut de sloffen en mit goed risseltaot. Liekewel, ok de over et hiele veld henneweer vliegende Albertha Zwaagstra maekte et mennig speulder van de ere ploeg lastig. Ooldgedienden Jan Boer, Ate Bijstra en Henk Kroese hullen ok biezunder goed staand. Ok Akkie Zeilstra wus de balle goed veur de voeten van de tegenstaander weg te haelen. Et doel wodde ombeurten knap verdedigd deur Jelke Nijboer en Anne Henk Bloemhoff. In de twiede helte kwam Trinitas liekewel goed weeromme. An et aende van de wedstried was et nog even knap spannend as de SSR-ploeg de veurstaand beholen kon. D’r gong dan ok een zocht van verlochting over et veld doe et laeste fluitien van de scheidsrechter klonk… Naotieds wodde mit mekeer gezellig naopraot over disse biezundere en veural kammeraodschoppelike voetbalwedstried.

Prachtige ienakter van ‘Nut en genoegen’

‘Nut en genoegen’ (foto: Lenus v.d. Broek)

An et aende van de middag vertoonde Jan de Vries van Wolvege in De Tille een sfeervolle film van de CAV in Berkoop uut de vuuftiger jaoren en een film van een Sterrit uut 1941. Aovens speulde de tenielploeg ‘Nut en Genoegen’ van Buil mit veul vaosie de hilarische ienakter ‘De kaaste van Oma’ in et Stellingwarfs.

Stellingwarfs Volkslied

Elser Smart (foto: Lenus v.d. Broek)

Daornao zong et smatlappekoor ‘Elser Smat’ o.l.v. Jannie Bakker op fleurige wieze een tal Stellingwarver lieties, waoronder et Stellingwarfs Volkslied, en uteraord ok wat echte smatlappen. Prachtig uutvoerd wodde et lietien ‘De Bakkiesman’, waorbi’j koorlid Kees Koopstra mit ‘de bak op ‘e rogge’ de zael et vroegere oolde ‘vak van verkoper langs de deuren’, zien leut.

Stellingwarver verhaelen

Jimmy Visser en Kees Koopstra lazzen beide een prachtig verhael veur uut eigen wark (foto’s Lenus v.d. Broek)

Naodat de Stellingwarver schrievers Jimmy Visser en Kees Koopstra an et aende van de aovend elk uut eigen wark veurlezen hadden was et de beurt an de fermaosie Square Melons, een jonge populaire band uut Buil. Ok veur heur was een mooie flutte fans opdaegen kommen.

Square Melons zorgde veur een prima optreden in de naacht van de Stellingwarver Dag! (foto: Lenus v.d. Broek)

De warkgroep Publiciteit van de Schrieversronte bekikt eerdaegs in welk dörp in 2015 een Stellingwarver Dag holen wodden zal. Dat die d’r kommen gaot is nao disse mooie eerste keer in Buil wel dudelik.

De superspannende, mar veural ommeraek sportieve voetbalwedstried die op 17 meie op et prachtige sportveld van Buil holen is, is wunnen deur et dreamteam van de Schrieversronte mit 3-2. Op de foto van Lenus v.d. Broek beide teams vlak nao de wedstried, mit hielemaole rechts SSR-trener/coach Ype Dijkstra. Laeter vandaege zien jim op StellingPlus veul meer foto’s van disse wedstried van et jaor

Scheidsrechter was kultuurwethoolder Sierd de Boer van Oos-Stellingwarf, mar spietig genoeg mos hi’j deur ischias al in et begin van de wedstried et veld verlaoten. Gelokkig hadde Buil een invalende scheidsrechter die de taek overnemen kon.

Henk Kroese van Langedieke wet de balle goed te raeken!

Dat gelt, zoas jim zien, ok veur Jelke Nijboer van Oosterwoolde. Mar as et te bar wodt is daor altied hadloopster Albertha Zwaagstra uut Oosterwoolde, die gien balle ontkomt

Topspits Peter de Vries van Hooltpae speulde een grote rolle angaonde de overwinning!

Datzelde kan zegd wodden van de topverdediger Abel Darwinkel uut Appelsche

Veul fans van et SSR-dreamteam maekten de wedstried mit

Freddie de Vries het de balle mooi ‘in hanen’; zien bruur hoolt et in de gaten. Op de aachtergrond nog zoe’n SSR-topvoetballer: Ate Bijstra van Makkinge

D’r gong ok wel es iene onderuut, mar die woddde mitde natte spoonze bi’jhulpen deur verzorgster Anneke Koopstra.

Nog zoe’n starke voetballer die mit veur de overwinning zorgde, Jan Boer van Oosterwoolde. Trener/coach Ype Dijkstra hoolt et oge goed op zien team en raosde now en dan deurdochte speltips naor zien mannen

Et hiele SSR-team, mit reservespeulders en de trener/coach

Mit een posien verschient bi’j Bornmeer, de uutgeveri’je van Steven Sterk in Gorrediek, een dieltien van de Nijntje-serie van Dick Bruna in et Stellingwarfs. In al hiel wat streektaelen is et boekien onderhaand verschenen en eerdaegs dus ok in et Stellingwarfs. Et boekien, dat uteraord ok bi’j de Stellingwarver Schrieversronte in de verkoop kommen zal, is vertaeld deur Johan Veenstra.

Sund 1 meie het de Stichting Stellingwarver Schrieversronte (SSR) een ni’j logo. Veur et logo zorgde vormgever Bauke Visser Koenders van Haulerwiek. In et ni’je logo bin de griffioenen van Oost- en West-Stellingwarf te zien, zoas dat op ongeveer dezelde wieze et geval is bi’j de Stellingwarver vlagge. De grune kleur geft et laandschoppelike van et gebied an, de rooie kleur van de letters is de Saksische kleur van ooldsher. Dat Stellingwarf ok et laand van De Lende en De Kuunder is wodt weergeven deur twie blauwe lijnen. De Stichting Stellingwarver Schrieversronte (SSR) zit, ok in warkelikhied, mooi in de midden van et gebied.

Ok dit seizoen staot de Stellingwarver Schrieversronte vanzels weer, krek as de veurgaonde jaoren, mit een kraom op de altied uterst gezellige streekmark van Berkoop. Die prachtige mark, mit alle keren een geweldig anbod van alderhaande produkten uut de streek, is op elke eerste zaoterdag van de maond, van meie t/m oktober. De mark is van morgens tien ure tot middags viere. Meer as de muuite weerd om es een keertien naor toe te gaon. Enne… neem een volle beurs en lege tasse mit!!