Beeld en geluud

• 

V.l.n.r: Marco Reekers, Dyno Hedges, Thomas Rovers, Sietske Bloemhoff, Evert Pultrum, Dirk Nijk en Emma Winter.  Foto: Lenus v.d. Broek)

Geweldig veul lof en komplementen weren d’r donderdagaovend veur de maekers en speulders van de ni’je Stellingwarver film ‘Daor klept de klokke weer’. Veur de première d’r van was ommeraek veul belangstelling, zodat Filmhuus Slieker in Liwwadden ok heur twiede filmzael beschikber stellen mos. De aovend wodde orgeniseerd deur et Europees buro veur kleine taelen (EBLT) i.s.m. de Stellingwarver Schrieversronte op ’e ’Dag van de Memmetael’.

Veul speulders en figuraanten van de film weren naor Liwwadden kommen om daor veur et eerst ’heur’ film te zien. De spanning was vanzels groot, op dit mement hadden ze allemaole even waachten moeten. De opnaemen wodden in de zommer van 2017 maekt, mar deur wat tegenslag nao die tied was de film laeter klaor as dat eerst et doel was.  

Skriptschriever en regie

Spanning was d’r vanzels ok bi’j skriptschriever en regisseur Thomas Rovers uut Grunningen. Ok al was hi’j tot op et laeste betrokken bi’j de laeste punties op de i; veur him was et uteraord slim spannend hoe op zien eerste grote film reageerd wodden zol. Spanning was d’r ok bi’j zien regie-assistent Marco Reeker, filmmeziekmaeker Dyno Hedges en Sietske Bloemhoff die indertied et initiatief veur de film nam en veur de perduktie zorgde. Al gauw was dudelik dat d’r niet alliend veul lof en wardering was veur alle akteurs in de film, niet minder was die d’r veur Rovers en zien filmploeg. In alle opzichten professioneel, dat was wat kenners d’r van zeden, en daor was ieder vanzels slim mit inneumen.

Filmlied Stellingië

Arg veul wardering was d’r ok veur et filmlied ‘Stellingië’, dat an et aende van de film te heuren is. Heufdrollespeulder Emma Winter zingt et lied op indrokwekkende wieze; de tekst wodde schreven deur Henk Bloemhoff, de meziek is van Robert Lanting. Et doel is om et lied ok nog appat van de film uut te geven.

Ni’je plannen      

Van verschillende kaanten wodde d’r donderdagaovend vraogd of d’r bi’j de Stellingwarver Schrieversronte ni’je filmplannen binnen. Thomas Rovers en Sietske Bloemhoff hebben weten laoten dat die d’r inderdaod binnen. Et gaot liekewel dan om fiktie: et doel is dat een tal oorspronkelike Stellingwarver volksverhaelen verfilmd wodden zullen, mar dan daelezet in de tied van now. ‘Mar die plannen bin nog in een beginfase,’ neffens Rovers en Bloemhoff. ‘We bin eerst nog even drok mit disse film van vanaovend. D’r bin al verschillende anvraogen, ok al vanuut Drenthe, veur et vertonen van ‘Daor klept de klokke weer’. De eerste keer dat de film weer dri’jd wodden zal is op 22 meert, dat wodt mitien een soort van reünie veur alle meensken die op wat veur meniere oons hulpen hebben bi’j et maeken van de film.’

De filmliefhebbers hebben d’r even op waachten moeten, mar eindelik is et dan zoveer: op de donderdagaovend 21 feberwaori is de première van de eerste Stellingwarver speulfilm ’Daor klept de klokke weer’! Die première mos deur omstaandigheden een peer keer uutsteld wodden. De feestelike gebeurtenis is in Filmhuus Slieker in Liwwadden. Dat et in die bekende lekaosie wezen zal, komt omreden et op 21 feberwaori de dag van de Memmetael is. Et EBLT (Europees Buro veur kleine taelen), daor de Stellingwarver Schrieversronte bi’j ansleuten is, orgeniseert alle jaoren op die dag een filmaktiviteit.

‘Daor klept de klokke weer’ is baseerd op et gelieknaemige boek van H. Hoogeveen dat in 1959 verschenen is. Et vertelt et verhael van de periode dat Stellingwarf nao veul striederi’je zien vri’jhied veurgoed kwietraekte. Et skript veur de film wodde schreven deur Thomas Rovers uut Grunningen. De film is een produktie van de Stellingwarver Schrieversronte, die daorveur extra financieel ondersteund wodde deur de perveensie Frieslaand, et Fonds Ooststellingwerf en Kring van Bercoop. Daornaost stelden orgenisaosies, et bedriefsleven en personen belangeloos (netuur)terreinen en materiaolen beschikber. De film, die veural ok bedoeld is veur et basis- en vervolgonderwies, duurt mit mekeer een goed half ure.

Op donderdagaovend 22 meert zal de film, mit naeme veur alle mitwarkers, dri’jd wodden in ’t Buurthuus in Noordwoolde.

V.l.n.r: Evert Pultrum, Thomas Rovers, Emma Winter en Lute Wedekind

Akteurs, figuraanten en techniek

An de film doen flink wat speulders en figuraanten mit. Die meldeden heur indertied nao een oproep in de kraanten daorveur an. De heufdrollen wo’n speuld deur Dirk Nijk (Wolvege), Lute Evert Wedekind (Berkoop), Emma Winter (Wolvege) – zi’j zingt ok et filmlied ‘Stellingië – en Evert Pultrum (Wolvege). Daornaost doen d’r uut tal van Stellingwarver dörpen figuraanten an, mar bi’jglieks ok een inhuurde riddersploeg uut Kimswerd. Regisseur is Thomas Rovers uut Grunningen, et kamerawark wodt verzorgd deur David Koster (filmakedemie Amsterdam), eerste regieassistent is Marco Reekers, ok uut Amsterdam. De geluudsopnaemen bin maekt deur Serge Epskamp van Zaandhuzen. Veur de meziek zorgde Dyno Hedges uut Amstelveen. De middelieuwse kleren bin ontwurpen en maekt deur Henrieke Kruise uut Rotterdam, zi’j zorgde ok veur een tal illestraosies die in de film bruukt wodden. Veur de logistiek en technische ondersteuning zorgde een groep van zes personen o.l.v. Hendrik Betten van Else. Kiena Bouwer van De Haule zorgde mit twie ere vrouwluden veur et grimeerwark.

Opnaemen bi’j de karke van Berkoop, rechts Dirk Nijk

Opnaemen op ’e Delleboersterheide

Orvelte, kesteel, Delleboeren Alle scenes bin in de zommer van 2017 in acht daegen tied opneumen. Tegere mit Hendrik Betten het Thomas Rovers de lekaosies uutzocht. Twie daegen is d’r in et museumdörp Orvelte filmd, omreden daor een boerderi’je, de Bruntingerhof, staot die nog uut de 16^e ieuw stamt. Butendat is d’r een middelieuwse sfeer in et dörp zels. Veerder bin alle opnaemen in de Stellingwarven maekt. Zo is d’r filmd bi’j de karke van Berkoop, in et kesteel Old Stoutenburgh in Blesdieke, op ’e Delleboersterheide, in de Kaele Dunen, et Puntersbossien en bi’j de klokkestoel van Ni’jberkoop