Stellingwarfs in et ‘wild’

As nommer 128 in disse serie komt Broggepop veur, een meziekfestival op ’e Hoeve. Blesdieke wil vanzels niks minder wezen. Daor hebben ze Pollepop. Et woord polle komt vaeker in disse serie veur zoas de straotnaeme De Polle in Wolvege (109), Meulepolle, de naeme van een huus in Hooltpae (75) en… et kefé van Blesdieke hiet De Polle (98). Dan is de cirkel weer rond. Bi’j et woord polle zuwwe hier vermoedelik daenken moeten an een kleine boerderi’je of een flink stok laand. Veurbeeldzin: Et is een huus mit een beste polle laand. (Foto en tekst: Johan Veenstra)

An de Hamersweg in Hooltpae het Alfred Plat een bouwbedrief. Op et prachtige toegangshekke staot tussen de ofbeelding van twie haemers: De Platte. (Foto’s en tekst: Johan Veenstra)

De zesde naeme op et infermaosiebod van It Fryske Gea is Botkerisservaot. Dit risservaot het de naeme kregen van de Friese Jacob Botke (1877-1939). Botke was iene van de oprichters van It Fryske Gea in 1930. (Foto en tekst: Henk Jager)

De vuufde naeme op et topografische kaortien dat op infermaosiebod Catspoolder in de Lendevallei bi’j Wolvege plaetst is, is et Oolde Stroomdal. Die naeme dudet vanzels op et dal van de oolde loop van De Lende. In de Lendevallei wo’n of bin stokken van die oolde loop weer in ere hersteld, zoas bi’j Hooltpae. (Foto: Henk Jager, tekst: Sietske Bloemhoff)

De Helomapoolder is een ere Stellingwarver naeme die op iene van de infermaosiebodden van It Fryske Gea in de Lendevallei bi’j Wolvege staot. Et is arg mooi dat disse perveensiaole netuurklup bewust keuzen het veur et bruken van naemen in de tael van de streek. Zoas et vanzels ok de naeme De Lende bruukt, mar die naeme is liekewel, krek as alle ere Stellingwarver ‘waeternaemen’ sund 15 meert 2006 de officiële, deur de perveensie vaaststelde, naeme. Zoas dat ok gelt veur bi’jglieks De Kuunder en de Opsterlaanse Kompagnonsvaort.

(Foto: Henk Jager, tekst: Sietske Bloemhoff)