Jong van hatte mit et Stellingwarfs de toekomst in
Vandaege (02-11-2022) kwam Hans Salverda in Hooltpae en zag daj’ daor bi’j schoele ‘De Striepe’ Kalm an! doen moeten. En doej’ dat niet, dan kikt een knipperend rood mannegien je niet al te vrundelik an… Mooi dat disse elektrische bodden je ok in et Stellingwarfs waorschouwen kunnen!
Eerder in disse serie leuten we Stellingwarver naemen zien die in Willemsoord op een an de Paosloriegel staond bod van fietskneuppunten staon. Henk Jager van De Blesse zag dat en stuurde de foto’s d’r van in. Bi’j ’t Tres Haarms weten we liekewel an now toe niet wat hier mit ‘Tres’ bedoeld wodt, mar ‘Haarms’ moet haost wel duden op een Stellingwarver manludenaeme. Vermoedelik gaot et om een oolde veldnaeme, en datzelde zal ok gellen veur de naeme ’t Jurries dat d’r even onder nuumd wodt. Misschien bin d’r kiekers die oons angeven kunnen wat mit beide naemen bedoeld wodt!
‘Veur niks gaot de zunne op’ is zoe’n mooie Stellingwarver uutdrokking. Mar VEUR NIKS bin ok disse appels en peren argens in Doldersum. Hans Salverda zag dit en zal grif ok een stok of wat van beide mit naor huus toe neumen hebben!
De Stellingwarver dichter Willem Jan Teijema, die van oorsprong van Donkerbroek komt, woont al sund jaor en dag in et mooie plak Haelen in Limburg. Et kan haost niet eers as de schriefwieze daorvan is anpast naor die van de tael van Willem Jan, zol ’t niet?
