Jong van hatte mit et Stellingwarfs de toekomst in
Doe ’k in juli tegere mit kammeraod Douwe deur Vinkege fietste, zag ik dit bod mit et woord Boelderi’je d’r op staon. Et is ongetwiefeld Stellingwarfs. Mar wat is et? Et woord opzuken in et Stellingwarfs Woordeboek koj’ gien tree wieder mit, want et staot d’r niet in. Mar vlakbi’j dit bod ligt neffens mi’j een jeu de boulesbaene. Numen ze zoks in Vinkege lichtkaans een boelderi’je? Dat zol mooi bedocht wezen! (Foto en tekst: Johan Veenstra)
In een veengreidepoolder bi’j Gieteren/Klooster hej’ ok de waeters De Stouwe en Noordse Stouwe, zo geft Henk Jager an. Et Stellingwarver woord ‘stouwen’ betekent tegenholen, mar kan ok drokken betekenen. De naeme zal hier grif te maeken hebben mit de funktie d’r van: et zorgen kunnen veur et juuste streefpeil dat veur de Weerribben en de Wieden gelt.
Bi’j nommer 411 zaggen jim al de eerste Stellingwarver naeme die in et fietsnetwark op et fietskneuppunt Paasloregel nuumd wodt. Et zal jim niet verbaozen dat Wieden nommer 412 wodt. (Foto en gegevens: Henk Jager)
An de Paasloregel in Willemsoord staot dit bod van et fietskneuppunten Paasloregel. Op et bod staot et fietsnetwark Weerribben Wieden mit nogal wat Stellingwarver waeternaemen, zoas ok weer de Reune, al gaot et hier om een er stroompien as dat in nommer 403 in disse serie nuumd wodt. Op verschillende plakken wodt de anduding ‘reune’ veur waeterloop of ere stroompies ok as naeme bruukt. In disse serie sommen we die niet allemaole appat op. Vanzels bin de beide naemen van et fietsnetwark ok Stellingwarfs, en plaetsen hier as eerste Weerribben. (Foto en gegevens: Henk Jager)
In Gieteren wodt op een bod verwezen naor een oolde volksvertelling over Volken en Niesje op een zoemerdag in 1810. Die beidend weren hatstikke gek op mekeer! Now, mooier kan et vanzels niet!
(Foto en tekst: Johan Veenstra)