Jong van hatte mit et Stellingwarfs de toekomst in
Aj’ Berkoop inrieden koj’ altied bi’j een VVV-bod langes mit een gedichien van Lamkje Hof-de Boer d’r op. We hebben d’r in disse serie tot now an toe al viere opneumen. De nommers 139, 149, 164 en 168. Hier is d’r nog iene. De vuufde in de riegel! (Foto en tekst: Johan Veenstra)
Koepeinse is de Stellingwarver naeme veur een nog redelik ni’je straote (van 2018) in Bantege. Et gaot om een oolde veldnaeme van een, veerder westelik legen, rietperceel dat de vorm van een koepeinze het. Aorig is dat It Fryske Gea de naeme De Koepeinze bovendat as administratieve naeme bruukt veur et hiele gebied daor et rietperceel in ligt. Ok al ligt Bantege an de ere kaante van De Kuunder, et Stellingwarfs is daor now niet bepaold vremd. Vroeger wodde d’r ja ommeraek Stellingwarfs praot. Jaoren leden praotte ik nog mit oolde Bantegester rietsnieders. Zi’j zeden wel ‘zie’ i.p.v. ‘zi’j’, mar veerder verschilde heur Stellingwarfs kwaolik mit dat van oons. Et het trouwens, wat Wikipedia wel beweert, niks mit de tael van Gieterse verveenders te maeken die et daor hennebrocht hebben zollen. Et Stellingwarfs wodde daor, krek as ok in Echtenerbrogge, van ooldsher bruukt. (Foto en tekst: Henk Jager)
In de buurtschop De Polle, niet veer van Blesdieke, ligt disse minicamping An ’t Pad. Dit bod van et mooie kampeerplak is an een ziedpad van et Kloniepad te vienen. De minicamping zels ligt an et Kloniepad. (Foto en gegevens: Henk Jager)
De Reune is de naeme van een bekien dat in De Lende uutkomt. De naeme d’r van is bruukt op et uuthangbottien van Hof aan de Reune, en dat is een prachtige bezukerstuun in Willemsoord. Et woord ‘reune’ wodde eertieds bruukt veur waeterlopen en ere kleine stroompies. Et wodde ok optekend in Steggerde t.b.v. et Stellingwarfs Woordeboek. In dit gebied en et angreenzende Stienwiekerlaand wodden meerdere stroompies ‘reune’ nuumd, mar vandaege-de-dag is et alliend nog bekend as de naeme van et hier bedoelde bekien. Hans Salverda uut Zorgvlied fietste langs de tuun, zag et bod en maekte d’r disse foto van.
Vandaege, 3 september 2022, wodde in et Blesdiekiger kesteel Olt Stoutenburght (Markeweg 37) een tentoonstelling eupend mit wark van de Stellingwarver keunstener Rinny Siemonsma (1940 – 1985). De tentoonstelling dreegt de mooie naeme De iene is de aandere niet, een uutspraoke die de keunstener nogal es bruukte. De tentoonstelling duurt tot en mit zundag 11 september, en is middags eupen van iene tot vuuf ure. De intree is mar € 3,50, en dan kriej’ ok nog es een bakkien thee of koffie ommenocht! (Foto en gegevens: Hans Salverda)