Tael buten deure

Henk Jager zag, doe hi’j deur Steggerde kwam, de naeme d’ oolde smidse op een dikke stien. Et zal grif zo wezen dat op dit plak eerder een smidse, of zoas we ok wel zeggen, smederi’je zeten het.

Kampeerplak De Slamme kuj’ vienen in Iesselham. Of, Iesselhamme, zoas bewoners van et pak et ok wel numen. En daor komt ok de naeme Slamme van: et is een saemenvoeging van de letters van de plaknaeme. Aj’ de naeme vlogge zeggen en ie laoten daorbi’j wat etters vot dan kriej’ Slamme. Dat vertelde Alko Bijkerk an Hans Salverda doe hi’j disse foto maekte veur ‘Stellingwarfs in ’t wild’. Mar d’r staot meer Stellingwarfs op et mooie bod: Kamperen bij de Rietboer krek dat is ’t.

Bi’j nommer 387 nuumden we et al even. Et gebruuk van de û om de uu-klaank mit an te geven. Soms doen meensken heur best om extra dudelik an te geven dat ze doelen op die klaank van de dubbele uu. Da’s dus nargens neudig veur, starker: et wodt d’r alliend mar ondudelik van… Ok bi’j de straotnaeme Bûterheideveld in Makkinge is dit et geval. As d’r gewoon Buterheideveld staon zol, zol gien meens dat uutspreken gaon as Butterheideveld of alderdeegst Boeterheideveld.
De mooie oolde naeme van de weg tussen Makkinge en Oosterwoolde geft an dat hier vroeger (veul) heide lag. (Foto’s en tekst: Sietske Bloemhoff)

Dit mooie en slim waore gezegde zag ik een jaormennig leden tiedens een tentoonstelling in et smoeke karkien van Der Izzerd. (Foto en tekst: Johan Veenstra)

Et is haost zoveer: et Dicky Woodstock Popfestival. Dat is in et eerste weekaende van augustus, zag Hans Salverda bi’j Wolvege en maekte d’r disse foto van. Now schrieven we in et Stellingwarfs weekaende, mar de bedoeling mit wiekend is vanzels hatstikke goed!