Tael buten deure

d’ Oolde Slaachteri’je is de naeme van een huus in Noordwoolde-Zuud. D’r het in vroeger daegen grif een slaachteri’je in dit huus west. Dat kan haost niet aanders, zoj’ zo zeggen. (Foto’s en tekst: Johan Veenstra)

Vandaege 13 meie 2020 is Schrieversrontemitwarkster Anneke Steenbeek 50 jaor wodden. Dat is veur iederiene die dit bod veur heur huus staon zicht wel dudelik! Dat Anneke heur inzet veur et Stellingwarfs, daor zal ok gieniene an twiefelen… En dat gelt wis en zeker ok veur de maekers van dit prachtige bod! Anneke, ok zo nog even: VAN HATTE FIELSETEERD!!

Bi’j et netuurbelevingspunt Johannes Visser zien plakkien in Ni’jhooltpae staot een Dierezuker. Van alderhaande dieren die daor in de omgeving veurkommen, kuj’ op dit bod van alles geweerwodden. (Foto en tekst: Johan Veenstra)

Kuunderhof is een straotnaeme in Oosterwoolde. An disse straote staot een appattementekompleks dat dezelde naeme het. (Foto en tekst: Johan Veenstra)

De Lende is niet zomar een mooi reviertien. In vroeger daegen was daor et zwembad van Ni’jhooltpae. D’r stonnen zels badhokkies. Johannes Visser was daor de badmeester. Johannes was een held! Hi’j reddede in december 1925 zes meensken uut een wak en kreeg daor een getuugschrift en een bedrag van honderd gulden veur van et Carnegie Heldefoons. Op et plak van et oolde zwembad is now een netuurbelevingspunt, dat in meie 2019 eupend wodde deur burgemeester André van de Nadort van West-Stellingwarf. Et is hiel toepasselik dat et de naeme Johannes Visser zien plakkien kregen het! (Foto en tekst: Johan Veenstra)