Tael buten deure
214. eupen Keuken
Omroep Odrie kent ok een keuken, waor de lekkerste koffie zet wodden kan. En ieder kan daor gebruuk van maeken; niet alliend de mitwarkers, mar ok de studiogaasten. Dat mit eupen Keuken is niks tevule zegd!
213. Prissentaosieruumte
De ruumte bi’j Odrie waor de opnaemen van de meerste pergrammes maekt wodden hiet de Prissentaosieruumte. Odrie dot veul an et Stellingwarfs binnen heur pergrammes, de omroep kent alderdeegst een Stellingwarfstaelig streekmeziekpergramme. Ok dat pergramme het een Stellingwarver naeme: Singeliers. En dat woord staot dan weer veur eigenaorig, toevallig, biezunder, wonderlik… En dat is et ok! Luuster mar es: et pergramme wodt iedere vri’jdagmiddag tussen vuuf en zes ure uutzunnen, wiels op ‘e zundagmorgen tussen tienen en elven de herhaeling is.
212. Ssssssttt………
In Oosterwoolde staot een mooie streekkulturele boerderi’je. Daor vien ie behalven et aktiviteitencentrum ‘De Miente’ (zie nr. 22 van ‘Stellingwarfs in ’t wild’) ok de lekaole omroep Odrie. Disse omroep het veul ommedaenken veur et Stellingwarfs, en niet alliend in de uutzendings. Ok de ruumten die bruukt wodden hebben Stellingwarver naemen, zoas de opnaemeruumte. Boven de deur daorvan hangt de waorschouwing: ‘Sssssssttt……… wi’j bin in de logt’. Spietig is dat hier van de ‘ch’ in et woord locht een ‘g’ bruukt is: soms willen meensken de tael nog mooier maeken dan die al is…! Nargens veur neudig: daor waor et Nederlaans een ‘ch’ bruukt dot et Stellingwarfs dat ok!
211. De Pampel
De Pampel is de naeme van een huus an de Pieter Stoevezaandweg in Ni’jtriene. Een pampel of paampel is de naeme van een waeterplaante die in dat gebied een protte veurkomt. Nederlaans: egelskop of gele plomp. Et huus heurt bi’j et karkien dat d’r tegenover staot.