Tael buten deure

• 

• 

De Pampel is de naeme van een huus an de Pieter Stoevezaandweg in Ni’jtriene. Een pampel of paampel is de naeme van een waeterplaante die in dat gebied een protte veurkomt. Nederlaans: egelskop of gele plomp. Et huus heurt bi’j et karkien dat d’r tegenover staot.

• 

Ok voegelnaemen bin bruukt veur bepaolde ruumten in Woonzorgcentrum Lindestede in Wolvege; Annie Dedden maekte daor disse foto van de kiewiet.

• 

‘Striepe’ is een mooi Stellingwarfs woord veur een lange stroke laand. De naemen zaggen we eerder in de serie Stellingwarfs in ’t ‘wild’. Zo is et de naeme van de basisschoele van Hooltpae, en ok van een straote in Oosterwoolde. De foto in Woonzorgcentrum LindeStede in Wolvege wodde maekt deur Annie Dedden.

• 

‘Et was soms wat lastig om de bodden mit naemen goed op ‘e foto te kriegen’ vertelde Annie Dedden, die veur de serie foto’s va Stellingwarver naemen in Woonzorgcentrum Lindestede zorgde. ‘Et glom soms zo, dat et me niet altied goed lokte. De naeme ’t Hekkien is daoromme niet hielemaole scharp op ‘e foto kommen!’

• 

In Woonzorgcentrum LindeStede in Wolvege bruken ze veul Stellingwarver naemen veur verschillende ruumten in et gebouw. Dat is vanzels hiel mooi, mar jammer is et dat daor niet altied de juuste zorg an besteded is. Want zo is et Nederlaanse woord ‘schoof’ in et Stellingwarfs ‘vertaeld’ naor ‘scheuf’. En dat woord bestaot in dit verbaand hielemaole niet! Een ‘schoof’ wodt in et Stellingwarfs een ‘gaaste’ nuumd wodt. Dat is een verzaemeling van bi’jglieks zes tot acht bossen stro die tegen mekeer op et laand anzet wodden, zodat et stro bi’j een bujje regen niet al te nat wodt. En zoe’n bos wodt dan meerstal een ‘garve’ nuumd. Wie wet passen ze daor in Lindestede et woord nog es an, want is ‘gaaste’ ok niet veul mooier om in dat woonvrundelike centrum te bruken?