‘Dit is iene van de huzen die bi’j Riemsoord in Appesche heurt,’ vertelt Akkie Zeilstra van Raevenswoold. ‘Ik hadde et al es vaeker zien en hadde de naeme nog de hieltied niet op ‘e foto zet. Vanmiddag kwam ik d’r weer langes en zag ik dat d’r butendeure een vrouw mit de bloemen in de weer was. Ik hebbe heur vraogd of ik een foto van de naeme maeken moch. Doe kwam heur man naor buten en gaf an dat hi’j dat bod zels maekt hadde. De buren hadden him verteld dat de veurige bewoner altied zee, as hi’j op huus angong: “Now, ik gao weer naor de tippe”. Dat vunnen de bewoners van now een mooie naeme veur heur huus. En inderdaod: et huus staot daor op et uterste tippien grond.’
Een kleine foto van et kleinste kaemertien bi’j Odrie: ’t husien! En dat is, veur wie et niet wet, et Stellingwarver woord veur WC. Now hebben ze daor bi’j Odrie aenlik twie husies… kiek mar naor nr. 216 van disse serie!
Omroep Odrie kent ok een keuken, waor de lekkerste koffie zet wodden kan. En ieder kan daor gebruuk van maeken; niet alliend de mitwarkers, mar ok de studiogaasten. Dat mit eupen Keuken is niks tevule zegd!
De ruumte bi’j Odrie waor de opnaemen van de meerste pergrammes maekt wodden hiet de Prissentaosieruumte. Odrie dot veul an et Stellingwarfs binnen heur pergrammes, de omroep kent alderdeegst een Stellingwarfstaelig streekmeziekpergramme. Ok dat pergramme het een Stellingwarver naeme: Singeliers. En dat woord staot dan weer veur eigenaorig, toevallig, biezunder, wonderlik… En dat is et ok! Luuster mar es: et pergramme wodt iedere vri’jdagmiddag tussen vuuf en zes ure uutzunnen, wiels op ‘e zundagmorgen tussen tienen en elven de herhaeling is.
