Jong van hatte mit et Stellingwarfs de toekomst in
In Raevenswoold het et baankien dat uutkikt op de Eerste Wiek sund kot een mooie en toepasselike Stellingwarver naeme kregen: Kiek op e wiek. Aenlik schrieven we in et Stellingwarfs ‘e, en dat zol mit een lottien varve zo nog even anpast wodden kund… Renée Hulzinga en Gerda Schaufeli bin de initiatiefnemers; zi’j zetten heur tegere ok al een hiele poze in veur de anleg van een voetpad langs de Meester Lokstraote. Ok dat liekt now veur mekaander te kommen.(Foto: Renée Hulzinga)
In plak van et goeie Stellingwarver woord oold wodt ok nogal es old schreven. Dat is krek zo mit et woord hoolt, dat wodt nog wel es as holt schreven. De schoele van Ni’jhooltpae hiet zodoende ’t Holtpad. Et was vanzels niet verkeerd dat as meensken Stellingwarver naemen geven willen, wat slim mooi is, ze dan even infermeren zollen naor de juuste spelling. (Tekst en foto’s: Johan Veenstra)
Et Proeme nust is de naeme van een gebouw in Scharpenzeel. D’r is daor van alles en nog wat te doen. Ie vienen d’r, neffens heur webstee, een escape room, fitnesscentrum, lunchroom en winkel. (Foto’s en tekst: Johan Veenstra)
Jaegersrust is de naeme van de peerdestal an de Willinge Prinsstraote in Berkoop. In die stal hebben ze een hiel biezunder en mooi ras: de ‘100 % Pure Bred Falabella Miniature Horses’.
Van Henk Jager uut Berkoop kwammen disse beide foto’s binnen veur de rebriek Stellingwarfs in ’t wild. De naeme ‘kiek es’ is de naeme van et snoepwinkeltien in Wolvege an de Heufdstraote-Oost. Soms wodt ok wel es ‘Kiekes’ schreven, dat is vanzels niet goed. De winkel in Wolvege het et wel goed veur mekere!