Stellingwarfs in et ‘wild’

In en bi’j de Lendevallei bi’j Wolvege bruukt It Fryske Gea de Stellingwarver naemen van o.e. een tal poolders. Eerder in disse serie zaggen jim daor al twie veurbeelden van. Zo staon d’r twie infermaosiebodden mit de naemen Catspoolder en Lendepoolder. Van de Catspoolder staot op een eer plak nog een twiede bod, zie de foto hiernaost. Hiel mooi is dat juust op dit bod een topografische kaorte plaetst is mit meer veldnaemen (zie boverste foto). Behalven de Catspoolder zels en de Lendepoolder staot daor o.e. ok de Driessenpoolder op.

(Foto’s en gegevens: Henk Jager)

De Weperpoolder is de jongste van de buurtschoppen om Oosterwoolde henne. In et begin van 1900 is de Weperpoolder in kultuur brocht en bin d’r boereplaetsen bouwd. (Foto’s en tekst: Sietske Bloemhoff)

Tussen de buurtschop De Weper bi’j Oosterwoolde en et plakkien De Haule ligt een weg die an de iene kaante van et reviertien ’t Grootdiep Schrappinga hiet, en an de ere kaante de Haulerdiek. (Foto en tekst: Sietske Bloemhoff)

De buurtschop De Weper was altied iene van de mooiste buurtschoppen om Oosterwoolde henne. Et gong om een zonuumde kernesnederzetting, mit vier boerderi’jen om een mandielige brink henne, bouwlanen op de es, en hujlanen bi’j ’t Grootdiep. Zo was et, want vandaege-de-dag is d’r weinig over van de buurtschop, die zokke dudelike Drentse trekkies hadde. (Foto en tekst: Sietske Bloemhoff)

Op et verkiezings-anplakbiljet van WB staot de Stellingwarver tekst De kop d’r veur. Zie nommer 331 van disse serie. Hier een foto die op et ogenblik om een lanteernpaol in Ni’jhooltpae hangt van de poletieke perti’j Blijf Stellingwarfs. De naeme van die perti’j is dus half in et Stellingwarfs. Et was mooier west as et Blief Stellingwarfs west was. Mar… et begin is d’r! (Foto en tekst: Johan Veenstra)