Stellingwarfs in et ‘wild’

Een vekaansiehusien op ‘e Valouwe in Appelsche het de mooie naeme ‘Stille wille’. En… die naeme kujje vanzels van alles bi’j veurstellen, neffens Akkie Zeilstra van Raevenswoold die de foto instuurde veur Stellingwarfs in ’t ‘wild‘.

Nommer 139 van de serie ‘Stellingwarfs in ‘t wild’ was de eerste die we plaetsten van de mooie bodden in Berkoop mit spreukies van Lamkje Hof-de Boer (1908-1991). Dit bod staot an de Oosterwooldseweg, daor is et volgende op te lezen:

Minsken die naor rust verlangen

willen wij hier graeg ontvangen

en veerder kuj lezen op n bord

wat jow hier alzo beuden wordt

Et is een betien spietig dat et Stellingwarfs niet hielemaole goed weergeven is… Misschien bi’j een eerstvolgende opknapbeurt even anpassen?

Twie van de 32 Under de toer/LF2018 projekten wo’n in de Stellingwarven opvoerd. Et eerste projekt was et straottheater De Verdwenen Peerden dat op 3 en 4 augustus mit hiel veul sukses opvoerd wodde in Ni’jberkoop en Berkoop. Op 5 en 6 oktober is et de beurt an De tael van et hatte, een theatraole kuiertocht van een ure deur Der Izzerd. Op ‘e foto et beeldmark van et projekt. Et staot op ‘e hoeke van de Slingerweg en de oolde rieksweg in Hooltwoolde en is maekt deur Co van Geene.

Op twie spandoeken wodt et straottheater De Verdwenen Peerden ankondigd; an de retonde bi’j Makkinge en bi’j de Doevekaampe in Berkoop. Et straottheater is hielemaole in et Stellingwarfs en wodt op 3 en 4 augustus opvoerd in Ni’jberkoop en Berkoop.

Henk Jager van Berkoop zag, doe hi’j onderwegens was veur zien warkgever It Fryske Gea, opni’j et gebruuk van et Stellingwarfs butendeure. Dit keer op een naembod van een bedde-en-broggiengelegenhied an de deurgaonde weg in Buil.