Jong van hatte mit et Stellingwarfs de toekomst in
Aj’ in ziekenhuus Tjongerschaans in Et Vene liggen en eten kriegen, kriej’ daor servetten bi’j daor in drie taelen op staot dat ze hopen daj’ smaekelik eten zullen: Nederlaans, Fries en Stellingwarfs! Ik wete uut onderviening dat et eten daor ok smaekelik is! Behalven vanzels veur de zeurderds en pieperds die altied wat te mierken hebben. (Tekst en foto: Johan Veenstra)
Verschillende dörpen hebben vandaege-de-dag infermaosiebodden bi’j et begin van een dörp staon. Daor staon dan alderhaande aktiviteiten op vermeld die in dat betreffende dörp hullen wodden. De Hoeve het ok van dat soort bodden. Dat doe daor een jaormennig leden de Stellingwarver Dag hullen wodde, wodde dat keurig op die bodden ankondigd. (Tekst en foto: Johan Veenstra)
Mar liefst elf kursisten bin in Wolvege uut aende gaon mit de kursus ‘Stellingwarfs veur beginners’. Tiedens die kursus is d’r mit naeme ommedaenken veur et schriftelik gebruuk van disse kotleden erkende Nedersaksische tael, mar ok veur et praoten d’r van. Daornaost wodt d’r over de tael en de oorsprong d’r van uutleg geven.
De kursus wodt geven in de biebeltheek en bestaot uut zes lesaovenden. De eerste drie aovenden bin in november, de laeste drieje in jannewaori. As ofsluting is d’r in et veurjaor een exkursie in een Stellingwarfs netuurgebied. Disse exkursie zal verzorgd wodden deur Freddie de Vries van Hooltpae.
De kursusleiding bestaot dit keer uut dr. Henk Bloemhoff (Oosterwoolde) en Mark van Veen (Wolvege).
(Foto’s: Lenus v.d. Broek)
Al sund jaor en dag orgeniseert de Stellingwarver Schrieversronte een veurleesaktie veur bewoners van alle Stellingwarver zorginstellings en verpleegtehuzen, en veur speciaole bi’jienkomsten veur oolderen in de kleinste dörpen. Die aktie is altied in et winterseizoen; de eerstvolgende keer is in feberwaori 2019. De veurleesaktie wodt deur iederiene slim wardeerd, dat d’r kommen alle jaoren meer anvraogen bi’j.
Veurleesmappe
De veurlezers maeken gebruuk van een speciaole veurleesmappe, die jaorliks anvuld wodt mit ni’je verhaelen en gedichten. Sommige veurlezers nemen soms ok heur meziekinsterment mit en zingen tussendeur bekende oolde lieties mit de bewoners. Die mooie ofwisseling van verhaelen en meziek wodt deur et pebliek ok ommeraek wardeerd.
Verlet van meer veurlezers
Veur et veurlezen zorgt een groep van zoe’n vuuftien vri’jwilligers. Omreden d’r liekewel de hieltied meer vraoge komt naor de aktie, is d’r verlet van meer meensken die in die periode veurlezen willen. Daoromme is de Stellingwarver Schrieversronte op zuke naor vri’jwilligers die de kommende keer an disse mooie aktie mithelpen kunnen.
Veur meer infermaosie kuj’ terechte bi’j et kantoor van de Schrieversronte. Ie kun dan et beste even bellen naor 0516-451108 en vraogen naor Kiena Bouwer of Akkie Zijlstra; zi’j bereiden dit keer de aktie veur. Mailen kan vanzels ok naor info@stellingwarfs.nl.
Foto: Lenus v.d. Broek