In Oosterwoolde staot an de Oerkampweg een huus mit al herwertsjaoren de prachtige Stellingwarver naeme ’t Zunnehuus. Et is al weer nommer 66 in de riegel van Stellingwarver naemen in ’t wild!
65. Et West
Een appattementekompleks in Wolvege het de naeme Et West. Dat is een toepasselike naeme, want et staot op et west van Wolvege. De foto’s veur Stellingwarfs in et ‘wild’ wodden instuurd deur Johan Veenstra.
64. ’t Kiekhuus
An de Grindweg in Wolvege vien ie Museum ’t Kiekhuus. Et museum, dat in een vroegere bakkeri’je zien plak vunnen het, bestaot al sund 1988. In et museum is o.e. een prachtige verzaemeling oolde blikken en blikkies te zien, mar ok een oolde schoeleklasse. De foto veur Stellingwarfs in et ‘wild’ wodde instuurd deur Annie Dedden.
Doe mit an de vierde Friese verhaelewedstried
Van ’t jaor orgeniseert ’It Skriuwersboun’ veur de vierde keer de Friese verhaelewedstried. De wedstried het dit keer as thema ’Aanders’. Dat d’r veur dit thema keuzen is het te maeken mit Gysbert Japix (1606 – 1666), de Bolswerder schoelemeester, veurzinger en dichter, die dit jaor, 350 jaor naodat hi’j uut de tied raekte, herdocht wodt mit alderhaande festiviteiten. Japix het slim belangriek west veur et schrieven in et Fries. Hi’j gong hiel aanders mit zien tael omme as zien tiedgenoten en ok mit zien stiel van schrieven. De invulling van et thema ‘Aanders’ is liekewel hielemaole vri’j. Et verhael hoeft dus hielemaole niks mit Gysbert Japix te maeken hebben. An de wedstried kun oolderen én jongeren mitdoen.
Et verhael mag uut hooguut 775 woorden bestaon. De taelen waor et verhael in schreven wodden mag bin de streektaelen van Frieslaand. Dus naost et Fries meugen de verhaelen ok schreven wodden in et Stellingwarfs, Schiermonnikoogs of et Snekers – aenlik alles, behalven et Nederlaans. Et stok, dat beginnen moet mit de naeme, geboortedaotum, emailadres en tillefoonnommer van de inzender, kan maild wodden naor: bestjoer@skriuwersboun.nl o.v.v. Ferhalewedstryd, en wodt dan anoniem deurstuurd naor een gedegen jury. Et verhael moet veur 1 meert inleverd wezen!
De beste drie verhaelen van beide leeftiedsgroepen wo’n beloond mit een pries, butendat wodt et verhael publiceerd in et Friesch Dagblad. Uut de beide winners van de twie kattegorienen köst de jury butendat iene van wie et verhael verfilmd wodden zal deur Omroep Frieslaand. De kotte film wodt in vier dielen uutzunnen in et tillevisiepergramme Bynt. In datzelde pergramme zullen op donderdag 7 april de prieswinners bekend maekt wodden.
Oflopen jaor wun Harmen Houtman de twiede pries mit zien Stellingwarver verhael De verleuren zeune.
Schrieversronteveurzitter kikt over de greenzen
Schrieversronteveurzitter Ype Dijkstra vint dat as et op een gemientelike herindieling an gaon zol, de beide Stellingwarver gemienten veural ok es over de perveensiegreenzen kieken moeten zollen. Hi’j zee dat tiedens zien toespraoke op de kulturele ni’jjaorsbi’jienkomst van zien stichting. Dijkstra: ‘Bi’j de stokken die ik lees over de gemientelike herindieling kom ik nargens maotschoppelike, kulturele en geschiedkundige overwegings tegen. En die bin bi’j een echte saemenwarking tussen gemienten wel van belang. Zol et zo gek wezen, juust dié argumenten ok wegende, es over de perveensiegreens naor de Drentse gemiente Westerveld en de Overiesselse gemiente Stienwiekerlaand te kieken? Dáór liggen kulturele, maotschoppelike, geschiedkundige én taelkundige banen mit de Stellingwarven!’ De SSR-veurzitter gaf vervolgens o.e. een overzicht van de ni’jste plannen van de stichting.
Veur de ni’jjaorsbi’jienkomst hadde de warkgroep Publiciteit veur een ommeraek gezellige aovend zorgd in et prachtige MFA van Berkoop. Zo vertelde Klaasje Herder van Oosterwoolde de oolde Stellingwarver volksverhaelen ‘De laete Zwelver’ en ‘Et verhael van de Pietermannen’; beide deur overlevering bekend van Wube Lamers van de Kuunderwal.
De Nedersaksische manludezanggroep ‘’k Wait nait’ zong prachtige lieties in verschillende Nedersaksische taelen. Ok van heur eigen Stellingwarver lied over boer Vondelkaamp kon de zael genieten; mit dat lied wun de groep veurig jaor de twiede pries van et Stellingwarfs Meziekfestival.
Arg veul wardering was d’r ok veur et optreden van de uut vuuf personen bestaonde Scheve Schaats Band uut Wolvege. De band speulde bekende lieties van o.e. The Monkees, Creedence Clearwater Revival en Amy Macdonald, mar hadde veur de aovend ok drie teksten in et Stellingwarfs vertaelen laoten deur Sietske Bloemhoff.
(Foto’s: Sietske Bloemhoff)