Jong van hatte mit et Stellingwarfs de toekomst in
Johan Veenstra van Ni’jhooltpae stuurde disse weke een foto op van een Stellingwarver naeme in Noordwoolde. Et gaot om de Meule Passage. De Meule Passage is een winkelpassage in Noordwoolde vlakbi’j de Noordwooldiger meule, die op disse foto mit de kop krek boven de Passage uutstikt.
Van Frank Spijkers van Buil, mar ok van Fettje Alten uut Noordwoolde kregen we een foto van een Stellingwarver straotnaeme uut Buil, et gaot om De Daoken. Neffens et Stellingwarfs Woordeboek is een daoke: 1. een rieten dak 2. een laoge riet onder de dakpannen 3. een dak van stro 4. een dak 5. een leeg, nat stok laand, vaeke begruuid mit heide en bentepollen 6. lange strook grond in et heideveld 7. flinke laoge van bi’jglieks grös dat gruuit.
Op maendag 9 december overhaandigt auteur Xavière Kolk et eerste exemplaor van et prenteboek ´Over grote beren en knuffels´ an vrouw Sietske Poepjes, dippeteerde veur tael en kultuur van de perveensie Frieslaand.
Et prenteboek is bedoeld veur oolden én kiender. Om een gesprek angaon te kunnen over grote meensken en de greenzen van kiender. Xavière Kolk schreef dit boekien tegere mit heur zeuntien Daniël van acht jaor. Naodat Daniël twie jaor leden zo flink was om zien geheim te vertellen, wol hi’j mithelpen om aandere kiender te bescharmen tegen grote beren.
Et boekien is schreven vanuut de beleving van kleine beer; een jongien dat graeg wil dat zien oolden trots op him binnen. Op een dag vragt de grote beer uut zien straote as hi’j even in huus komt. Kleine beer wil niet bertaol wezen, dus dot hi’j dat. As kleine beer laeter buten komt is hi’j niet meer bliede. En hi’j pist naachs inienen in zien bedde. Ok het hi’j naachtmerries en is hi’j zomar kwaod op Mem.
Kleine beer en zien mem hopen dat dit boekien, mit et verhael in vier verschillende taelen, meensken helpen zal en steunen. En dat et boekien dit muuilike onderwarp beter bespreekber maekt.
Stellingwarfs, Bildts, Fries en Nederlaans
De vier taelen in dit boekien bin taelen die in Frieslaand bruukt wodden: et Stellingwarfs, et Bildts, et Fries en et Nederlaans. Omdaj’ je over muuilike onderwarpen in je eigen taal wat makkeliker uteren kunnen.
Veur de prachtige illestraosies en opmaek van et boek zorgde Edith Stultiens uut Liwwadden. Veur de vertaelings zorgden Baukje Luining (Bildts), Hermien van der Meer (Fries) en Sietske Bloemhoff (Stellingwarfs).
Et boek wodt uutgeven deur de Stichting Stellingwarver Schrieversronte, mit financiële steun van de perveensie Frieslaand. Veur et drokken d’r van zorgt Printbase bv in Suntjohannesge.
Hans Liest van Berkoop stuurde opni’j een foto veur Stellingwarfs in et ‘wild’ . Dit keer gaot et om een naeme die niet veul meer bruukt wodden zal, mar die nog wel te zien is op et hokkien veur et speulmateriaol van basisschoele ‘De Tjongeling’ in Berkoop. ”t Strobbe-nussien’ was eertieds de naeme van de kleuterschoele doe die nog te vienen was op et plak daor now de tennisbaenen liggen.
De Stellingwarver Schrieversronte geft begin volgend jaor een mediaboekien uut mit Stellingwarver verhaelen en lieties. Et mediaboekien is veural bedoeld veur de ooldere inwoners van Stellingwarf, die in zorgtehuzen of verpleeginstellings wonen en die niet veul meer buten de deure kommen. Et mediaboekien is koppeld an et veurleesprojekt veur oolderen zoas dat al een stokmennig jaoren lopt, en dat now veerder uutbreided wodden zal. De jaorlikse veurleesaktie veur oolderen is in de wintertied, en zal disse winter begin feberwaori wezen. Een groep van zoe’n twintig vri’jwilligers gaot in die winterveurleesweke naor alle Stellingwarver zorginstellings en verpleeghuzen en naor De Menning in Wilhelminaoord. Veur de kommende keer zal ok de Thuuszorg benaoderd wodden om ok oolderen die nog wel thuuswonen kunnen in et projekt te betrekken. Et mediaboekien zal in de veurleesweke an alle zorginstellings uutdield wodden, zodat de bewoners ok buten de veurleesweke omme naor Stellingwarver verhaelen en lieties luusteren kunnen. Veur et hiele projekt krigt de Stellingwarver Schrieversronte belangrieke financiële ondersteuning van Stichting Bercoop Fonds.
Femmie van Veen lest veur in Wilgenstede in Wolvege (foto’s: Lenus v.d. Broek)
Verhaelen
Veur de verhaelen die op de cd kommen, wodde deur de Sietske Bloemhoff een selektie maekt. Zo zal Femmie van Veen (Hooltpae) verhaelen inlezen gaon van Hendrik Johannes Bergveld en Klaas Dijkstra (Langedieke) lest een tal verhaelties veur uut et boekien ‘Daegelikse dinkies’ van Klaas van der Weg (1916-1995). Oflopen 6 november vertelde Johan Veenstra (Ni’jhooltpae) al twie verhaelen uut zien bundel ‘Lamert en Lutske’. Alle verhaelen en lieties veur de cd wo’n allemaole opneumen in de studio van Serge Epskamp in Zaandhuzen.
Lieties
Ok al wodt de cd al slim ofwisselend deur de verschillende verhaelen en de verschillende veurlezers, d’r wodt ok zorgd veur een drie- tot viertal lieties. Daorveur is Henk Bloemhoff benaoderd; hi’j zal een peer bekendere, mar ok een wat onbekender lied van himzels inzingen.
Mediaboekien
De cd, die roem een ure duren zal, komt in een zonuumd mediaboekien. In dat boekien, dat 24 bladzieden tellen gaot, kommen behalven infermaosie over de verhaelen en vertellers ok biezundere aorigheden / aorige biezunderheden over de Stellingwarver regio. Veur de vormgeving van et mediaboekien zorgt Alain ter Schuur van 24BIT in Wolvege. Et mediaboekien mit cd zal ok in de losse verkoop kommen en kost dan € 10,00.