Ni’js – Pagina 197 – StellingPlus.nl

3. De Ni’je Stienze

5 september 2015 door Redaktie

In Ni’jhooltpae staot een mooi MFC. Hiel mooi is ok dat et MFC daor een Stellingwarver naeme het, et hiet De Ni’je Stienze. ‘Ni’j’ omreden ieuwen leden d’r in Ni’jhooltpae een stienze staon het. Die stienze Friesburg, die an de Friesburgerweg ston, wodde eerder Lemenburg of Leemburg nuumd. De stienze wodde spietig genoeg ofbreuken, dat moet al véúr 1780 gebeurd wezen. De onderstaonde tekening van de stienze is van Jacobus Stellingwerf en zal zo rond 1720 maekt wezen.

Veur de rebriek ‘Stellingwarfs in et wild’ maekte Johan Veenstra van Ni’jhooltpae een foto van De Ni’je Stienze.

Oude afbeelding van de State uit 1722 van J. Stellingwerf

Fries-Stellingwarver aovend op 18 september

6 september 20155 september 2015 door Redaktie

Sjoukje Oosterloo schreef an now toe twie verhaelebundels:’Malle meraokels’ en ‘Warkieslappe’ (foto Sietske Bloemhoff)

Vanwegens de Stellingwarver sutelaktie en de Friese boekemaond orgeniseren de Fryske Krite in Oosterwoolde, de biebeltheek en de Stellingwarver Schrieversronte opni’j een gezaemelike literaire aovend. Die aovend is op vri’jdag 18 september in de biebeltheek van Oosterwoolde. De Stellingwarver schriefster Sjoukje Oosterloo zal uut eigen wark veurlezen, wiels de Friese schriever en verhaeleverteller Mindert Wijnstra een tal van zien verhaelen vertellen gaot.

Et is ondertussen veur de dadde keer dat in dit saemenwarkingsverbaand een literaire aovend orgeniseerd wodt. In 2013 vertelden de schrievers Johan Veenstra en Douwe Kootstra uut eigen wark, in 2014 vertelde Auke Zeldenrust over zien boek ‘Dorp achter tralies’ en vertoonde Jan Koops een PowerPoint over de dörpen van Oost-Stellingwarf n.a.v. et boek ‘De dörpen van Stellingwarf in oolde beelden’. Veur beide aovenden was ommeraek veul belangstelling, zodat besleuten wodde om ok in 2015 een gezaemelike aovend te orgeniseren. Tiedens de aovend zorgt boekhaandel Bruna veur een Fries-Stellingwarver boekekraom. Et pergramme van 18 september begint om 20.00 ure, de toegangspries is veur leden van de Krite, biebeltheek en Schrieversronte € 5,00, eren betaelen € 7,50.

Foto van de maond

29 augustus 2015 door Redaktie

Zaoterdag 29 augustus was et schitterend weer, zo an et aende van augustus. Mar eerder disse weke was et ok wel es even eers. Mit now en dan dikke bujjen, en dan weer zunne. En soms levert zoks dan weer een mooie regenboge, en soms ok twieje, op. In Oosterwoolde was dat laeste et geval. Disse mooie foto daorvan wodde maekt deur Joke Dijkstra.

Johan Veenstra en Sietske Bloemhoff pitchen idee SSR

30 augustus 201529 augustus 2015 door Redaktie

Omreden et VSBfoons 25 jaor bestaot is d’r een idenenwedstried uutschreven. De SSR leverde et idee in om een verhaele-estafette te holen daor alle Stellingwarver dörpen an mitdoen kunnen. Et idee kwam deur de eerste ronde, gister wodde et ‘pitcht’ veur kamera’s in de VSB-feestkaravaan in Liwwadden. Dat gebeurde deur Johan Veenstra en Sietske Bloemhoff. SSR-veurzitter Ype Dijkstra, en twiede veurzitter Jan Baas weren mit om Johan en Sietske an te moedigen.

Eerdaegs zullen de filmpies van alle idenen op een webstee plaetst wodden en kan iederiene op et idee van heur of zien keuze stemmen. Uuteindelik wodt an de haand van die stemmen én et oordiel van een deur et VSB-foons instelde jury de winner bekend maekt. Mit de pries kan € 25.000 wunnen wodden.

Stem op de SSR!

Ok jim kun uteraord op et idee van de Stellingwarver Schrieversronte stemmen! Dat kan op de webstee vsbverzilverjeidee.nl in de weke van 9 tot en mit 16 september 2015.

Uut alle filmpies kiest de jury nao 16 september een groep kaanshebbers veur de priezen. Et tal stemmen op elk filmpien telt veur 1/3 mit. Rond 21 september wodt dudelik wie deurgaot naor de volgende ronde.

(Foto’s: Ype Dijkstra)

Sutelaktie uut aende!

25 augustus 201525 augustus 2015 door Redaktie

Lutz Jacobi eupent sutelaktie (foto: Lenus v.d. Broek)

Mit een beste galp op de speciaole suteltoeter eupende Twiede Kaemerlid veur de PvdA Lutz Jacobi maendagmiddag de jaorlikse sutelaktie van de Stellingwarver Schrieversronte. Anslutend daorop leut Jacobi weten van hoe ’n groot belang ze de inzet veur de eigen Stellingwarver streektael vint. Ze dee heur verhael in zo goed meugelik Stellingwarfs; hielemaole vremd is heur die tael niet omreden ze vroeger een posien op de Mulo in Wolvege gaon het. Jacobi hul mitien ok een waarn pleidooi veur de veerdere erkenning van et Stellingwarfs onder diel drieje van et Europees Haandvest veur minderhiedstaelen. Jacobi reup iederiene op om bi’j heur eigen politieke aachterban et belang van die veerdere erkenning dudelik te maeken; mit mekeer moe’n we zorgen dat die d’r komt, neffens heur. Lutz Jacobi zet heur al langere tied veur die erkenning in, krek as bi’jglieks heur vroegere kollega Eddy van Hijum van et CDA.

Weer een hiele groep van Schrieversronte-vri’jwilligers zorgde veur een prachtig verkooprisseltaot (foto: Lenus v.d. Broek)

Tegere mit alle ere sutelders gong Jacobi daornao mit de kroje de straote uut om zoveul meugelik an Stellingwarver boeken te verkopen. Ze dee dat tegere mit Johan Veenstra, en et sutelduo dee, in Ni’jhooltpae, ommeraek goeie zaeken. De Schrieversronte verkocht disse eerste aovend mar liefst veur over de € 2000,00 an boeken en kelenders, en dat is een arg mooi begin van disse belangrieke aktie.

Ok Schrieversronte-veurzitter Ype Dijkstra was, tegere mit Fokje Siegersma van Ni´jhooltpae, de hiele aovend op pad om veur een mooi verkooprisseltaot te zorgen (foto´s Anneke Koopstra).

V.l.n.r: Bea, Coby, Koop en Anneke tellen heur opbrengst; ze verkochten ommeraek goed! (Foto’s: Sietske Bloemhoff)