Kiender van et basisonderwies slim enthousiast over haandboekbienen
Op donderdag 2 en vri’jdag 3 oktober leerden vier erveren haandboekbienders kiender van et Stellingwarver basisonderwies hoe aj’ zels een boek maeken kunnen. De meerste kiender lezen vaeke en veul boeken en schrieven zels ok wel es verhaelties of maeken tekenings of foto’s daorbi’j as illestraosie. Mar hoe aj’ zels ok een boek in mekaander zetten kunnen was niet arg bekend. Zoe’n 90 kiender van et Stellingwarver basisonderwies weten dat now nao et volgen van een warkwinkel Haandboekbienen. Et enthousiasme was groot, zó groot, dat de eerste schoele him al anmeldde veur een eventuele warkwinkel in 2015. De wearkgroep ‘Alles rondom tael’ van Stichting Kunstwerf, die in et kader van de kienderboekeweke de warkwinkels organiseerde, zal die meugelikheden now bekieken gaon. Op ‘e foto’s bin kiender van basisschoele De Tjongeling drok doende tiedens de warkwinkel in et gebouw van de Schrieversronte in Berkoop. Ok in de biebeltheek van Oosterwoolde weren kiender an et haandboekbienen.
Foto’s: Lenus van der Broek
Streektaeldag op 15 november in Hoogeveen
Op zaoterdag 15 november hoolt de SND (Stichting Nederlandse Dialecten) de negende streektaelkonfereensie. Et thema is dit keer streektaelliteretuur. Het de streektaelliteretuur nog toekomst? De verkoop van boeken nemt deur et hiele laand henne of, en tal van boekwinkels bin over de kop. De SND stelt daorommme de vraoge as d’r nog wel een mark is veur boeken in de streektael. En hoe komt een streektaelschriever an lezers en optredens, ok die vraoge wodt steld. An et woord komt o.e. Johan Veenstra, die, zoas de SND angeft, in iene van de kleinste taelgebieden van Nederlaand woont en van wie de boeken toch hoge oplaogen hebben. Hoe kan dat, vragt de SND him of… Ok an et woord komt de Friese schriever Ferdinand de Jong, die vertelt over zien initiatief om de Friese sutelaktie weer ni’j leven in te blaozen. Tiedens et morgenpergramme is d’r ok een zonuumde ‘Pitch’ van streektaelboeken die de laeste vuuf jaor uutkommen binnen. Mit et holen van de Pitch wodt deur de bezukers bepaold welk streektaelgebied veur et mooiste boek zorgde.
Tiedens et middagpergramme bin d’r warkwinkels proza en poëzie, daornao wodt de bundel ‘Gloepends’ prissenteerd. In die bundel is uut alle Nedersaksische regio’s proza opneumen.
De konfereensie die veural bedoeld is veur schrievers, uutgevers, redacteurs en interesseerde lezers, is in de biebeltheek van Hoogeveen, Willemskade 27. De dag begint om half tiene morgens en duurt tot middags vier ure. De kosten bin € 15,00 per persoon, inklusief koffie, lunch en een draankien tiedens de prissentaosie van ‘Gloepends’. Anmellen kan op info@huusvandetaol.nl, ie kun ok bellen naor 0593-371010.
Veertigjaorige sutelaktie mit mooi risseltaot
Maendagaovend weren de sutelders van de Stellingwarver Schrieversronte veur et laest in aktie, dit keer in Ooldelaemer, Ni’jlaemer en Wolvege. Mit een mooie opbrengst van € 10.500,- kikt de orgenisaosie weeromme op een goed verlopen sutelaktie. D’r wodde best verkocht mit eenzelde gemiddelde as de veurgaonde jaoren. Om verschillende redens weren d’r dit jaor liekewel minder sutelders in et spier as gewoonlik. Veurzitter Ype Dijkstra zee dan ok bi’j de ofsluting: ‘Dit jaor weren d’r nogal wat ziektegevallen, zodat we mit minder ploegen an et sutelen konnen. Oons plan is vanzels dat we volgend jaor weer meer route’s doen kunnen en daor gaon we oons mit mekeer veur inzetten!’ Dijkstra zee ommeraek veul wardering te hebben veur de inzet van alle vri’jwilligers die de sutelaktie dit jaor meugelik maekten.
Toppers in de verkoop weren de Stellingwarver Spreukekelender en de serie van vuuf routegidsen. Ok ooldere uutgiften as ‘De Friese waterlinie’ van Meindert Schroor, ‘De dörpen van Stellingwarf in oolde beelden’ van Jan Koops en Jan de Vries en ‘Mit et waeter veur de dokter’van Johan Veenstra deden et goed.
(Foto’s: Lenus van der Broek)
Vanwegens de veertigste sutelaktie wodden d’r deur de sutelders maendagaovend veertig belonnen oplaoten. An elke belon zit een kaortien dat bi’j inlevering goed is veur een Stellingwarfs boek.
Ni’j verhael van Sjoukje Oosterloo: Beppe heur schölkien
Beppe heur schölkien
Vandaege-de-dag ziej’ bi’jkaans gieniene meer mit een schölkien veur. Mien aachterkleinkiender weten amper meer wat een schölkien is. Laot staon dat ze weten wat et belangriekste doel is van et schölkien.
Beppe dreug et schölkien om heur jurk te bescharmen, omreden ze d’r mar een stokmennig jurken hadde, iene veur daegs en iene veur de zundag. Mar et was netuurlik ok makkeliker om een schölkien te wassen in stee van een jurk.
Ze bruukte et schölkien ok as pannelappen, om de pannen van de kachel of uut de ovend te haelen. Butendat diende et ok om de traonen en snotneuzen van de kiender of te vegen.
As Beppe de eier uut et kiepehokke haelen gong, was et schölkien ok verhipte handig om de eier in te dregen. Kwam d’r es vesite, dan konnen de kiender schruten votschoelen onder heur schölkien. En as et slim koold was kon ze heur aarms d’r lekker indri’jen om ze op te waarmen. Et schölkien was ok hiel geschikt om et zwiet mit of te vegen, bi’jglieks as ze de kachel opstoken mos, en mit de etenkokeri’je. Hoolt veur de kachel legde ze ok in heur schölkien en brocht et dan in huus. En as de atepoelen dopt weren gongen de schellen ok in et schölkien.
Bi’j de haast wodde et schölkien bruukt om de appels in te doen, die onder de bomen laggen.
As Beppe onverwaachs vesite ankommen zag, ston ie d’r veraldereerd van te kieken hoevule meubelties et oolde schölkien in een peer tellen stoffen kon.
Hadde Beppe et eten klaor dan gong ze naor buten en wuifde mit heur schölkien, dan wus iederiene dat et eterstied was.
Et zal nog een hiele poze duren eer iene wat uutvunnen het, dat veur zovule doelen bruukt wodden kan, zoas et schölkien van Beppe!
In disse tied zollen ze d’r gek van wodden, aj’ weten hoevule bacteries d’r in dat schölkien zatten. Toch heb ik d’r nooit wat an overholen…. of lichtkaans wel???? LIEFDE!
Sjoukje Oosterloo