Bi’j de Stellingwarver Schrieversronte bliekt veur de tentoonstelling ‘Van schossel tot slingerpad’ in kombinaosie mit ‘Gebonden kunst’ geweldig veul lof te wezen. Veul bezukers van Eupen Stal – de tentoonstelling is een onderdiel van die jaorlikse keunstroute – vienen mit naeme et onderdiel haandboekbienen van de tentoonstelling butengewoon interessaant. Van losse katerns van et keunstboek ‘Van schossel tot slingerpad’ bin deur veertig dielnemers an de manifestaosie haandboekbienen unieke haandbunnen boeken maekt. Alle veertig boeken kommen in anmarking veur ien van de drie pebliekspriezen die deur de Stellingwarver Schrieversronte beschikber steld binnen. Middels een formelier kun de bezukers van Eupen Stal angeven wie neffens heur veur de mooiste drie boeken zorgd hebben. Op zundagaovend 10 augustus wodt, vlak nao de ofsluting van Eupen Stal, bekend maekt wie de priezen wunnen hebben. In et laeste weekaende van Eupen Stal verzorgt de Stichting Handboekbinden opni’j warkwinkels haandboekbienen. Iederiene kan daor an mitdoen, d’r bin gien kosten an verbunnen en je van teveuren anmellen is niet neudig.
Twietaelighied in et (buten)laand
Jim hoeven hielemaole niet naor et butenlaand toe veur foto’s van meertaelighied, schrift Jehannes Houtsma, die bi’j de gemiente West-Stellingwarf warkt en die oons disse foto stuurde. En dat is vanzels ok zo, in Nederlaand ziej’ behalven bi’j hiel wat Friese gemienten et gebruuk van twietaelige plaknaembodden ok in Zuud-Limburg!
Prissentaosie bi’j Schrieversronte goed bezocht
Schrieversronte-veurzitter Ype Dijkstra overhaandigt ‘Van schossel tot slingerpad’ an Peter Hiemstra, veurzitter van Eupen Stal. (Foto: Lenus v.d. Broek) 
Omreden Twiede Kaemerlid Lutz Jacobi (PvdA) d’r de twaelfde juli niet bi’j wezen kon, kreeg zi’j kot daorveur et boek anbeuden. Dat was mit naeme veur de grote inzet van Jacobi veur et veerder erkennen van et Nedersaksisch, waor et Stellingwarfs een onderdiel van is. (Foto: Sietske Bloemhoff)
Et eerste exemplaor van de katalegus ‘Gebonden kunst’ was veur haandboekbienster Corrie Los uut Oosterwoolde. Et boek wodde heur anrikt deur Jan Bosch, de veurzitter van de Stichting Handboekbinden. (Foto: Lenus v.d. Broek)
V.l.n.r. Corrie Los, Christiaan Kuitwaard, Christine Mulder, Peter Hiemstra, Roely Bakker, Marjolein Spitteler, Willen Jan Teijema, Sietske Bloemhoff en Jan Bosch. (Foto: Lenus v.d. Broek)
Theo van Gilst (links) mit naost him Jan Bovenkamp (veurzitter en ponghoolder Stichting Kunstwerf) bekieken andachtig de tentoonstelling van de haandbunnen boeken. (Foto: Lenus v.d. Broek)
Douwe Dijkstra uut Suntjehannesge had ommeraek veul interesse veur de haandbunnen boeken. Zien bedrief Printbase bv zorgde veur et drokken van ‘Van schossel tot slingerpad’ en ‘Gebonden kunst’. (Foto: Lenus v.d. Broek)
Tiedens een drok bezochte prissentaosie bi’j de Stellingwarver Schrieversronte verscheen op zaoterdagmorgen 12 juli in Berkoop et keunstboek Van schossel tot slingerpad en de katalegus Gebonden kunst’, t.b.v. de manifestaosie Haandboekbienen. Die manifestaosie is koppeld an de keunstroute Eupen Stal, die diezelde dag ok uut aende gaon is. In et gebouw van de Schrieversronte is tiedens Eupen Stal et wark te zien van de keunsteners Peter Hiemstra, Christiaan Kuitwaard en Marjolein Spitteler dat in et keunstboek opneumen is. In et boek bin ok Stellingwarver gedichten te lezen van Roely Bakker, Christine Mulder en Willem Jan Teijema. Heur wark zal tiedens Eupen Stal mit riegelmaot te heuren wezen. Keunsteners en dichters hebben heur bi’j et warken an et boek inspireren laoten deur et thema ‘Ruumte’. Bi’j de SSR bin butendat veertig haandbunnen boeken te zien, daorveur bin losse katerns van et keunstboek bruukt. Zaoterdagmorgen rikte Schrieversronte-veurzitter Ype Dijkstra een eerste exemplaor uut van ‘Van schossel tot slingerpad’ an Peter Hiemstra, hi’j is ok veurzitter van Eupen Stal. Eerder had Twiede Kaemerlid Lutz Jacobi al een boek kregen, o.e. vanwegens heur inzet veur de veerdere erkenning van et Nedersakssisch, waor et Stellingwarfs onder vaalt. Spietig genoeg kon Jacobi vanwegens heur vekaansie niet naor Berkoop kommen. De reaktie van Lutz Jacobi was liekewel zaoterdagmorgen wel middels een filmpien te zien en te heuren. Et Stellingwarfs praotende lid van de Twiede Kaemer leut behalven heur bewondering veur ‘Van schossel tot slingerpad’ opni’j weten hoe belangriek ze de erkenning van et Nedersaksisch vint. Peter Hiemstra gaf an arg bliede te wezen mit et ni’je keunstboek, en zee ok hoe belangriek hi’j de altied goeie saemenwarking tussen Eupen Stal en de Schrieversronte vint. Al sund jaor en dag kan Eupen Stal tiedens de vier weken durende keunstroute gebruuk maeken van de grote zael in et gebouw van de SSR. Daornao benaodrokte veurzitter Jan Bosch van Stichting Handboekbinden et belang van et saemenwarken van instellings. Op die wieze kan d’r vaeks krek even wat meer, neffens Bosch. Hi’j was ommeraek bliede mit de saemenwarking mit de Schrieversronte, waordeur veur et eerst in et noorden een prachtige manifestaosie haandboekbienen orgeniseerd wodden kon. Vervolgens beud Bosch et eerste exemplaor van ‘Gebonden Kunst’ an. Dat was veur haandboekbienster Corrie Los uut Oosterwoolde, zi’j is de initiatiefneemster van de manifestaosie Haandboekbienen. Veurzitter Jan Bosch van Stichting Handboekbinden maekte vervolgens de drie jurypriezen van de manifestaosie haandboekbienen bekend. Die priezen weren veur An Taveirne (Vlaanderen, eerste pries), Harrie Knoors (Limburg, twiede pries) en Sacha de Ven (Grunningen, dadde pries). De Stellingwarver Schrieversronte stelt drie priezen veur de pebliekspries beschikber; et pebliek van Eupen Stal bepaolt naor wie die drie priezen gaon. De bekendmaeking daorvan is op zundagaovend 10 augustus, kot naodat de deuren van Eupen Stal weer veur een jaor dichtegaon
Flitskursus veur Plasterk
Flitskursus Stellingwarfs veur Plasterk
Tiedens de prissentaosie van et keunstboek ‘Van schossel tot slingerpad’ en de katalegus ‘Gebonden kunst’ maekte Schrieversronteveurzitter Ype Dijkstra mitien van de gelegenhied gebruuk om ok nog es et belang van de veerdere erkenning van et Nedersaksisch, waor et Stellingwarfs onder vaalt, dudelik te maeken. Et ‘grune locht’ daorveur moet van Den Haag kommen, waor o.e. de kaemerleden Lutz Jacobi (PvdA) en Eddy van Heijum (CDA) heur geweldig veur die erkenning inzetten. Omreden menister Ronald Plasterk op dit mement aenlik de ienige is die nog wat dwasbongelt, beud Dijkstra de menister een Flitskursus Stellingwarfs an. ‘As Plasterk ienkeer wet hoe mooi oonze tael is, komt et mit de veerdere erkenning d’r van vast en zeker goed,’ neffens de SSR-veurzitter. (Foto: Lenus van der Broek)
SSR: plannen veur boek over De Lende
Tiedens et veuroverleg dat de Stellingwarver Schrieversronte had mit de zes inleiders van et kommende Lende-symposium, bin ok de meugelikheden bepraot om mit mekeer te kommen tot een omvangriek boek over de revier De Lende. Et doel is dat in et boek alle aspekten die mit de bekendste Stellingwarver revier te maeken hebben an bod kommen. (Laeter meer…)