VEUL KURSUSANBOD BI’J DE STELLINGWARVER SCHRIEVERSRONTE

door

Krek as in 2013 is d’r ok in et winterseizoen 2014 / 2015 opni’j een groot anbod van kursussen bi’j de Stellingwarver Schrieversronte.  Om te beginnen is d’r de Snuffelkursus Stellingwarfs, die veural bedoeld is veur ni’je inwoners van oonze regio. In die kursus wo’n alderhaande onderwarpen op et gebied van et kulturele arfgoed even antipt. In de kursus Stellingwarfs veur beginners wodt je mit naeme et schrieven an et Stellingwarfs leerd, mar is d’r o.e. ok ommedaenken veur et praoten d’r van.

De ‘Praotgroep Stellingwarfs’ is een konversaosiekursus, die bedoeld is om et praoten van et Stellingwarfs (beter) te leren. In de Flitskursus Stellingwarfs wodt je in iene dag tied de beginsels van et schrieven van en praoten in et Stellingwarfs anleerd. In de kursus Laandschopsgeschiedenis staot ieder keer van een dörp zien ontstaonsgeschiedenis centraol. De kursus ‘Vertel een verhael’ geft je adviezen veur aj’ een verhael (nog mooier) vertellen kunnen.

Over al die kursussen kuj’ op StellingPlus lezen onder et koppien Kursuswark

Boekekraante 2014

door

In weke 33 wodt de boekekraante ‘Twie pond ’n stuver’ 2014 deur PostNL in hiel Stellingwarf huus-an-huus verspreided. Een inkelde keer komt et liekewel veur dat iene de kraante niet krigt. Ie kun die dan vanzels nog even opvraogen bi’j de Schrieversronte in Berkoop, mar de kraante is now ok digitaal in te zien, deur te klikken op:

Boekekraante

Veur alle dudelikhied: meensken die een ja-nee stikker op de brievebusse hebben, kriegen de kraante niet!

Foto’s tentoonstelling haandboekbienen

door

Op disse bladziede is de tentoonstelling haandboekbienen nog even te bekieken. Die tentoonstelling was tiedens de keunstroute Eupen Stal in de grote zael van et gebouw van de Stellingwarver Schrieversronte in Berkoop. De hiele manifestaosie was een idee van haandboekbienster Corrie Los uut Oosterwoolde; de manifestaosie wodde in gezaemelikhied mit Stichting Handboekbinden orgeniseerd. De foto’s bin maekt deur Schrieversronte-veurzitter Ype Dijkstra uut Oosterwoolde.

P1220177 (1) taofel en uutleg en bakken vitrines overzicht bak keunst Peter keunst Christiaan

de stembusse

warkwinkel

Pebliekspriezen manifestaosie haandboekbienen bekendmaekt

door

eerste pries

Oflopen zundagaovend, kot nao et ofsluten van Eupen Stal, wodden tiedens een speciaole bi’jienkomst bi’j de Stellingwarver Schrieversronte in Berkoop de pebliekspriezen bekendmaekt van de manifestaosie haandboekbienen. Veertig professionele en ammeteur haandboekbieners stuurden daorveur heur wark in. In de vier weken durende keunstroute weren al die veertig haandbunnen boeken tentoonsteld in de grote zael van et gebouw van de Schrieversronte. Et pebliek van Eupen Stal mocht mit mekeer uutmaeken naor wie de pebliekspriezen gaon zollen. Veur et in te bienen boek weren losse katerns beschikber steld van et keunstboek ‘Van schossel tot slingerpad’, dat oflopen veurjaor deur de Stellingwarver Schrieversronte uutgeven wodde. De meerste stemmen gongen naor Eva Kipp (Kloosterburen), de twiede pries was veur Baukje Scheppink (Haddegeriep) en de dadde pries gong naor Lenie Stamhuis uut Garnwerd. Veur de drie winners hadde de SSR drie keunstwarken en gedichten beschikber steld van Peter Hiemstra en Christine Mulder, Marjolein Spitteler en Willem Jan Teijema, en Christiaan Kuitwaard en Roely Bakker. Deur een vakjury wodde eerder, bi’j de prissentaosie van ‘Van schossel tot slingerpad’, op de eupeningsdag van Eupen Stal op 12 juli, et wark van An Taveirne (Brugge), Harrie Knoors (Roermond) en Sacha de Ven (Aduard) as beste anwezen. Uut et pebliek dat de formelieren invulde t.b.v. de pebliekspriezen bin acht naemen lot. Die acht meensken wodt een kursus haandboekbienen anbeuden. De kursus wodt op 8 november in Berkoop geven deur Jan Bosch en Corrie Los van de Stichting Haandboekbienen.

Op ‘e foto hierboven het Sacha de Ven krek de pries veur winneres Eva Kipp in ontvangst neumen, omreden laestnuumde mit vekaansie is. Links van heur de maeker van et keunstwark Peter Hiemstra en rechts dichteres Christine Mulder. Hiemstra leut him deur een gedicht van Mulder inspireren en verwarkte ok de tekst daorvan in zien keunstwark.

pebliek 10 aug

Roem veertig haandboekbieners en ere belangstellenden maekten de priesuutrikkinge mit. Rechts veuran Jan Bosch, veurzitter van Stichting Handboekbinden.

Marjolein en Willem Jan

Veur de drie pebliekspriezen die beschikber steld binnen deur de Schrieversronte zorgden Marjolein Spitteler/Willem Jan Teijema (zie foto), Peter Hiemstra/Christine Mulder en Christiaan Kuitwaard/Roely Bakker. 

Van de veertig dielnemers an de manifestaosie haandboekbienen weren neffens et pebliek van Eupen Stal dit de inzenders van et beste wark:

1. Eva Kipp

2. Baukje Scheppink

3. Leny Stamhuis

4. Annina Lingsma

5. Jan Bosch

6. Ans Buiting

7. Sacha de Ven

8. Jaap v.d. Visch

9. Hanneke Rutges

10. Duelles (Eva Kipp en Sacha de Ven)

De Ovend van augustus: Vituskarke Berkoop, Pollemannegien en proemetied

door

Lende, oost

De Lende aachter Boschhoeve in Ni’jberkoop (foto: Sietske Bloemhoff)

Hoe zit et now toch mit de karke van Berkoop?? Eerder wodde die altied gewoon ‘de karke van Berkoop’ nuumd. Een tal jaoren leden wodde et de hieltied meer de gewoonte om de Berkoper karke de Bonifatiuskarke te numen. Mar klopt dat aenlik wel? Is de karke van Berkoop wel een Bonifatiuskarke? In et artikel ‘Middelieuwse petroonheiligen in Stellingwarf’ van Rienk Klooster kuj’ in de ni’jste Ovend lezen dat dat niet et geval is en dat et in Berkoop om een Vituskarke gaot. In et vierde diel van zien serie ‘De Lende van begin tot aende’ vertelt Geert Lantinga weer ommeraek veul biezunderheden over de revier De Lende, mit daorbi’j opni’j prachtige oolde en ni’je foto’s. In ‘Dit plak dot me wat’ vertelt Andries van der Veen an redakteur Jannes Westerhof dat De Lende aachter Boschhoeve in Ni’jberkoop him nog altied veul dot. Henk Bloemhoff vertelt in zien artikel ‘Laete echo’s van Pollemannegien’ over de naemgeving van o.e. Ooldehoorn. De eerste versie van Ooldehoorn was een klein nederzettinkien in de buurt van de Kiekebarg, krek over De Kuunder bi’j Berkoop. Pollemannegien was de bi’jnaeme van de koehuder die an et aende van de 19e ieuw daegs in dat gebied te vienen was. Dit keer kuj’ ok weer mooie verhaelen lezen van o.e. Pieter Dijkstra (De proemetied), Sjoukje Oosterloo (Mien poesiealbum), Lily Köhler (Niet meer votdoen) en twie gedichten van Klaas Knillis Hofstra. Uteraord is d’r nog veul meer in de 32 bladzieden tellende Ovend te lezen. Aj’ De Ovend graeg alle keren toestuurd hebben willen, dan kan dat deur veur € 20,00 in et jaor lid te wodden van de Stellingwarver Schrieversronte. Et blad is ok in de losse verkoop, et kost dan € 4,00. De Ovend verschient zes keer in et jaor.