Ni’js – Pagina 231 – StellingPlus.nl

Voegelexkursies veur schoelekiender uut aende

15 april 2014 door Redaktie

In de bos naost Rikkingehof

Vanwegens et verschienen van Et Stellingwarfs voegelboek bin veurig jaor deur een speciaole warkgroep plannen ontwikkeld om jaorliks op een acht tot tiental schoelen ‘voegelexkursies’ te orgeniseren. Et doel van die exkursies is in et eerste plak om kiender zien te laoten welke voegels in de eigen leefomgeving veurkommen (kunnen). De exkursies wo’n de hieltied inleided mit een speciaol hierveur klaormaekte PowerPoint van Ruurd Jelle van der Leij, hi’j is de fotograaf van Et Stellingwarfs voegelboek. Nao de inleiding gaot de exkursieleider, die meerstal ok voegelwaachter is, mit de kiender de bos of et veld in. Maendag 14 april gongen de leerlingen van groep 5 en 6 van basisschoele Tussen de Singels van Oosterwoolde mit Andries van der Veen naor o.e. de wandelbos naost Rikkingehof. Al kuierende daor naor toe wodden onderwegens ok al hiel wat voegels zien, zoas in de Kleine Singel. Spietig genoeg zat et mit et weer wat tegen, zodat d’r deur de regen, haegel en hadde wiend minder voegels te zien weren as verwaacht. Biezunder was wel de waorneming van een reigernust mit jongen, die drok voerd wodden deur de oolden. Lopende langs et Jardingepad weren ok kiewieten te zien, mar as groot netuurkenner in et algemien wees Van der Veen ok op et now ommefladderende vlindertien et oranjetippien en vertelde hi’j over plaanten as de braandnettel en de hoonsdraf.

De reiger gaot weer op zuuk naor ni’j voer veur de jongen

Langs et Jardingepad

Andries van der Veen vertelde onderwegens ok over verschillende plaanten

Foto’s: Sietske Bloemhoff

De Ovend van april: Bontekoe, De Lende en paosgebruken

14 april 2014 door Redaktie

Oold-burgemeester Bontekoe van Stellingwarf-Oostaende

Een ontwarp uut 1939 van oold-burgemeester Bontekoe veur et gemientewaopen van Oost-Stellingwarf

In et Stellingwarfs tiedschrift De Ovend staon ok in et aprilnommer van dit jaor weer veul biezunder aorige artikels. Dit keer schrift Frans Wuijts van Ni’jberkoop et eerste diel van zien artikel over oold-burgemeester Bontekoe en et gemientewaopen van Oost-Stellingwarf. Geert Lantinga gaot veerder over zien verhael over De Lende (diel 2), Sjoukje Oosterloo vertelt over oolde gebruken rond de Paosken en redakteur Jannes Westerhof praot mit de femilie Gras, oold-bewoners an De Lende krek over de greens van Spange mit Ooldemark. Veur diel viere van et spannende vervolgverhael ‘De ofrekening’ zorgt Jannie Bakker uut Genemuden en d’r bin kollums en gedichten opneumen in alweer nommer twieje van de 41^e jaorgaank van et ienige Stellingwarver tiedschrift De Ovend!

Aj’ lid binnen van de Stellingwarver Schrieversronte kriej’ De Ovend ommenocht toestuurd. Losse exemplaoren bin te koop bi’j Bruna Oosterwoolde, The readshop Wolvege en de Schrieversronte in Berkoop.

SSR geft twie ni’je routegidsen uut

14 april 2014 door Redaktie

Twie ni’je routegidsen:

Fietsen in en om Appelscha (foto: Jan Koops)

Langs oolde en ni’je Hooltpaeden (foto: Geert Lantinga)

In de twiede helte van meie verschienen d’r bi’j de Stellingwarver Schrieversronte opni’j twie routegidsen. Jan Koops van Oosterwoolde schrift een prachtig fietsroute om Appelsche henne, mit as titel In en om Appelscha. De route komt deur historisch interessaante dörpsgebieden van Appelsche, mar gaot ok deur et Fochtelervene, deur Veenhuzen en de Kaele Dunen. Omreden de tetaole lengte van de fietsroute goed 60 km is, het Koops meugelikheden in de gids angeven om de route te verkotten. De routegids geft behalven de route ok veul infermaosie over de gebieden daor aj’ al fietsende langes kommen en is veurzien van prachtige foto’s. De gids is Nederlaanstaelig, telt 32 bladzieden en gaot € 7,50 kosten.

Toegeliekertied verschient ok de ni’je routegids Langs oolde en ni’je Hooltpaeden. Geert Lantinga zorgt mit disse gids opni’j veur een unieke kuier deur mit naeme de bossen en paeden van Hooltpae en Ni’jhooltpae. De kuier gaot langs plakken daor aj’ gewoonlik niet zo gauw terechte kommen zullen, en lat opni’j zien hoe prachtig Stellingwarf is. In de gids vertelt Lantinga over de slim interessaante historie van et gebied, mar het ok ommedaenken veur de netuur. Ok disse routegids is Nederlaanstaelig, wodt 64 bladzieden dikke en gaot € 8,50 kosten.

In 2015 geft de Stellingwarver Schrieversronte opni’j drie routegidsen uut. Bi’j de eerste twieje gaot et om de omgeving van Haulerwiek en Noordwoolde; de dadde zal in drie anienslutende dielen de naoste omgeving van de revier De Lende beschrieven.

In de serie verschenen eerder De buurtschappen van Oosterwoolde, Wandelen rond Wolvega en Taalfietstocht rond Berkoop.

Lovend juryrappot veur ‘Winterwille’

30 maart 2014 door Redaktie

Zundagmiddag 30 meert wodde in De Boerderij naost de prachtige Fraeylemaborg in Slochteren de winner van de Streektaelpries van et Dagblad van et Noorden bekend maekt. In een goed verzorgd kultureel pergramme en een volle zael wodde nao et schoft et juryrappot van alle zeuven nommeneerden veurlezen. Et Stellingwarver kienderboek ‘Winterwille’ was daor iene van. Juryveurzitter Eric van Oosterhout, hi’j is burgemeester van de Drentse gemiente Aa en Hunze, gong naodat hi’j een uterst goed pleidooi hul angaonde et belang van streektaelen over tot et veurlezen van et juryrappot. De jury (mit as leden behalven Van Oosterhout o.m. Gerard Stout en Tonko Ufkes) vun van ‘Winterwille’et volgende:

Een Stellingwerver versie van het Okki en Taptoe winterboek voor kinderen. Afgestemd op de doelgroep tussen vier en twaalf jaar. Puzzels, natuur, liedjes, gedichten, voorleesverhaelties. Optimisme straalt van elke bladzijde. Heel afwisselend en een geweldige stimulans voor het Stellingwerfs, een voorbeeld voor de andere regionale talen. Een doe-boek.

Van Oosterhout gaf an dat de jury et verschrikkelik lastig vunnen had om een winner an te wiezen. D’r moest keuzen wodden uut poëzie, proza en boeken veur kiender. Et was et vergelieken van appels, peren en proemen, zo zee de juryveurzitter. De pries wodde uuteindelik uutrikt an de Drentse dichteres Suze Sanders veur heur boek ‘Veenbraand’.

In 2015 zal de Streektaelpries veur de tiende keer uutrikt wodden.

Et juryrappot van de Streektaelpries van et Dagblad van et Noorden wodt veurlezen deur juryveurzitter Eric van Oosterhout. (Foto: Lenus v.d. Broek)

Zes van de negen mitwarkers van ‘Winterwille’ weren naor Slochteren kommen. V.r.n.l.: Herma Egberts, Nanda van Gestel, Sjoukje Oosterloo, Christine Mulder, Sietske Bloemhoff en Xavière Kolk. Ok et dochtertien van Xavière was mitkommen. (Foto: Lenus v.d. Broek)

Catch the Wind in ’t Stellingwarfs op nommenaosie in Plein 5!! Tip: stem d’r op as ’t even kan!!

29 maart 2014 door Redaktie

Van 3 meert of tot 29 meie kuj’ de hieltied, van maendag tot vri’jdag, een ‘evergreen’ heuren, ommezet in iene van de streektaelen van Nederlaand. Dat is op Plein 5, Radio 5 Nostalgia. Ie kun elke weke stemmen op je eerste keur, via de poll op plein5.ncrv.nl. Wi’j roepen jim allemaole ommeraek op: doe mit en stem disse weke op Catch the Wind, et meraokels poëtische en wereldberoemde nommer van de Schotse zanger Donovan, en, hiel biezunder, speciaol uutvoerd deur oonze Stellingwarver troubadour Henk Bloemhoff in et Stellingwarfs. Donderdag zal d’r een fragment van te heuren wezen in Plein 5, tussen 14.15 en 14.30 ure. Help mit om dit lied in et Stellingwarfs stevig op ‘e kaorte te zetten en stem de kommende weke op Vang de Wiend / Catch the Wind! Disse verkiezings bin misschien te winnen, en et is mooi as oonze regio goed naor veuren komt!

Op vri’jdag wodt de winner van de weke bekendmaekt. Dan kuj’ ok et hiele nommer dat in disse weke de meerste stemmen kregen het, nog es weer heuren. De volgende weken kommen d’r weer aandere dielnemers. De winners van de weke gaon deur naor de finale op Hemelvaortsdag, 29 meie.

De vertaeling ‘Vang de Wiend’ maekte Henk Bloemhoff an et aende van de jaoren zeuventig. Hi’j schrift en zingt et liefst eigen wark, mar Catch the Wind dee him wel zo vule dat d’r een vertaeling kwam. In 2005 het hi’j et speciaol opneumen en uutbrocht op de cd Dag Stellingwarvers! Die is nog altied te koop bi’j de Stellingwarver Schrieversronte, mit bekende nommers as Waor de Lende, Makkinge en Vremde Ofgeunst. In de jaoren tachtig maekte Henk Bloemhoff tegere mit zien zuster Sietske, mit zangeres Renny Krediet en aanderen de lp’s Singeliers en In Twielochten.

Henk Bloemhoff is in 1966 as folksinger in et Engels begonnen en zong zodoende op zien achttiende al riegelmaotig Donovan-nommers as Catch the Wind, Colours, Universal Soldier en Josie. Hi’j zong daornaost ok al gauw Nederlaanstaelige nommers en ontwikkelde een repertoire in et Stellingwarfs. Logisch, want de tael die him et eigenst was drokte et meerst en et makkelikste uut wat hi’j zingen wol en wat hi’j daor dan bi’j beleefde. Stellingwarfstaelige nommers van him die in de regio grote bekendhied kregen, weren o.e. Waor de Lende, Stellingwarver onzinnig draanklied, Hujjinge, Aarme Doeve, De groeten, tot kiek, Hille van De Langelille, Vremde Ofgeunst en Veurjaor.

De Stellingwarver Schrieversronte is slim bliede mit et ommedaenken dat Plein 5 mit zien uutzendings an de streektael- en kultuur van Nederlaand geft. Zo wodt ja de weerde van de streektael de hieltied meer onder de meensken bekend maekt, ok et laandelike pebliek. Et sluut prachtig an bi’j de doelen van de Schrieversronte.