Eerste exemplaor CD Stellingwarfs Volkslied veur dörpsschoele van De Blesse

door

DSC_8432, Jacob, Sven, Ype

Sven Berkien kreeg veur zien schoele de ni’je cd mit et Stellingwarfs Volkslied anbeuden deur Schrieversronte-veurzitter Ype Dijkstra (rechts). Links meester Jacob Vermeeren (foto: Lenus v.d. Broek)

DSC_8453, groep Blesdieke 

Sven lat de ni’je cd zien; hi’j en alle ere kiender kregen vanwegens de biezundere middag et boek ‘Winterwille’ (foto: Lenus v.d. Broek)

Deensdagmiddag 18 meert wodde op de dörpsschoele van De Blesse de spiksplinterni’je cd mit daorop et Stellingwarfs Volkslied prissenteerd. De cd zit in een zonuumd mediaboekien van 24 bladzieden dikke, mit daorin veul ommedaenken veur et biezundere van de regio Stellingwarf, en uteraord de woorden en wieze van et volkslied. Et Stellingwarfs Volkslied wodde in de vuuftiger jaoren van de veurige ieuw schreven deur Hendrik Johannes Bergveld, veur de meziek zorgde doe Han Bokelman.

Et eerste exemplaor van de ni’je cd wodde deur veurzitter Ype Dijkstra van de Stellingwarver Schrieversronte uutrikt an Sven Berkien van de dörpsschoele van De Blesse. Dat gebeurde tegere mit alle ere leerlingen van groep 4 en 5.  Mitien daornao was et volkslied te heuren, en wodde alderdeegst deur de kiender hier en daor al wat mitzongen. Alle kiender kregen vervolgens een exemplaor van et kienderboek ‘Winterwille’ uutrikt. Dat boek is kotleden nomineerd veur de Streektaelpries van et Dagblad van et Noorden.

De laeste tied is d’r vaeke vraoge naor et Stellingwarfs Volkslied, de vraoge komt bi’j de Schrieversronte ok nogal es binnen van schoelen. Zo kwam d’r van de schoele van De Blesse de vraoge om et volkslied op de hiemkunde-webstee www.stellingwerf-heemkunde.nl te zetten, zodat alle Stellingwarver schoele, as ze willen, et volkslied an de leerlingen leren kunnen.

Veur de cd wodde et Stellingwarfs Volkslied zongen deur et mingd koor ‘Oons genoegen’ van Hooltpae, o.l.v. dirigente Hinke Jelsma van Kollumerzwaog. Op de cd is ok een instermentaole versie te heuren, veur die versie zorgde Serge Epskamp van Zaandhuzen. Casco Songs Studio uut Zaandhuzen zorgde veur de opnaemen en mastering van de cd. De teksten in et mediaboekien bin schreven deur Henk Bloemhoff, veur et fotowark zorgden Lenus van der Broek en Sietske Bloemhoff. De vormgeving was in hanen van Alain ter Schuur uut Wolvege. De cd is alliend te koop bi’j de Stellingwarver Schrieversronte in Berkoop. De oplaoge is 500 stoks, de cd kost € 10,00.

 

NOMINAOSIE VEUR BOEK WINTERWILLE!

door

DSC_2887, winterwille boek

Kienderboek WINTERWILLE nomineerd veur Streektaelpries Dagblad van et Noorden

Oflopen zaoterdag wodde bekend dat et kienderboek ‘Winterwille’ nomineerd is veur de Streektaelpries van et Dagblad van et Noorden. Die pries wodt jaorliks uutrikt an et beste kulturele en/of keunstzinnige streektaelprodukt. Et boek Winterwille verscheen in november van et oflopen jaor en wodde uutgeven deur de Stellingwarver Schrieversronte. An et boek warkten mit mekeer negen schrievers, fotografen en tekeners mit: Sietske Bloemhoff, Herma Egberts, Nanda van Gestel, Xavière Kolk, Ruurd Jelle van der Leij, Christine Mulder, Sjoukje Oosterloo, Frank Spijkers en Freddie de Vries. Ere nomineerden in de kattegorie poëzie en proza bin: Stip ter Laan (As ik nou mor eerst wat verdain), Tieme Woldman (Moord in het Mantingerveld), Alja Streutker (Niet van gistern; Biebelse verhalen veur kinder), Willem Tjebbe Oostenbrink (Opdreugde troanen), Rients Gratama & Carla van der Heijde (Pien en heur spinne) en Suze Sanders (Veenbraand). Op zundag 30 meert wodt in een feestelike bi’jienkomst in Slochteren bekendmaekt wie de Streektaelpries 2013 wunnen het. In 2009 wun Johan Veenstra de pries mit zien roman ‘Et geheim van de wiend’.

(Foto: Lenus v.d. Broek)

NI’J: Flitskursus Stellingwarfs

door

De Stellingwarver Schrieversronte orgeniseert op zaoterdag 29 meert de ni’je ‘Flitskursus Stellingwarfs’. Die kursus is bedoeld veur meensken die et Stellingwarfs niet machtig binnen en graeg mit et schrieven én praoten d’r van an de gang willen. De Flitskursus is ok bedoeld veur meensken die et deur de weke niet an tied hebben om de ere beginnerskursussen, die de Schrieversronte op dit gebied orgeniseert, te volgen.

De kursus wodt holen in Berkoop,  en begint morgens om tien ure. Tot twaelf ure is d’r dan andacht veur de spelling en de grammatika van et Stellingwarfs. Dit onderdiel zal geven wodden deur dr. Henk Bloemhoff, taelkundige en saemensteller van et Stellingwarfs Woordeboek. Et middagdiel is van 13.00 tot 15.00 ure, dan is d’r veural ommedaenken veur et praoten en et daegelikse gebruuk van et Stellingwarfs. Dat onderdiel wodt verzorgd deur Ypie v.d. Boer en Sietske Bloemhoff. Kotleden gavven de beide vrouwluden nog de uut acht aovens bestaonde konversaosiekursus ‘Praotgroep Stellingwarfs’.

De Flitskursus wodt geven in et gebouw van de Stellingwarver Schrieversronte in Berkoop, de kosten bin € 20,00 per persoon, koffie en thee inbegrepen. Opgeven kan via de mail info@stellingwarfs.nl, bellen kan ok naor et kantoor: 0516-451108 (van maendag t/m donderdag).

Veurleesaktie zorgtehuzen volgende keer opni’j in jannewaori

door

IMAG0251 (1), veurl.

Tiedens de evaluaosie van de oflopen veurleesaktie in de Stellingwarver zorgtehuzen, die kotleden holen is, is besleuten om de volgende keer de aktie opni’j in jannewaori te orgeniseren. Dat zal dan wezen in jannewaori 2015. Et doel is ok om in plak van twie daegen een hiele weke veur de aktie uut te trekken, zodat de veurlezers wat makkeliker uut de beschikbere tied kiezen kunnen. Ok dit keer dee weer blieken dat alle vri’jwilligers die mit mekeer veur de veurleesaktie zorgen de evaluaosie biezunder op pries stellen. Ieder kan zien erverings en verhael kwiet en vaeke is d’r dan bi’j de eren veul herkenning. D’r wo’n tips uutwisseld mar ok et stokkien verbunnenhied bi’j disse prachtige akties is van veul belang. Et dee blieken dat de aktie bi’j de bewoners van alle zorginstellings ommeraek goed voldaon het, en datzelde gul ok veur de veurlezers. Mar op ien plak gong et wat mis, omreden d’r in et tehuus zels de orgenisaosie niet goed veur mekeer was. Ok de beschikbere verhaelen voldoen goed; alle jaoren wo’n die mit ni’je verhaelen anvuld, zodat de keuze veur de veurlezers de hieltied groter wodt. An de veurleesaktie doen jaorliks rond de twintig vri’jwilligers mit, de orgenisaosie van de aktie wodt daon deur Schrieversronte-mitwarkster Immy Sloot.

Alle jaoren is d’r nao ofloop van de evaluaosie een aorig (veurlees)optreden; dit keer zorgde veurlezer Jacob ten Have van Appelsche veur een fleurig stokkien meziek. Ten Have nemt tiedens de veurleesaktie ok altied zien akkordeon mit en speult en zingt dan tussen de verhaelen deur. Hi’j krigt aenlik altied iederiene wel an et mitzingen en dat lokte him ok in Berkoop zonder muuite! (Foto: Joke Stellingwerf)

Kursus Laandschopsgeschiedenis gaot op 31 meert in Oosterwoolde uut aende

door

Op 31 meert gaot in De Miente in Oosterwoolde de kursus Laandschopsgeschiedenis uut aende. De kursus is ontwikkeld deur drs. Dennis Worst, hi’j is ok iene van de kursusleiders. De ere drie kursusleiders bin Oosterwoolde-kenner Rienk Klooster, Henk Bloemhoff (taelkundige) en Emiel Beijk van Staatsbosbeheer. De kursus wodde eerder, mit biezunder veul sukses, in Else geven. De kursus bestaot uut vier aovens en twie exkursies; de kosten bin € 49,50, veur leden van de Historische Veriening gelt een kotting van € 10,00. Je opgeven kan bi’j de Stellingwarver Schrieversronte in Berkoop. Omreden d’r veul belangstelling verwaacht wodt is et zaeke om dat z.g.m. te doen. Meer gegevens én de gegevens om je an te mellen bin te lezen deur even te klikken op: cursus-landschapsgeschiedenis2014 (2).