Oflopen maendagaovend wodde in Berkoop de eerste konversaosiekursus ‘Praotgroep Stellingwarfs’ ofsleuten. De kursus beston uut acht kursusaovens, viere in november en viere in jannewaori/feberwaori. De kursus bestaot uut verschillende onderdielen daor de van huus uut Nederlaanstaelige kursisten heur Stellingwarfs goed in oefenen kunnen. Et pergramme veur de ‘Praotgroep Stellingwarfs’ wodde speciaol ontwikkeld, en het, zo bleek oflopen maendag, goed voldaon. De konversaosiekursus ‘Praotgroep Stellingwarfs’ gaot in november 2014 weer van start. De kursus wodde ontwikkeld en geven deur Ypie v.d. Boer en Sietske Bloemhoff.
NCRV’s Plein publiek: Bekende ‘evergreens’ in de streektael
Plein 5
Maendag 3 meert
14.00 uur, Radio 5 Nostalgia
NCRV’s Plein 5 zocht evergreens in streektael
Welke streektaelversie van bekende lieties is de mooiste?
Vanof maendag 3 meert gaot et NCRV-pergramme Plein 5 op Radio 5 Nostalgia op zuke naor ni’je streektael-versies van bekende nommers. Onder et motto ‘zing zoals je gebekt bent’ kun meensken een evergreen insturen, zongen in de tael van heur streek. Hoe klinkt Yesterday van The Beatles in et Zeeuws? Waterloo van Abba in et Aachterhoeks? Of When a Man Loves a Woman in et Drents?
Et meugen lieties wezen mit een ni’je tekst of mit een vertaeling in de streektael. Vanof 3 meert wo’n wekeliks, van maendag tot en mit donderdag, fragmenten van de inzunnen evergreens dri’jd in de uutzending. Elke vri’jdag meugen de luusterders bepaolen welk lietien as deurgaot naor de finaole, op Hemelvaortsdag (donderdag 29 meie). Dan strieden de overbleven twaelf lieties om de titel Dialect Evergreen 2014.
Hijlco Span van de NCRV: “In de tied dat ik nog et NCRV-theaterpergramme Volgspot prissenteerde, kreeg ik vaeke gaasten die d’r veur keuzen om in heur eigen streektael te zingen. Vaek omdat ze in die streektael veul beter verwoorden kunnen wat ze warkelik vulen. Daenk an Gé Reinders, Daniël Lohues of J.W. Roy. Dat is me altied bi’jbleven: dat zingen in je eigen (streek)tael hiel direkt en eerlik is. Daoromme, mar ok omdat ik arg van mooie lieties hool én omdat ik weet dat luusterders van Plein 5 slim enthousiast binnen over streektaelverkiezings, kiek ik uut naor disse verkiezing.”
Zangers, meziekgezelschoppen en aandere muzikaanten kun een MP3 van heur evergreen in heur streektael mailen naor plein5@ncrv.nl, of een CD mit et lied insturen naor:
NCRV Radio
t.a.v. redactie Plein 5
Postbus 25000
1202 HB Hilversum
t.a.v. redactie Plein 5
Postbus 25000
1202 HB Hilversum
De Stellingwarver Schrieversronte stuurde de cd ‘Dag, Stellingwarvers’ in van Henk Bloemhoff. Op die cd is et lietien Vang de wiend te heuren, een vertaeling van Catch the wind van de bekende folkzanger Donovan.
Stellingwarver Dag in Buil
Stellingwarver Dag in Buil!
Op zaoterdag 17 meie zal Buil de hiele dag in et teken van et Stellingwarfs staon. Die dag orgeniseert de warkgroep Publiciteit van de Stichting Stellingwarver Schrieversronte veur et eerst een Stellingwarver Dag in een Stellingwarfs dörp. Et doel is om de Stellingwarver Dag ieder jaor in een aander plak te holen, én om op die dag mitien ni’je leden te winnen veur de Schrieversronte.
De dag begint morgen al mit gezellige aktiviteiten, d’r kan keuzen wodden uut verschillende meugelikheden. Middags zal d’r buten o.e. ommedaenken wezen veur de jeugd. Veur de ooldere meensken zullen, zo is et plan, iene of meer ooldere filmbeelden uut et dörp vertoond wodden. Mitwarking daorveur is d’r in elk geval van Jan de Vries van Wolvege. Aovens zullen verschillende Builiger verienings veur een spetterend, ofwisselend en Stellingwarfs pergramme zorgen, mit o.e. een Stellingwarver ienakter en een prachtige ofsluting deur een jonge band uut Buil.
Mit een posien maeken we et pergramme van die biezundere zaoterdag in de bluuimaond bekend!
De Ovend van feberwaori: De Lende, et karkien van Blesdieke, en et is koold in Helsinki!
De Lende bi’j Steggerde (foto: Sietske Bloemhoff)
In de eerste Ovend van dit jaor is d’r mitien veul ommedaenken veur et thema dat disse jaorgang een belangrieke rolle in dit ienige Stellingwarver tiedschrift speult. Dat thema is de revier De Lende en daor zal deur et jaor jenne op alderhaande wieze ommedaenken veur wezen. In et feberwaorinommer vertelt Geert Lantinga van Wolvege over de geschiedenis van de revier en beschrift Pieter Dijkstra uut Appelsche zien herinnerings an De Lende in et westelike pat van Stellingwarf waor hi’j opgruuide. Annie Ligthart van Oosterwoolde mag ommeraek graeg schilderen, en ze dot dat veerweg et liefste bi’j De Lende in Steggerde: redakteur Jannes Westerhof praot mit heur in ‘Dir plak dot me wat’. Mar d’r kommen vanzels ok aandere onderwarpen an bod: Rienk Klooster zorgt veur zien dadde oflevering over verdwenen of oolde karkhoffies in Stellingwarf, dit keer gaot et over dat van Blesdieke. ‘In Helsinki is et now dan eindelik koold,’ vertelt Carolien Hunneman, die alle twie maonden over heur ni’je leven in de Finse heufdstad vertelt. Ze het et now mit naeme over heur wark daor as trener van de Finse jeugdschaetsploeg. In meert dot Carolien heur ploeg trouwens mit an een internationaole wedstried in Thialf. De dadde oflevering van et spannende Nedersaksische vervolgverhael ‘De oflevering’ is schreven in et Aachterhoeks van Derk Jan ten Hoopen, die woonachtig is in et Drentse Zuudwoolde.
De Ovend is los te koop bi’j Bruna Oosterwoolde, The Readshop in Wolvege en de Stellingwarver Schrieversronte in Berkoop, veur € 3,75. Leden van de Stellingwarver Schrieversronte kriegen et blad ommenocht toestuurd.
Veul interesse veur boekbienmanifestaosie SSR
Bi’j de Stellingwarver Schrieversronte in Berkoop lopt de opgifte om mit te doen an de haandboekbienmanifestaosie as een trein. In kotte tied gavven al 50 meensken heur op om an de wedstried haandboekbienen mit te doen. Meensken uut et hiele Nederlaanstaelige gebied kun heur daorveur opgeven, zodat d’r now ok twie Vlaamse dielnemers binnen.
Ondertussen bin de losse katerns en schutblaeden van et keunstboek ‘Van schossel tot slingerpad’ an de dielnemers toestuurd. Die hebben now de tied tot 15 meie om daor een mooi haandbunnen boek van te maeken. Daornao maekt een deskundige jury een eerste selektie. Et anwiezen van de beste of mooiste drie inzendings gebeurt deur de bezukers van de keunstroute ‘Open Stal’ die dit jaor op 12 juli begint. Alle instuurde wark is in die vier weken durende periode te zien in et gebouw van de Schrieversronte. In et gebouw is dan butendat ok et wark te zien van de keunsteners die an et boek ‘Van schossel tot slingerpad’ mitwarkten. Dat bin Marjolein Spitteler, Peter Hiemstra en Christiaan Kuitwaard. In et boek is ok wark van drie Stellingwarver dichters opneumen, dat bin Roely Bakker, Christine Mulder en Willen Jan Teijema. Ok et wark van de dichters zal tiedens Eupen Stal te zien én te heuren wezen. Bi’j de SSR zullen in die periode ok een peer warkwinkels haandboekbienen geven wodden, daorveur zorgen meensken van de Stichting Handboekbinden.