De Stellingwarvers Carolien Hunneman, Johan Veenstra, Serge Epskamp en Jaap Louwes; zi’j alle viere doen mit an et eerste streektaelfestival dat de Skâns in De Gediek orgeniseert op zaoterdagaovend 28 september. Een prachtig initiatief van dit kulturele centrum in Stellingwarfs buurgemiente Opsterlaand! De Skâns zet vot-en-daolik goed in, want d’r is warkelik veur een prachtig pergramme zorgd.

Carolien Hunneman tiedens de vri’jwilligersaovend van de Stellingwarver Schrieversronte begin dit jaor. (Foto: Lenus v.d. Broek)

Et pergramme begint aovens om half achte, en op drie plakken in De Skâns kun deurlopend optredens bezocht wodden. Zo bin in de ‘Ronde Zael’ drie blokkies van schrievers en muzikaanten regeld: Carolien Hunneman en Johan Veenstra verzorgen tegere heur pergramme van 19.30 tot 20.20 ure. Daornao is et de beurt an schriever Douwe Kootstra en troebadoer Doede Veeman en daornao an Jan de Vries en Leendert Ferwerda. In de Grote Zael bin mit naeme optredens van grotere bands, waoronder de Grunninger ‘Straotklinkers’. In et Theaterkefé treden op: Gurbe Douwstra (20.00-20,50 ure), Serge Epskamp (21.00-21.50 ure) en Jaap Louwes (22.00-22.50 ure). De aovend wodt ofsleuten mit een ongetwiefeld schitterend optreden van de fermaosie ‘Troubadoers’, mit o.e. Doede Veeman.

Bi’j de Stellingwarver Schrieversronte was Serge Epskamp veurig jaor o.e. te heuren op een literaire aovend in Noordwoolde. (Foto: Lenus v.d. Broek)

De aovend begint om half achte en duurt tot half iene naachs. De toegangskaorten kosten € 15,00. Veur meer info kuj’ terechte op www.skans.nl.

De Stellingwarver Schrieversronte verkocht al sund jaor en dag Stellingwarver fiets- en bootvlaggies. Mit riegelmaot kuj’ die overal tegenkommen. En niet alliend op fietsen en boten! Vaaste Schrieversronte-fotograaf Lenus v.d. Broek het de westelike variaant bi’j zien zommerhusien an et Nannewied in Ooldehaske uutsteuken, kiek mar:

In de veerte ziej’ nog een vlaggien hangen, dat is een Grunnings vlaggien. Van oorsprong komt Lenus uut Grunningen, en die perveensie heurt krek as Stellingwarf bi’j et grote Nedersaksische taelgebied!

Wie ok zoe’n mooi Stellingwarfs vlaggien in zien bezit hebben wil, dat kan vanzels! Ze bin te koop bi’j de Stellingwarver Schrieversronte in Berkoop (0516-451108, info@stellingwarfs.nl) en kosten mar € 4,50 et stok!

Ok de twiede aovend van de sutelaktie van de Stellingwarver Schrieversronte verleup goed, zodat de opbrengst nao twie aovenden al op € 5.000,00 zit. De sutelploegen weren te vienen in o.e. Noordwoolde, Scharpenzeel en Munnikeburen. Toppers in de verkoop blieven de Stellingwarver Spreukekelinder en de routegids ‘Wandelen rond Wolvege‘. Mar ok boeken as Et Stellingwarver voegelboek en De dörpen van Stellingwarf in oolde beelden wo’n goed verkocht.

Akkie Zijlstra en Jan Baas onderwegens mit de kroje (foto: Anneke Koopstra)

Attie Nijboer het krek een boek verkocht (foto: Anneke Koopstra)

Kommende maendagaovend 2 september wodt d’r suteld in o.e. De Hoeve, De Oosterstreek en opni’j Noordwoolde.

Van Femmie en Auke van Veen uut Hooltpae kregen we foto’s van meertaelighied op Kreta. Femmie vertelt daor et volgende over: ‘Wi’j weren op et mooie Kreta, waor gelokkig de meerste plaetsnaemen ok in et Engels binnen. In de kleine plakkies niet, mar och, dan moej’ je eigen fantesie mar bruken!’ Zo is et mar krek, en Auke en Femmie bin ondertussen, zonder dat ze verdwaeld west binnen, weer veilig en wel in Hooltpae anbelaand…