Vandaege was et weer Gedichtedag. Deur et hiele laand henne weren d’r daoromme tal van aktiviteiten op et gebied van gedichten. De Stellingwarver Schrieversronte twitterde de hiele dag deur ieder ure een Stellingwarfs gedicht. Et idee daorveur wodde overneumen van kollega-instituut Tresoar in Liwwadden. Dat instiuut het ieder ure een Fries gedicht twitterd. De Stellingwarver gedichten die op Gedichtedag twitterd binnen, bin eerdaegs ok op StellingPlus nao te lezen.
Spreuk van de weke
Spreuk van de weke
Sund begin dit jaor is op de thuusbladziede van StellingPlus alle weken een ni’je Stellingwarver spreuk te lezen. De eerste weke gong et om de spreuk Et is mi’j om et even as et honnen binnen of teven, oflopen weke was Ie kun nog zo hadde rieden willen, mar de vielen moe’n tied hebben om te dri’jen te lezen. De spreuken kommen allegere uut et vierdielige Stellingwarfs Woordeboek.
Soepenmaelenbri’j mit rezienen
Soepenmaelenbri’j mit rezienen
Soepenmaelenbri’j mit rezienen, ok wel rezienebri’j nuumd, was eerder in Stellingwarf een hiel gewoon naogerecht, en oe zo lekker!
Om dit klaor te maeken hej’ mael (60 gram), soepe (een liter) en rezienen (zoe’n 75 gram) en wat brune basterdsuker neudig:
Doe de mael in een panne en doe d’r al rurende een betien soepe bi’j totdat et een mooie gladde bri’j zonder klonten wodt. Zet de panne op et vuur en giet al rurende de rest van de soepe in de panne. Doe d’r dan ok de rezienen bi’j en breng de bri’j al rurende an de kook. Laot de bri’j zachies tien menuten deurkoken, en daenk d’r omme: ruren blieven… Ie kun d’r dan nog wat suker deurhenne doen, mar ie kun ok brune basterdsuker toevoegen aj’ de bri’j al in et bod schept hebben. Soepenmaelenbri’j mit rezienen moej’ goed waarm eten, en in een gewoon etersbod… Soepenmaelenbri’j mit rezienen was veural bekend in Oost-Stellingwarf, in Westaende wodden in plak van rezienen vaeke proemen bruukt. Ok slim, slim lekker!
VERTEL MI’J WAT: kursus verhaelen vertellen
De Stellingwarver Schrieversronte orgeniseert i.s.m. Stichting Kunstwerf een kotte kursus ‘Verhaelen vertellen’ veur iederiene doe wat mit verhaelen vertellen doen willen zol: thuus, in et wark, in de buurt of in een verieninge, op schoelen, in zorgtehuzen… Verhaelen vertellen is van alle tieden, van alle streken, van alle meensken. Een verhael vertellen en luusteren naor een verhael – et is wat meensken bint. Vandaege-de-dag staot de keunst van et vertellen van verhaelen weer de hieltied meer in de belangstelling.
De kursus is op drie woensdagaovenden in et gebouw van de Schrieversronte in Berkoop. Et gaot om woensdag 13 feberwaori, 27 feberwaori en 6 meert, de hieltied van 20.00 tot 22.00 ure. Baukje Koolhaas (professioneel verhaeleverteller, docent en coach) begeleidet de dielnemers in et ontdekken en ontwikkelen van heur eigen stiel van vertellen. D’r is ommedaenken veur inhoold en opbouw van een verhael, taelgebruuk en woordkeuze, veurdracht en expressie.
Uutgangspunt van de kursus is: plezier in vertellen! De kursus richt him op: Wat vertel ie? Hoe vertel ie dat? An wie vertel ie? Iedere kursusaovend begint mit een deur Baukje zels verteld verhael, waorin een bepaold aspekt van et vertellen an bod komt. Daornao gaoj’ an et wark mit een verhael naor keuze. Ie kun zels een Stellingwarfs-, Fries- of Nederlaanstaelig verhael mitnemen, of kiezen uut anbeuden verhaelen in die drie taelen. Bi’j de verhaelen kan et gaon om volksverhaelen, historische verhaelen, ooit lezen verhaelen, of persoonlike verhaelen.
Vertellen is veural een kwestie van dóen. Dus is d’r veul aktie: opdrachten, oefenings, vertellen-veur-de-groep, leren mit mekeer en van mekeer – en veural ok van jezels.
Veur kursisten die vertellen willen veur pebliek orgeniseren we in overleg een kleinschaolig vertelpodium om heur verhaelen heuren te laoten.
De kosten van de kursus bin €35,-, inklusief koffie en thee.
Veur meer infermaosie kuj’ kontakt opnemen mit: Sietske Bloemhoff (Stellingwarver Schrieversronte: 0516-451108, of info@stellingwarfs.nl) of Baukje Koolhaas (Soelaes, verbinding met verbeelding: 06 24129520, o516 480929, of baukjekoolhaas@soelaes.nl. Zie ok www.soelaes.nl.
Stellingwarver Schrieversronte, Willinge Prinsstraote 10, 8421 PE Berkoop
Jouk
Jouk (Martinus Bakker) was ien van de eerdere schrievers in et Stellingwarfs. Bakker die van Noordwoolde kwam schreef mit naeme onder de schoelnaeme Jouk, mar ok nog al es onder de naeme Jan Aarm Ongelok, huusnommer dattien. Et verhael Rere tieden ston in feberwaori 1990 in de verhaelerebriek Op ‘e Schostienmantel’ van de regionaole kraante ‘Stellingwerf’.