STELLINGWARFPOP KOMT DE HIELTIED DICHTERBI’J!

door

Stellingwarfpop komt de hieltied dichterbi’j!

Zaoterdagaovend 29 september wodt in Berkoop veur de vuufde keer et popfestival Stellingwarfpop holen. Dit keer is zorgd veur een fantastisch ofwisselend pergramme. Et festival is op et evenementeterrein De Doevekaampe en begint om 19.00 ure. Om mit te doen an Stellingwarfpop moe’n de dielnemers op zien minst ien eigen Stellingwarfstaelig nommer naor veuren brengen. Veul groepen zullen liekewel meerdere nommers in et Stellingwarfs heuren laoten. Opvalend is dat d’r dit keer meer semi-akoestische optredens binnen as eerder. De orgenisaosie is daor bliede mit, want die perbeert om veur zoe’n groot meugelike verscheidenhied an meziek te zorgen. Dat dat now bi’j et eerste lustrum – et gaot dit keer om et vuufde Stellingwarfpop – et geval is, is daoromme een mooie vere op de hoed.

Stellingwarfpop wodt prissenteerd deur Fons Herder, rondomtoe bekend as zanger van de fermaosie A Liquid Landscape. Et festival duurt tot 24.00 ure en is gratis. De volgende bands/duo’s/singer-songwriters doen mit:

The After Midlife Group

Disse band bestaot uut Guus Huis in ’t Veld (zang, gitaar), Teo Krijgsman (zang, gitaar), Tonny Hassing (bas) en Jan Visser (drums, zang). Et rippertoire van The After Midlife Group is hiel verschillend, mar de groep speult veural bekende popmeziek vanof de jaoren ’60.  

Rosie Kills

Rosie Kills bestaot uut zangeres Sietske Sietsma en gitarist Rob Zandgrond. Beide bin al jaoren aktief in de meziek en vaeks ok in dezelde bands, zoas o.e. in heur eigen rockband Carmentheband mit eigen nommers. Uut die groep is ok et duo Angelsmile ontstaon, dat nommers van eerdernuumde band akoestisch speult. Nao een onderbreking van een jaor of drie, waorin Sietske en Rob heur eigen muzikaole paeden insleugen, bin ze now beide weer aktief in de rockfermaosie Rosie Kills, en laoten as duo op Stellingwarfpop nommers van die band akoestisch heuren.

COR & co

COR & co is een gelegenhiedsfermaosie die speciaol veur Stellingwarfpop in et leven reupen is. Sommige leden speulden eerder in Roadhawks, die eerder ok mitdee an Stellingwarfpop. Aandere leden bin aktief in de band Twadde Leafde. Over de tekst ‘En op mien boek zit een muske’ vertelt Peter Hassing, tekstschriever en iene van de leden van de band, dat et lied over stress en warkdrok gaot, mar ok over ontspanning. Peter vun ooit een muske, et besien was halfdood. Et knapte liekewel op en bleef drie jaor in de buurt van Peter en zorgde zo veur ontspanning in een drok bestaon.

Freaking Doodle Special

Freaking Doodle Special is een band die uut jonge meensken bestaot en die rockmeziek maekt. De band bestaot uut Suzanne Kuilberg (zang), Mark Bijlsma (gitaar), Rik Friso (bassist) en Yorick Herszkowicz (drums). Rik en Yorick deden eerder ok mit an Stellingwarfpop, mar dan in een aandere band. Et rippertoire van Freaking Doodle Special bestaot veural uut rockmeziek.  

Serge Epskamp

Serge Epskamp is een singer-songwriter die van oorsprong uut de Aachterhoek komt, mar onderhaand al weer een kleine tien jaor in Zaandhuzen woont. Tegere mit bluegrass-specialist Erwin van de Ven zorgde Serge veur de cd ‘Oer’, die op 22 september verscheen. De meziek die Serge en Erwin brengen is een mix van americana, bluegrass, pop en verstilde akoestische nommers. In tegenstelling tot eerdere berichten treedt Serge op Stellingwarfpop niet alliend op, mar tegere mit Erwin.

Spirit of the dark

De hardrockband Spirit of the dark bestaot sund 2011. De groep speult veural covers die in een eigen jassien steuken wodden, van The Animals tot Deep Purple, mar ok van Iron Maiden en Saxon waor de veurkeur naor uutgaot. Spirit of the dark het ondertussen drie eigen Stellingwarver nommers. De band bestaot uut Jannie Dijkstra (zang), Martin Vogels (gitaar), Eise Dijkstra (bas) en Remko de Jong (drums). 

The Jetfarm

The Jetfarm bestaot uut Ruud Fieten (zang, gitaar) en Rob Zandgrond (zang, gitaar). Et duo bestaot now ongeveer twie jaor, mar ondanks dat nog mar kotte bestaon treedt The Jetfarm al mit veul bekende bands en singer-songwriters op, op grote festivals, tuunfeesten en kaemerkonserten. Zo dee et duo dit jaor nog mit an de Grote Prijs van Nederland. De meziek van The Jetfarm is een mix van jazzy funk en americana, country en blues.

Grote veurraod twiedehaans boeken veur boekemark

door

15 SEPTEMBER BI’J BRUNA IN OOSTERWOOLDE

Op zaoterdag 15 september hoolt de Stellingwarver Schrieversronte een boekemark mit twiedehaans boeken bi’j boekwinkel Bruna in Oosterwoolde. Een peer maonden leden dee de Schrieversronte mit naeme onder de leden van de stichting een oproep om twiedehaans boeken daorveur beschikber te stellen. Ondertussen staon d’r in et Schrieversrontegebouw in Berkoop tientallen deuzen vol boeken die veur de mark inbrocht binnen. Mit ien oogopslag is te zien dat veur disse biezundere mark veul prachtige en vaeks weerdevolle boeken beschikber steld binnen. Veur liefhebbers van (vaeks uutverkochte) boeken is de mark op 15 september dan ok beslist een anraoder. Et advies is om niet te laete te kommen, want de verwaachting is dat veerweg et grootste pat in een mum van tied verkocht is.

De mark begint morgens om elf ure en duurt tot middags vier ure, temeensen… as de veurraod dan nog niet uutverkocht is! De opbrengst van de mark is bedoeld veur et financieren kunnen van alle jubileumaktiviteiten van de 40-jaorige stichting dit jaor, zoas de Stellingwarver ienakteraovenden en de literaire aovens.  

Een goeie maond laeter, op zaoterdag 27 oktober, hoolt de Stellingwarver Schrieversronte in Wolvege een twiede mark van twiedehaans boeken. Die mark wodt holen bi’j boekwinkel The Readshop an de Heufdstraote West.

Uutverkocht!

door

Uutverkocht!

Veertien daegen naodat et boek De dörpen van Stellingwarf in oolde beelden prissenteerd wodde is de ‘ni’je klassieker’ van Jan Koops en Jan de Vries uutverkocht. De Stellingwarver Schrieversronte leut 750 exemplaoren drokken, mar dat bliekt now al vusen te min te wezen. Tiedens de vierde sutelaktie-aovend van de Schrieversronte raekte de veurraod in Berkoop hielemaole op. Op dit mement bin de boeken alliend nog te koop bi’j Bruna in Oosterwoolde en The Readshop (Zwikstra) in Wolvege. Intied is al een herdrok van et boek besteld.

In De dörpen van Stellingwarf in oolde beelden bin van alle 39 Stellingwarver dörpen prachtige ofbeeldings van oolde prentbriefkaorten en foto’s opneumen. In eerste instaansie is daorveur een selektie maekt uut de omvangrieke verzaemelings van de beide auteurs. Daornaost leverden liekewel veul historische verienings en pattekelieren veul mitwarking deur ok biezunder fotomateriaol en gegevens beschikber te stellen.

Slim interessaant is ok de bi’jdrege van taelwetenschopper dr. Henk Bloemhoff. Bloemhoff zorgde veur de plaknaemeverklaorings van alle Stellingwarver dörpen; hi’j dee daor et laeste halfjaor nog extra onderzuuk naor.

De herdrok van et boek is mit een dag of veertien klaor, de verkooppries blift geliek: € 17,50. Veur de herdrok kan liekewel gien gebruuk meer maekt wodden van de kottingsbon van Boompers.

Sutelaktie 2012 begint goed!

door

Sutelaktie 2012 begint goed!

Maendagaovend 27 augustus was de eerste in een riegel van zes sutelaktie-aovenden die de Stellingwarver Schrieversronte ok in zien jubileumjaor orgeniseert. Zoe’n 22 vri’jwilligers gongen mit noflik sutelweer op pad in de dörpen Blesdieke en Wolvege. Toppers in de verkoop weren, zo dee nao ofloop blieken, et krek verschenen boek De dörpen van Stellingwarf in oolde beelden en de Stellingwarver Spreukekelinder. De opbrengst was disse eerste aovend mitien al goed, d’r wodde veur een kleine € 3.000,00 verkocht. Woensdagaovend is de twiede sutelaovend, ok die is in Stellingwarf-Westaende. 

Sutelder Jannes Westerhof (links) en boekebak-klaormaeker Hendrik Betten inspekteren nog even de bakken. (Foto: Lenus van der Broek)

Sutelders Pieter Dijkstra (links) en Marten Vonk doen heur eerst nog even tegoed an wat lekkere bolties veurdat ze de streek op gaon. (Foto: Lenus van der Broek)

Onder anvoering van Schrieversronte-veurzitter Ype Dijkstra blaost Titia Bijwaard op de suteltoeter en kan de sutelaktie 2012 uut aende gaon! (Foto: Lenus van der Broek)

Op een peer nao alle sutelders van maendag 27 augustus; op de veurgrond Koop Oosterloo van Wolvege, die veur de routes en indieling van de ploegen zorgde. (Foto: Lenus van der Broek)