Een vekaansiehusien op ‘e Valouwe in Appelsche het de mooie naeme ‘Stille wille’. En… die naeme kujje vanzels van alles bi’j veurstellen, neffens Akkie Zeilstra van Raevenswoold die de foto instuurde veur Stellingwarfs in ’t ‘wild‘.
168. Meensken die naor rust verlangen
Nommer 139 van de serie ‘Stellingwarfs in ‘t wild’ was de eerste die we plaetsten van de mooie bodden in Berkoop mit spreukies van Lamkje Hof-de Boer (1908-1991). Dit bod staot an de Oosterwooldseweg, daor is et volgende op te lezen:
Minsken die naor rust verlangen
willen wij hier graeg ontvangen
en veerder kuj lezen op n bord
wat jow hier alzo beuden wordt
Et is een betien spietig dat et Stellingwarfs niet hielemaole goed weergeven is… Misschien bi’j een eerstvolgende opknapbeurt even anpassen?
Nedersaksisch erkend as volweerdige, zelsstaandige tael
Et konvenant is krek ondertekend deur de Nedersaksische overheden en et Riek (Foto: Lenus v.d. Broek)
De tiende oktober van 2018 moet in de geschiedenis van et Nedersaksisch, oonze Stellingwarver regio, de perveensies Drenthe, Grunningen, Overiessel en de regio’s Aachterhoeke en de Veluwe in Gelderlaand een biezunder plak kriegen. Uut naeme van menister Ollongren en mit uut naeme van de Nedersaksische overheden verklaorde op disse dag siktaoris-generaol drs. Maarten Schurink van Binderlaanse Zaeken et Nedersaksisch tot een volweerdige, zelsstaandige tael. Dat gebeurde op een grote bi’jienkomst mit veul geneudigden in et perveensiehuus in Zwolle. Dippeteerde Hester Maij van Overiessel hadde veurofgaond de geneudigden welkom hieten en in et biezunder de bestuurlike vertegenwoordigers van de verschillende perveensies en gemienten. Butendat hadde ze een kotte toelochting geven. Disse nationaole erkenningsuutspraoke het as basis an de iene kaante dat de streektaelorgenisaosies en belangstellende groepen sprekers graeg willen dat heur tael ok officieel volledig veur vol anzien wodt en daornaost willen de verantwoordelike regio-overheden d’r dudelik in wezen dat et Nedersaksisch een officeel erkende tael is krek as ere erkende taelen. De overheden willen butendat mit mekeer et gebruuk van et Nedersaksisch anmoedigen, om mit de orgenisaosies te zorgen dat oonze tael in de toekomst in levendig gebruuk blift.
De ondertekening wodde eerst daon op een mooie laandkaorte van et Nedersaksisch, waorop ieder op zien regio tekende, en vervolgens wodde de ondertekening in et echt daon onder de tekst van et konvenaant dat de naodere uutwarking geft. Zo tekenden dus, nao de siktaoris-generaol, dippeteerde Cees Bijl van Drenthe, Sietske Poepjes van Frieslaand, Josan Meijers van Gelderlaand, Henk Staghouwer van Grunningen, Hester Maij van Overiessel, borgemeister André van de Nadort van West-Stellingwarf en wethoolder Fimke Hijlkema van Oost-Stellingwarf.
Et konvenaant en de erkenningsuutspraoke bin bepaold bedoeld om et imago van et Nedersaksisch te verbeteren, dus vaaste te zetten op de realiteit van een normaal erkende tael, wiels veerder o.e. bepaold is dat de Nedersaksische overheden mit mekeer optrekken om et Nedersaksisch te beweren en et bruken veuruut te helpen, mar zoks wel zonder ni’je wet- en regelgeving. De gemienschoppelike inspannings zullen in veerder overleg uutwarkt wodden.
Veurofgaond an et pergramme van de officiële ondertekening kreeg et pebliek een ‘inspiraosiepergramme’ anbeuden, mit veurbeelden van mooi en goed gebruuk van et Nedersaksisch uut de verschillende regio’s. Uut Stellingwarf weg brochten direkteur Sietske Bloemhoff van de Stellingwarver Schrieversronte en heur skriptschriever en filmregisseur Thomas Rovers een toelochting bi’j de op staepel staonde film ‘Daor klept de klokke weer’, an de haand van een trailer. Die film gript weeromme op de vri’jhiedsstried van Stellingwarf uut et eerste kwat van de 16de ieuw.
Weven mit Marianne Kemp
Oflopen vri’jdag verzorgde keunsteneres Marianne Kemp uut Utrecht een warkwinkel weven veur de groepen acht van de basisschoelen De Tjongeling van Berkoop en De Stelling in Makkinge. Die beide warkwinkels weren nog in et kader van et Under de toer-projekt De Verdwenen Peerden. Marianne Kemp warkt en weeft veul mit peerdehaor, vandaor dat ze vraogd was veur et geven van de warkwinkels op beide schoelen. Omreden de theatertocht De Verdwenen Peerden him ofspeulde in de dörpen Ni’jberkoop en Berkoop kregen die beide schoelen dit anbod. De aovend d’r veur gaf Kemp een slim interessaante lezing over heur wark as keunsteneres. De lezing liekegoed as de warkwinkels zollen geven wodden veurofgaonde an De Verdwenen Peerden op 3 en 4 augustus, mar deur ziekte van Kemp mossen die uuutsteld wodden. Veur wie meer weten/lezen wil over et wark van Marianne Kemp rikkemederen we heur webstee an: http://horsehairweaving.com.
Op ‘e foto’s: de leerlingen van groep acht van De Stelling weren slim enthousiast over de warkwinkel en geneuten daor meraokels van (foto’s: Lenus v.d. Broek)
Harmen Houtman dreug veur uut eigen wark
Tiedens een gezaemelike literaire aovend van de Fryske Krite en de Stellingwarver Schrieversronte dreugen de schrievers Martsje de Jong (Fries) en de Stellingwarver Harmen Houtman veur uut eigen wark. Harmen Houtman, die mit een ni’je bundel in de weer is, dreug disse aovend veural veur uut zien dichtbundel ‘Dichterbi’j’. Vermoedelik nog dit jaor verschient zien bundel mit verhaelen, waor now al veul belangstelling veur is. Op de aovend, die holen wodde in De Miente in Oosterwoolde, dee boekhaandel Bruna goeie zaeken. De aovend wodde orgeniseerd in et kader van de Stellingwarver en Friese sutelaktie en boekeweken. (Foto’s: Lenus v.d. Broek)