Kursus ‘Stellingwarfs veur beginners’ gaot uut aende

door

  

Op donderdagaovend 15 november gaot in Wolvege de kursus ’Stellingwarfs veur beginners’ uut aende. Tiedens de kursus is d’r mit naeme ommedaenken veur et schriftelik gebruuk van disse kotleden erkende Nedersaksische tael, mar ok veur et praoten d’r van. Daornaost zal d’r over de tael en de oorsprong d’r van uutleg geven wodden.

De kursus wodt geven in de biebeltheek van Wolvege, en bestaot uut zes lesaovenden. Die aovenden bin op donderdag 15, 22 en 29 november en op donderdag 10, 17 en 24 jannewaori, de hieltiedvan 19.30 tot 21.30 ure. De pries is € 60,00, inkl. kursusmateriaol en koffie/thee. De kursusleiding bestaot uut dr. Henk Bloemhoff (Oosterwoolde) en Mark van Veen (Wolvege). As ofsluting is d’r in et veurjaor een exkursie in een Stellingwarfs netuurgebied. Meensken die heur nog niet opgeven hebben en toch graeg mitdoen willen zollen, kun heur anmellen bi’j de Stellingwarver Schrieversronte in Berkoop.

Annie Ligthart bi’j Schrieversronte

door

Vanof disse weke bin bi’j de Stellingwarver Schrieversronte in Berkoop schilderi’jen te zien van Annie Ligthart uut Oosterwoolde. Ligthart is veural bekend as de schilderes van De Lende; een peer jaor leden was wark van heur mit dat onderwarp in Berkoop tentoonsteld.

Dit keer bin d’r mit naeme schilderi’jen te zien, waorbi’j de schilderes heur inspireren laoten het deur o.e. et Stellingwarver laandschop. Mar soms tilt Ligthart onderwarpen uut heur warkelike omgeving en zet ze in een deur heur keuzen laandschop. Dat maekt daj’ bi’j et bekieken van et wark de hieltied verrast wodden deur somstieden opmarkelike keuzes.

Et is een anraoder om dit ni’je wark van Annie Ligthart te bekieken. Dat kan t/m jannewaori op deensdaegen en woensdaegen tussen 10.00 en 16.00 ure. Plak: Stellingwarver Schrieversronte, Willinge Prinsstraote 10, Berkoop. De toegang is ommenocht.

’Dichter’ bi’j de netuur

door

Fietsen in de netuur mit dichters:

  

  

Op zaoterdagmiddag  27 oktober is d’r een fietstocht van zoe’n 25 kilometer deur de mooie omgeving van Hooltpae en omgeving. Onderwegens zal Freddie de Vries wat vertellen over de netuur en de kultuurgeschiedenis van disse streek. Tiedens de tocht zullen d’r ok  een tal bekende Stellingwarver dichters mit fietsen; dat bin o.e. Attie Nijboer, Harmen Houtman en Johan Veenstra. Zi’j zullen onderwegens inkelde van heur gedichten veurdregen op een toepasselik plak. Al mit al een goeie reden om de fiets uut et schuurtien te haelen! En et kost ok nog es hielemaole niks…

De tocht begint om 14.00 ure bi’j kefé Wever in Hooltpae. Et mitdoen an disse tocht, die deur Freddie in gezaemelikhied mit de Stellingwarver Schrieversronte orgeniseerd wodt, kost niks.

Aj’ van doel binnen en gao mit, wi’j’ je dan even opgeven bi’j Freddie de Vries? Zien tillefoonnr. is 0561-688749

Foto’s: Lenus v.d. Broek, Sietske Bloemhoff, Andries van Huizen en Freddie de Vries

171. De Lendevallei

door

  

Nog zoe’n netuurgebied van It Fryske Gea, dat officieel zien naeme in et Stellingwarfs holen het is de Lendevallei, in de buurt van Steggerde, Peperge en De Blesse. Jim zien de naeme hier op et infermaosiebod an de oolde weg tussen Wolvege en De Blesse.

170. Blessebroggepolder

door

    

De schaans bi’j De Blesse ligt in et gebied van It Fryske Gea dat de ‘Blessebroggepolder’ nuumd wodt. Ok hier lat de Friese netuurinstelling weer zien dat ze in Beetsterzwaog gebruuk maeken van naemgevings in et Stellingwarfs van heur terreinen in oonze kontreinen. Dat is een ploeme weerd, ok al zol hier aenlik ‘poolder’ staon moeten hebben…