Weven mit peerdehaor

door

 

Now kommende donderdagaovend 27 september is d’r in textielinstituut HAWAR in Berkoop een lezing van en prissentaosie deur keunstener/weefster Marianne Kemp uut Utrecht. Kemp vertelt over heur wark en ontwikkeling angaonde et gebruuk maeken van peerdehaor in heur keunstobjekten. De aovend is een onderdiel van De Verdwenen Peerden, een projekt van de Stellingwarver Schrieversronte en iene van de 32 manifestaosies van et perveensiaole LF-2018 projekt Under de toer.

Et pergramme begint om acht ure, anmellen kan bi’j hawar@hawar, de kosten bin € 5,00.

De dag d’r op zal Marianne Kemp twie warkwinkels verzorgen op de basisschoelen van Berkoop en Makkinge. Ze gaot mit de leerlingen in de weer mit et warken mit peerdehaor. Ok disse lessen bin een onderdiel van De Verdwenen Peerden.

Stellingwarfs-Friese aovend in De Miente

door

Harmen Houtman (© Sietske Bloemhoff)

Op donderdagaovend 27 september orgeniseren de Fryske Krite en de Stellingwarver Schrieversronte opni’j een gezaemelike Stellingwarfs-Friese aovend. Die aovend is ok van ’t jaor weer in de grote zael van De Miente in Oosterwoolde en begint om 20.00 ure.

Et Stellingwarver diel van de aovend zal verzorgd wodden deur Harmen Houtman uut Et Vene, mar van vroeger ofkomstig uut Ni’jhooltpae. Veur et Friese pat zorgt schriefster Martsje de Jong uut Beetgum. Ok boekhaandel Bruna is weer present mit een kraom vol mit Stellingwarver en Friese boeken.

Et pergramme duurt van 20.00 tot 22.00 ure. De intree is €6,00, daor bin twie bakkies thee of koffie mit een stokkien koeke bi’j inbegrepen.

Sutelaktie: roem boven de € 11.000,-!

door

De sutelders van de Stellingwarver Schrieversronte weren et d’r dit jaor mit mekeer hielemaole over iens. De opbrengst van de sutelaktie mos in 2018 over de € 10.000,- kommen, ok al was iederiene veurig jaor hiel tevreden west mit et eindbedrag van doe: € 9.300,-. Et veurnemen lokte hielemaole, want al an et aende van de vuufde suteldag was d’r veur goed € 10.000,- verkocht. Oflopen woensdag kon de vlagge hielemaole uut, want de opbrengst van 2018 bleek an et aende van de aovend mar liefst € 11.233,40 te wezen. Een geweldig bedrag, daor niet alliend alle sutelders, mar vanzels ok et bestuur van de stichting ommeraek bliede mit is. Per kroje wodde ok beter verkocht as een jaor leden, zo dee blieken, dat de verkoop van Stellingwarver boeken zit aorig in de lift. Toppers in de verkoop weren de ni’je boeken van Freddie de Vries en Johan Veenstra, en de Stellingwarver Spreukekelender. In Oosterwoolde en omgeving verkochten de sutelders butendat flink wat exemplaoren van et veldnaemeboek van Oosterwoolde.

Trailer: Daor klept de klokke weer

door

Ok al moest de première van de film ‘Daor klept de klokke weer’ wegens ziekte uutsteld wodden, intied is wel de trailer veur die film klaor. De trailer zal o.e. op 10 oktober prissenteerd wodden tiedens een kultureel pergramme as dan et konvenaant veur de veerdere erkenning van et Nedersaksisch ondertekend wodt deur  de Nedersaksische overheden en et Riek. Veur een toelochting op de film zorgen skriptschriever en regisseur Thomas Rovers en Sietske Bloemhoff.

Meertaelighied in Duutslaand

door

In de Landkreis Heidekreis in Duutslaand wodt ok gebruuk maekt van meertaelighied op plaknaembodden. Een mooi veurbeeld daorvan is op disse foto te zien die deur Henk Bloemhoff maekt wodde in de omgeving van Schneverdingen / Snevern. Et twietaelige plaknaembod is in et Hoogduuts en Nederduuts.