Harmen Houtman nommeneerd

door

Veur de verhaelewedstried die alle jaoren orgeniseerd wodt deur et Skriuwersboun, Cedin en et Friesch Dagblad bin 51 verhaelen instuurd, verdield over een junior- (12) en in seniorkattegorie (39). Dit jaor was et thema ‘Gien stiel?!’. Dat onderwarp hadde te maeken mit et feit dat et van ’t jaor honderd jaor leden is dat de Nederlaanse keunstbeweginge ‘De Stijl’ opricht is.

Bi’j de volwassenen valen (in willekeurige volgodder) Jan Bijlsma (‘Jan-Pyt, Joris en Corneel’), Tryntsje van der Veer (‘Oare streken’) en Harmen Houtman (‘Niet langer wit…’) in de priezen. Et verhael van Harmen Houtman was et ienige Stellingwarver verhael dat instuurd wodde. De ere verhaelen weren allemaole in et Fries.

Nao een kotte inleiding over et thema deur museumdirekteur Paulo Martina, zal op deensdag 9 meie bekend maekt wodden wie de eerste pries wunnen het. De priesuutrikkinge is in et Museum Dr8888 in Drachten.

135. Et Kloniehuus

door

Et is vanzels hiel gewoon dat d’r ok Stellingwarver naemen in ’t wild buten de Stellingwarven veurkommen. Et Stellingwarfs wodt ja niet allienig in de Stellingwarven praot, mar ok in de angreenzende gebieden van Drenthe en Overiessel. Et MFC van et dörp Willemsoord het dan ok een mooie Stellingwarver naeme. En ok nog in de juuste spelling! (Tekst en foto: Johan Veenstra)

134. Wi’j warken an een mooi Wolvege Zuud

door

Opni’j bruukt de perveensie et Stellingwarfs bi’j et angeven van et doel van ien van heur warkzemheden. Dit keer gaot et om de inrichting veur netuur, waeter en rekreaosie bi’j Wolvege Zuud. Et is arg mooi dat now struktureel et Stellingwarfs op disse wieze bruukt wodt. De foto wodde instuurd deur Annie Dedden van Blesdieke.

 

Twaelf leerlingen van et Comperio College slaegen veur kursus Stellingwarfs

door

 

Tegere mit heur juffer Ageeth Bos kwammen oflopen vri’jdagmorgen twaelf leerlingen van et Comperio College uut Wolvege naor et gebouw van de Stellingwarver Schrieversronte in Berkoop. Naodat ze et oflopen seizoen lessen Stellingwarfs volgd hadden, kwammen ze daor examen doen. De leerlingen wodden tiedens et examen toetst op et mondelinge en et schriftelike gebruuk van de et Stellingwarfs. Veur et mondelinge pat mossen ze heurzels veurstellen in et Stellingwarfs en daornaost vertellen over een verhael dat ze tiedens de kursus schreven hadden. Et schriftelike pat beston uut een diktee en et schrieven van een verhael n.a.v. een twintigtal woordkaorties.

An et aende van de examenmorgen bleek dat alle leerlingen et examen ommeraek goed daon hadden. Ze kregen daoromme allemaole een diplome uutrikt deur veurzitter Jan Baas van de Schrieversronte. De twaelf verhaelties de veurofgaonde an et examen schreven binnen zullen nog bundeld wodden, mar wo’n ok publiceerd in et Stellingwarfs tiedschrift De Ovend.

De kursus en et examen wodde ontwikkeld en veurbereided deur Ageeth Bos, die daorbi’j de hulpe kreeg van Sietske Bloemhoff en van Henk Bloemhoff. Et doel is dat ok in et volgende schoelejaor de leerlingen van groep achte van et Comperio College opni’j Stellingwarver les kriegen zullen.

Et Comperio College is een akkedemisch leerpunt veur hoogbegaofde leerlingen van et basisonderwies in Oost- en West-Stellingwarf.  (Foto: Lenus v.d. Broek)

Laeter vandaege volgen meer foto’s 

Vri’je Staot De Stellingen

door

Et feest is begonnen!

 

Zaoterdagmiddag 1 april wodde in Appelsche de Vri’je Staot De Stellingen uutreupen. Et was mitien et begin van een jaor vol aktiviteiten i.v.m. et vuufhonderdjaorig bestaon van Stellingwarf-Oostaende. Veur die tied bestonnen de Stellingwarven uut ien gebied, dat was et boererepubliekien Stellingwarf dat bestuurd wodde deur stellings. Et ni’je laand De Stellingen het liekewel nog gien president, mar is daor wel naor op zuke. Om tot een juuste keuze te kommen zullen alle Stellingwarver kiender vraogd wodden om daorveur te zorgen. Om ze daor op veur te bereiden is et speciaole onderwiesprojekt ’Et feest van de eerste grietman’ ontwikkeld deur Marita Kruijswijk, Marian Nesse en histotolk Frank Spijkers, i.s.m. de Stellingwarver Schrieversronte. Et gezelschop is al benaoderd deur een tiental basisschoelen; et eerste feest wodt vierd op 2 meie mit de leerlingen van basisschoele De Riemsloot in Appelsche.

  

   

(Foto’s: Sietske Bloemhoff)