Bi’j disse kraom an de weg in Lhee kuj’ zoas d’r staot veul veur mar weinig geld kriegen. Wonder dat d’r dan gien meens bi’j was te snuuien doe we d’r langesfietsten op een zoemerse dag in september… (Foto en tekst: Johan Veenstra)

In et mooie dörpien Lhee, vlakbi’j et al lieke mooie Dwingel, hebben de kiender een ok al lieke mooi speulplakkien. (Foto en tekst: Johan Veenstra)

An et Schuinpad in Wolvege zag Hans Salverda disse kraom van Corina mit voegelhokkies. Now schrieven we in et Stellingwarfs al sund jaor en dag ‘ao’ in plak van ‘oa’, mar somtieden verzinnen meensken heur daor nog wel es in. Wie graeg et Stellingwarfs beter schrieven leren wil kan trouwens een kursus volgen gaon. Dat kan ok gewoon thuus, want al een peer jaor leden is de Instagramkursus Stellingwarfs ontwikkeld!

Twie mitwarkers van Stellingwarfs in ’t wild zaggen dit pamflet mit de ankondiging Vledder giet knall’n: Hans Salverda in Diever (foto) en Henk Jager in De Blesse. Of ze beide ok naor et oktoberfeest toegaon zullen, is niet dudelik… Pattietoeren wodt wel es docht dat ‘giet’ (3e persoon inkelvoold) veur ‘gaat’ Drents wezen zol. Mar mit naeme een groot pat van Oost-Stellingwarf bruukt dit zo. Taelkundig zien vaalt de tael van Vledder trouwens onder et Stellingwarfs, perveensiaole greenzen bin now ienkeer niet etzelde as taelgreenzen.

In Wolvege is een straote mit de naeme De Venne. Vermoedelik gaot et om een oolde veldnaeme en zoj’ daenken dat hier eerder een poele of venne west het. Henk Jager, die de naeme zag en d’r een foto van maekte, het nog op oolde kaorten keken, mar kon die liekewel niet vienen.