Doe we vandezoemer deur Kaelenbarg fietsten, zaggen we een bottien mit de naeme An ’t Waeter d’r op. De femilie Schelhaas het in et dörpien Wetering, dat in de Kop van Overiessel in et Nationaol Park Weerribben-Wieden ligt, in een oolde boerderi’je een B&B en een resteraant plus terras an ’t waeter. Ie kun d’r ok kamperen. (Foto en tekst: Johan Veenstra)

Henk Jager Van De Blesse mag graeg even een aentien in de mooie omgeving daore fietsen. En hi’j let altied op of hi’j nog mooie Stellingwarver naemen tegenkomt die in et eupenbaor in gebruuk binnen. De Speulkoele is vanzels een hiele mooie naeme veur de camping an et Kloniepad in de buurtschop De Pol(le).

Streektael en graffiti zien we intied ok! Henk Jager maekte disse foto d’r van onder et viadukt van de snelweg bi’j Willemsoord.

De Ribbe is een straotnaeme in Scharpenzeel. Een toepasselike naeme in et waeter- en rietlaand van de Westhoeke van West-Stellingwarf. Een ribbe is een smalle stroke grond tussen twie patten van een venepoele. (Foto en tekst: Johan Veenstra)

De Kragge is een straotnaeme in Scharpenzeel. Krek as De Ribbe ligt de straote in een ni’jbouwwiekien, vlakbi’j de karke. Een kragge is een moerassig stok laand vlakbi’j een venepoele mit meerst riet d’r op. (Foto en tekst: Johan Veenstra)