268. de Olde Vaort
Dit was de naeme van een eetkefé in Noordwoolde. Neffens mi’j staot et al een hiel schoft leeg. Olde hadde eins Oolde wezen moeten, mar olde wodt hiel vaeke bruukt zoas bi’jveurbeeld in de olde duker (32), ’t Olde café (33), ’t Olde Wold (77), De Olde Tramhalte (225), ’t Olde Wief (240) en De Olde Stee (266). (Foto en tekst: Johan Veenstra)
267. Lende
Op ien van de husiesdeuren in dörpshuus De Bult op Der Izzerd staot Lende. Och, now ja, et het allegeer mit waeter te maeken. (Foto en tekst: Johan Veenstra)
266. De Olde Stee
Op ‘e Schaopedrift vlakbi’j et Rooie Dörp in Noordwoolde hej’ een gezellige minicamping mit de naeme ‘Schapendrift’. Et huus dat d’r al veul en veul eerder ston – dat bliekt ok wel uut de naeme – hiet ‘De Olde Stee’. Zoas we vaeker in disse serie zien is ‘olde’ mit mar iene o schreven, in plak van twieje, zoas dat in et Stellingwarfs gebrukelik is.
Op Oranje 2: gedicht van Attie Nijboer
Op Oranje 2
Hiel Hollaand kleurt oranje
Vanwegens een ni’je pandemie
Disse gekte kent gien beparking
We hebben et d’r poer drok mit
Somstieden ok slim te kwaod
Straoten, pleinen en grachten
Huzen, winkels en meensken
Et gaot van halem, wi’j gaon los!
As de balle rollen gaot
Kuwwe niet meer waachten
Et virus gript in et ronte
De R(onte) fakter is anstikkelik
Gaot finaol over de kop
D’r is gien holen meer an
We bin ien en al oge en oor
De happies van Cora van Mora
Vliegen de frituurpanne uut
Gaon grif van mond tot mond
Et bier zorgt veur lange meters plezier
En daegenlaank protte vertier
Behalven as oons elftal strukelt
Dan dukelt de besmettingsgraod
Van menuut tot menuut
En is et uut mit de warking
Van al die oranje fleur en franje!
Mar we gaon d’r veur
We lopen niet veuruut
En gaon we wel nat
Dan ligt et niet an oons
Dat is een feit, en simple zat!
We hadden vule meer in oonze masse
We misten niet alliend kaansen
Mar die VARS zien ook gien snas
Of zien et hielendal verkeerd
Wat speulde die tegenstaander gemien!
Attie Nijboer