Disse weke, van maendag 7 t/m donderdag 10 jannewaori, is d’r in et NCRV-radiopergramme Plein Vijf veul ommedaenken veur de Stellingwarven. Et pergramme besteedt alle weken andacht an een stad of regio in et laand, en veur disse weke is keuzen veur de Stellingwarven. Et pergramme is elke middag tussen 14.00 en 16.00 ure te heuren op Radio 5. Op maendagmiddag 7 jannewaori wodt praot mit Baukje scheppink, zi’j is direkteur van et Vlechtmuseum in Noordwoolde. Deensdagmiddag 8 jannewaori is histotolk Frank Spijkers an de beurt en op woensdagmiddag 9 jannewaori vertelt Sietske Bloemhoff over de Stellingwarver Schrieversronte.
Algemien
Ni’je rebriek: gerechten uut de streek
Recepten
Van now of an het StellingPlus d’r een ni’je rebriek bi’j: gerechten uut de streek. Jim kun now mitien al over twie gerechten lezen die mit naeme in et winterse jaorgetiede eten wodden. Over beide gerechten weren eerder te lezen op de Stellingwarver Spreukekelinder van 2003 en bin doe opschreven deur Koop Gorte van Hooltpae. Wie ok nog recepten of gerechten kent van eertieds kan die deurgeven an de Stellingwarver Schrieversronte in Berkoop, de mitwarkers van StellingPlus plaetsen ze graeg op disse webstee! Et mailadres van de Schrieversronte is: info@stellingwarfs.nl.
ZEGEND NI’JJAOR!
Alle mitwarkers van StellingPlus weensken jow een ommeraek goed, gezond en veural Pluszierig 2013 toe!
Dwarrel(s)!
De eerste dwarrel is sund 1 jannewaori op StellingPlus te lezen. Wat? De eerste dwarrel? Nee… De aldereerste TWIE DWARRELS mar liefst!! Et moet vanzels gien gekkeboel wodden… Twie dwarrels toegelieke… Toch: op zien minst elke maond wodt d’r iene hiele ni’je dwarrel plaetst. Veur al die dwarrels zorgen Attie Nijboer van Oosterwoolde en Henk Kroese uut Langedieke. Mit dwarrels wo’n woordspeulings en/of aorige uutspraoken bedoeld, die de maekers d’r van op StellingPlus daeledwarrelen laoten.
Veurleesaktie Schrieversronte weer goed verlopen
Jannes Westerhof lest veur in Berkenstede (foto: Lenus van der Broek)
Veurleesaktie Schrieversronte weer goed verlopen
Op donderdag 27 en vri’jdag 28 december wodde weer op 26 plakken in de Stellingwarver verpleeg- en zorginstellings in Stellingwarf en in iene in Wilhelminaoord veurlezen deur roem twintig vri’jwilligers van de Stellingwarver Schrieversronte. De aktie is veural bedoeld om de bewoners een extra aktiviteit an te bieden in de soms wel es wat rustige daegen tussen kast en oold en ni’j. Mar daornaost ok om de meensken die in de zorg warken daormit een betien te ondersteunen.
Veur de veurleesaktie is een speciaole bundel mit verhaelen saemensteld, die alle jaoren anvuld wodt en die zo onderhaand al een hiel boekwark wodden is. In 2013 wodt de veurleesaktie veur de vuufde keer holen en zal d’r extra ommedaenken veur wezen.
Op ‘e foto’s bin een tal veurlezers en heur pebliek te zien op vuuf verschillende plakken in Wolvege.
Mark van Veen lest veur in de Lycklamastins (foto: Lenus van der Broek)
Henny Spijksma lest veur in Berkenstede (foto: Lenus van der Broek)
Titia Bijwaard las op twie plakken veur: in Berkenstede en in De Stoeke op Lindestede (foto: Lenus van der Broek)
Sjoukje Wouda en Janet Marks lezen veur op dagbehaandeling De Sluis in Lindestede (foto: Lenus van der Broek)