Ninke

Foto’s Stellingwarver Dag

door

Foto’s: Lenus van der Broek

Op zaoterdag 7 juli was d’r, vanwegens et 40-jaorig bestaon van de Stellingwarver Schrieversronte, een grote Stellingwarver Dag. Die dag was heufdzaekelik in en om et gebouw van de Schrieversronte in Berkoop, mar wodde mit een feestelike kulturele aovend ofsleuten in Hotel Holland Inn in Wolvege.

Et morgenpergramme gong uut aende mit een gesprek dat veurzitter Ype Dijkstra hadde mit zowat alle oold-veurzitters. Nao een gezellige en reünie-achtige lunch konnen de dielnemers an de Stellingwarver Dag mitdoen an een kulturele busreize, een taelfietstocht of een dörpskuier.

Vanof zes ure dee een grote groep van meensken mit an een overheerlik lopend buffet bi’j  Holland Inn, waor om acht ure de feestelike kulturele aovend beginnen zol. An die aovend deden o.e. vier schrievers mit en wodde de alderni’jste Stellingwarver film prissenteerd.

Tegen twaelf ure gongen de laeste feestgangers op huus an, an een prachtige Stellingwarver Dag was een aende kommen…

Een uutgebreid verslag kuj’ lezen deur even te klikken op: Feestelike Stellingwarver Dag

Taelkundige dr. Henk Bloemhoff onderscheiden

door

(Foto Lenus van der Broek)

An et aende van de jubileumbi’jienkomst vanwegens et 40-jaorig bestaon van de Stellingwarver Schrieversronte wodde Henk Bloemhoff van Oosterwoolde benuumd tot Ridder in de Odder van Oranje Nassau. De onderscheiding kreeg Bloemhoff opspeld deur burgemeester Harry Oosterman van Stellingwarf-Oostaende vanwegens zien grote inzet veur et Stellingwarfs en de Stellingwarver Schrieversronte deur de jaoren henne. Zie en luuster ok naor:

Omroep Frieslaand: http://bit.ly/HiXE7d

Liwwadder kraante: http://www.lc.nl/friesland/regio/article14777973.ece/Taalkundige-Henk-Bloemhoff-geridderd

Ienakteraovend Else

door

Roem honderd meensken geneuten van twiede ienakteraovend

Op zaoterdag 25 feberwaori wodde in Else de twiede ienakteraovend holen die de Stellingwarver Schrieversronte dit jaor orgeniseert vanwegens et 40-jaorig bestaon van de stichting. In Else voerde de tenielklub van Buil ‘Nut en genoegen’ de jubileumienakter Veertig jaor! Et fesien op van Harmen Houtman. De twiede ienakter wodde naor veuren brocht deur de tenielklub van Else, et gong om de hilarische ienakter Een schoon milieu kost een protte centen van Johan Veenstra. Et muzikaole diel wodde verzorgd deur et Elsiger smatlappekoor ‘Elser Smart’ dat o.l.v. Janny Bakker twie keer een riegel prachtige lieties naor veuren brocht, waoronder ok een tal Stellingwarver.

De opkomst van roem honderd personen is biezunder goed te numen, butendat kreeg de Schrieversronte opni’j veul lof veur et orgeniseren van dit soort genoeglike Stellingwarver aovens.

De eerstvolgende ienakteraovend is al op vri’jdag 16 meert, die aovend is in Hotel De Zon in Oosterwoolde. In Oosterwoolde brengt de tenielklub van Else opni’j de ienakter van Johan Veenstra naor veuren, wiels een speciaole tenielklub van Oosterwoolde de al even komische ienakter De schriever van et dörpsbelang van Trinus Riemersma (in een vertaeling van Sjoukje Oosterloo) opvoeren zal. Daornaost treedt et waeterkaantkoor ‘De Kompagnonsvrouwluden’ van Oosterwoolde op. Et pergramme begint om 20.00 ure, de toegang is ommenocht. 

Ok veur et Elsiger foto-album zorgde Lenus van der Broek uut Wolvege.  

(Foto’s www.lenusvanderbroek.nl)

Stellingwarfpop 2011

door

 

In 2012 veur de vuufde keer Stellingwarfpop!

 

De foto’s die hier te zien binnen, bin maekt deur Jeroen van der Pol tiedens Stellingwarfpop 2011.

Ondertussen bin de veurbereidings veur Stellingwarfpop 2012 weer begonnen, et festival wodt dit jaor veur de vuufde keer orgeniseerd.

Bands of singer/songwriters die graeg mitdoen willen kun kontakt opnemen mit de Stellingwarver Schrieversronte. Dat kan tillefonisch (even vraogen naor Sietske Bloemhoff), of via de mail info@stellingwarfs.nl.