De naeme De Koele kwammen we eerder ok al es tegen in disse rebriek (nr. 87). Et gong doe om De Koele bi’j Hooltpae. Mar De Koele is ok de naeme van et zo mooie eupenlochttheater van Appelsche! Veur de foto’s zorgde Renzo Bruggink van Raevenswoold.
Redaktie
118. De Slegge
Een slegge is een leegte of een leeg diel in et laand. Soms is zoe’n slegge ontstaon deur verzakking omreden d’r eerder een sloot lag. Ok een verzakt diel in een oprit of pad wodt wel een slegge nuumd. Et zol daoromme niet vremd wezen as de weg – De Slegge in Appelsche – wat leger ligt as de omgeving d’r omhenne. De foto’s veur Stellingwarfs in et ‘wild’ wodden oons toestuurd deur Renzo Bruggink van Raevenswoold.
Perveensiaole steun veur film
De Stellingwarver Schrieversronte krigt € 12.500,- van de perveensie Frieslaand veur de verfilming van et boek ‘Daor klept de klokke weer’. Om de film realiseren te kunnen is mit mekeer € 22.500,- neudig. Behalven de toezegging van de perveensie het ok Stichting Bercoop Fonds al € 4.000,- beschikber steld. Veur et resterende bedrag van € 6.000,- lopt nog een anvraoge.
‘Daor klept de klokke weer’ wodde in 1959 schreven deur onderwiezer H. Hoogeveen van Oosterwoolde en in 2009 bewarkt en vertaeld deur Hans Koopmans, ok onderwiezer in Oosterwoolde. Et boek gaot over de stried veur de vri’jhied van Stellingwarf en die van Frieslaand. De geschiedenis van die periode (aende 15e ieuw, begin 16e) wodt verteld in een spannend verhael dat veural bedoeld is veur kiender van 11 t/m 14 jaor. Et doel is dat de film in 2018 klaor is en anbeuden wodt an et Stellingwarver basis- en vervolgonderwies. De Stellingwarver Schrieversronte hoopt mit disse film jongeren meer enthousiast te kriegen veur de geschiedenis en de tael van Stellingwarf. Historikus en regisseur Thomas Rovers het et skript al schreven; et plan is dat de eerste opnaemen in et veurjaor van 2017 wezen zullen.
Jury Bergveldpries: Chapeau veur Freddie de Vries en Ruurd Jelle van der Leij!
Freddie de Vries (links) en Ruurd Jelle van der Leij kregen de penning die bi’j de H.J. Bergveldpries heurt, en die ontwurpen is deur beeldhouwer Guus Hellegers
Et wodde maendagaovend 17 oktober een feestelik gebeuren in Berkoop. Daor wodde de H.J. Bergveldpries 2016 uutrikt an Freddie de Vries en Ruurd Jelle van der Leij. De Vries en Van der Leij kregen de pries veur heur in 2012 verschenen ’Et Stellingwarver voegelboek’.
Tegen de zeuventig meensken maekten de biezundere zesjaorlikse gebeurtenis mit
Veur de jury bleek et gien makkelike opgaove om tot een oordiel te kommen, bleek uut et juryrepot dat deur juryveurzitter Carel Zuil veurlezen wodde. Wat et anbod anbelangt was d’r spraoke van een grote verscheidenhied, zo zee hi’j. D’r kwam nogal wat literetuur in anmarking, mar ok biografienen, geschiedenis en meziek. De jury hadde o.e. ommeraek veul wardering veur de veldnaemeboekies die deur de jaoren henne deur de Schrieversronte uutgeven binnen. Dat gul ok veur de uutgiften van biografienen van Rob Zethoven, Gerrit Hof en Lies Boersma en veur de grote inzet van Sjoukje Oosterloo veur et Stellingwarfs. Daornaost was d’r veul lof veur et kienderboek ‘Winterwille’, ‘De dörpen van Stellingwarf in oolde beelden’, ‘Van schossel tot slingerpad’ (gedichten en foto’s) en ‘Verzin’ van Roely Bakker.
De gemienten wodden vertegenwoordigd deur borgemeister Van Klaveren van West-Stellingwarf (links) en kultuurwethoolder De Boer van Stellingwarf-Oostaende
Flora en fauna
‘In de veurbi’je jaoren verschenen d’r ok fraaie flora- en faunaboeken zoas Vissen, amfibienen en reptielen in Stellingwarf van Henk J. Jager mit foto’s van Klaas van der Veen. Eerder publiceerde Jager al Et Stellingwarver Plaanteboek. We hopen dat d’r nog meerdere boeken volgen over de flora en fauna van de Stellingwarven,’ zo gaf de jury an.
De maekers van ‘Et Stellingwarver voegelboek’ zorgden veur een leesbere, toegaankelike tekst veur iederiene en biezundere, onmisbere foto’s
Et Stellingwarver voegelboek
‘De jury wil benaodrokken dat niet alliend direkt literair wark een bi’jdrege levert an oons gebied. Ok historische, geografische, archeologische en flora- en fauna boeken doen dat.
’De uutaendelike keuze van de jury is valen op Et Stellingwarver Voegelboek schreven deur Freddie de Vries mit foto’s van Ruurd Jelle van der Leij. Et boek is schitterend uutgeven. De tekst is leesber, toegaankelik veur iederiene en niet hoogdraevend. De Vries schrift in een persoonlike stiel. De Stellingwarver voegelnaemen, die veur vule meensken onbekend binnen, blieven op disse meniere beweerd in et onthoold. Trouwens, dat is ok et geval in de boeken van Henk J. Jager en Klaas van der Veen. De jury vragt ok extra ommedaenken veur de slim biezundere foto’s die onmisber binnen in dit voegelboek. Veur iederiene zal et dudelik wezen dat et maeken van disse foto’s geweldig vule tied en muuite kost hebben moet. Om die reden miende de jury de Bergveldpries uutrikken te moeten an de schriever en fotograaf van Et Stellingwarver Voegelboek. Chapeau veur Freddie de Vries en Ruurd Jelle van der Leij!’
De jury beston dit keer uut Grietje Bosma, Peter Riksma (links) en Carel Zuil
Warkgroeplid Attie Nijboer schreef twie prachtige gedichten veur elk van de maekers van et boek
Geldbedrag, penning en gedichten
Nao et schoft rikte Schrieversronteveurzitter Jan Baas de H.J. Bergveldpries 2016 uut. Die pries bestaot uut een geldbedrag van € 1.000,- en een speciaole penning die indertied ontwurpen is deur beeldhouwer Guus Hellegers.
Warkgroeplid Attie Nijboer hadde nog veur een biezundere verrassing zorgd. Veur beide winners hadde ze een toepasselik gedicht schreven, dat ze nao et veurlezen d’r van an heur overhaandigde.
Veul wardering was d’r veur de meziek van Johannes Peetsma (links) en Marius van der Leij van ‘The Given Horse’
The Given Horse
De aovend wodde muzikaol opfleurd deur et bekende duo ‘The Given Horse’. Johannes Peetsma en Marius van der Leij – hi’j is een bruur van Ruurd Jelle – leuten eigen wark heuren, bewarkings van nommers van The Doors én een Grunningstaelig lietien van Ede Staal.
Schrieversronteveurzitter Jan Baas bedaankte de warkgroep die de prissentaosie veurtreffelik orgeniseerde. V.r.n.l. Gerard Floor, Attie Nijboer, warkgroepveurzitter Frank Spijkers, Geke Zanen en veurzitter Jan Baas
De Stellingwarver Schrieversronte kan op een ommeraek slaegde aovend weerommezien. De volgende Bergveldpries wodt uutrikt in 2022.
Foto’s: Lenus v.d. Broek
117. de Brogge van Ni’jlaemer
JIm lazzen en zaggen al bi’j nommer 116 van de serie Stellingwarfs in et ‘wild’ de ni’je naeme ‘De brogge van Jikke’ van de brogge in Ni’jlaemer. Diezelde dag onthulde borgemeister Gerard van Klaveren ok een plaquette, daor een foto van en een gedicht over Jikke Oosterhof op te zien is. Et gedicht schreef Harmen Houtman uut Et Vene, mar van vroeger van Ni’jhooltpae.
De brogge van Ni’jlaemer
Starke, stille overtocht,
oolde, stevige, staolen brogge,
kniepoogt vaek’ de Schipsloot toe,
vermant et haostig warkers-volk:
‘rogge recht, en loop wat vlogger’.
Brogge tussen boom en gruun,
soezerig dichte, vlot weer eupen,
aarms goezen deur de locht;
scharnierespul mit peze-kracht,
is tussen twie bochten kreupen.
Jikke trok de klompen an
dri’jde veerdig an de slinger,
zee de schippers vaeke gedag,
nao zeuvenveertig jaor pas muj
in knoest en pols’ en vingers
’t Kefe dat alle schippen telt,
scharpe boegen golven deur,
centen, stuvers, dubbelties,
even een posien broggeschoft;
’t Verlof zegt A en tóch likeur !
Stille steert et waachtershuus,
mit d’ ogen van zien hoge kaemer,
naor et winters noorden toe,
waor de redens krassen op ’e
’vroege’ baene van Ni’jlaemer…